ನಾರ್ವೆ ಚೆಸ್‌: ಆನಂದ್‌ಗೆ ಜಯ

Team Udayavani, Jun 3, 2022, 6:43 AM IST

ಸ್ಟಾವೆಂಜರ್‌ (ನಾರ್ವೆ): ನಾರ್ವೆ ಚೆಸ್‌ ಕೂಟದ ಕ್ಲಾಸಿಕಲ್‌ ವಿಭಾಗದಲ್ಲಿ ಭಾರತದ ವಿಶ್ವನಾಥನ್‌ ಆನಂದ್‌ 2ನೇ ಗೆಲುವು ಸಾಧಿಸಿದ್ದಾರೆ. ಅವರು ಬಲ್ಗೇರಿಯದ ವ್ಯಾಸೆಲಿನ್‌ ಟೊಪಲೋವ್‌ ವಿರುದ್ಧ ಗೆದ್ದು, ಕೂಟದ ಅಗ್ರಸ್ಥಾನಕ್ಕೇರಿದ್ದಾರೆ.

52 ವರ್ಷದ ಆನಂದ್‌ 36 ನಡೆಗಳಲ್ಲಿ ಎದುರಾಳಿಯನ್ನು ಮಣಿಸಿದರು. ಇದು ಆನಂದ್‌ ಸಾಧಿಸಿದ ಸತತ 2ನೇ ಗೆಲುವು.

ಐದು ಬಾರಿಯ ವಿಶ್ವಚಾಂಪಿಯನ್‌ ವಿಶ್ವನಾಥನ್‌ ಆನಂದ್‌ 5 ಅಂಕ ಹೊಂದಿದ್ದಾರೆ. ಅವರು ಮೊದಲ ಪಂದ್ಯದಲ್ಲಿ ಫ್ರಾನ್ಸ್‌ನ ಮ್ಯಾಕ್ಸಿಮ್‌ ವಾಕಿಯರ್‌ ಲಗ್ರಾವೆ ವಿರುದ್ಧ ಗೆಲುವು ಸಾಧಿಸಿದ್ದರು. ಕ್ಲಾಸಿಕಲ್‌ ಕೂಟಕ್ಕೂ ಮುನ್ನ ನಡೆದ ಬ್ಲಿಟ್ಝ್ ನಲ್ಲಿ ಆನಂದ್‌ 4ನೇ ಸ್ಥಾನ ಪಡೆದಿದ್ದರು. ಪ್ರಸ್ತುತ ಗೆಲುವಿನೊಂದಿಗೆ ವಿಶ್ವ ಚಾಲ್ತಿ (ಲೈವ್‌) ಶ್ರೇಯಾಂಕದಲ್ಲಿ ಆನಂದ್‌ 9ನೇ ಸ್ಥಾನ ಪಡೆದಿದ್ದಾರೆ. ಇನ್ನು ಬ್ಲಿಟ್ಝ್ ನಲ್ಲಿ ಪ್ರಶಸ್ತಿ ಗೆದ್ದಿರುವ ಅಮೆರಿಕದ ಖ್ಯಾತ ಆಟಗಾರ ವೆಸ್ಲೆ ಸೊ, ನಾರ್ವೆಯ ಪ್ರಖ್ಯಾತ ಆಟಗಾರ ಮ್ಯಾಗ್ನಸ್‌ ಕಾರ್ಲ್ಸನ್‌ ವಿರುದ್ಧ ಗೆದ್ದಿದ್ದಾರೆ.