ನೊವಾಕ್‌ ಜೊಕೋವಿಕ್‌ಗೆ ಮತ್ತೆ ಆಸ್ಟ್ರೇಲಿಯ ವೀಸಾ?

ಪ್ರಧಾನಿ ಆ್ಯಂಟನಿ ಅಲ್ಬನೀಸ್ ರಿಂದ ನಿಷೇಧ ತೆರವು?

Team Udayavani, Nov 16, 2022, 7:45 PM IST

ನೊವಾಕ್‌ ಜೊಕೋವಿಕ್‌ಗೆ ಮತ್ತೆ ಆಸ್ಟ್ರೇಲಿಯ ವೀಸಾ?

ಸಿಡ್ನಿ: 21 ಗ್ರ್ಯಾನ್‌ಸ್ಲಾಮ್‌ ಪ್ರಶಸ್ತಿಗಳ ಒಡೆಯ ಸರ್ಬಿಯದ ನೊವಾಕ್‌ ಜೊಕೋವಿಕ್‌ ಅವರಿಗೆ ಮತ್ತೆ ಆಸ್ಟ್ರೇಲಿಯದ ಬಾಗಿಲು ತೆರೆಯಲಿದೆಯೇ? ಈಗಿನ ಬೆಳವಣಿಗೆಗಳನ್ನು ನೋಡಿದರೆ ಮುಂದಿನ ವರ್ಷ ಜನವರಿಯಲ್ಲಿ ನಡೆಯಲಿರುವ ಆಸ್ಟ್ರೇಲಿಯನ್‌ ಓಪನ್‌ ಗ್ರ್ಯಾನ್‌ಸ್ಲಾಮ್‌ನಲ್ಲಿ ಅವರು ಆಡುವ ಸಾಧ್ಯತೆ ಇದೆ. ಆಸ್ಟ್ರೇಲಿಯದ ಹೊಸ ಸರಕಾರ ಅವರಿಗೆ ವೀಸಾ ನೀಡುವ ಲೆಕ್ಕಾಚಾರದಲ್ಲಿದೆ ಎಂದು ವರದಿಯಾಗಿದೆ.

ನೊವಾಕ್‌ ಜೊಕೋವಿಕ್‌ ಈವರೆಗೆ ಕೊರೊನಾ ಲಸಿಕೆ ಪಡೆದಿಲ್ಲ. ಆಸ್ಟ್ರೇಲಿಯದ ಕಾನೂನಿನಲ್ಲಿ ಲಸಿಕೆ ಹಾಕಿಸಿಕೊಂಡ ವಿದೇಶಿಯರಿಗೆ ಮಾತ್ರ ದೇಶ ಪ್ರವೇಶಿಸಲು ಅವಕಾಶವಿದೆ. ಈ ವರ್ಷಾರಂಭದ ಆಸ್ಟ್ರೇಲಿಯನ್‌ ಓಪನ್‌ನಲ್ಲಿ ಆಡಲೆಂದು ಜೊಕೋವಿಕ್‌ ಆಸ್ಟ್ರೇಲಿಯ ಪ್ರವೇಶಿಸಿದ್ದರು. ಕಾನೂನು ಹೋರಾಟದಲ್ಲೂ ಅವರು ಗೆದ್ದಿದ್ದರು. ಆದರೆ ಆಸ್ಟ್ರೇಲಿಯ ಸರಕಾರ ಕಠಿನ ನಿರ್ಧಾರ ತೆಗೆದುಕೊಂಡು ಕೂಟದ ಆರಂಭದ ಹಿಂದಿನ ದಿನ ಅವರನ್ನು ದೇಶದಿಂದ ಹೊರಕಳುಹಿಸಿತ್ತು!

ನಿಲುವು ಬದಲಿಸದ ಜೊಕೋ
ಇಷ್ಟಾದರೂ ಜೊಕೋವಿಕ್‌ ತಮ್ಮ ನಿಲುವನ್ನು ಬದಲಿಸಿಲ್ಲ. ಆದರೆ ಆಸ್ಟ್ರೇಲಿಯದಲ್ಲಿ ಸರಕಾರ ಬದಲಾಗಿದೆ. ಆ್ಯಂಟನಿ ಅಲ್ಬನೀಸ್ ಹೊಸ ಪ್ರಧಾನಿಯಾಗಿದ್ದಾರೆ. ಅವರು ತಮ್ಮ ವಿವೇಚನೆ ಬಳಸಿ ಜೊಕೋವಿಕ್‌ ಮೇಲೆ ಹೇರಲಾಗಿರುವ 3 ವರ್ಷಗಳ ವೀಸಾ ನಿಷೇಧ ತೆರವು ಮಾಡುವ ಸಾಧ್ಯತೆಯಿದೆ.

ಈ ಬಗ್ಗೆ ಆಸ್ಟ್ರೇಲಿಯ ಸರಕಾರದ ಕಡೆಯಿಂದ ಯಾವುದೇ ಅಧಿಕೃತ ನಿರ್ಧಾರ ಹೊರಬಿದ್ದಿಲ್ಲ. ಆದರೆ ಜೊಕೋವಿಕ್‌ ಪ್ರತಿಕ್ರಿಯೆ ನೀಡಿದ್ದು, “ನನ್ನ ವ್ಯವಸ್ಥಾಪಕರು ಆಸ್ಟ್ರೇಲಿಯ ಸರಕಾರದೊಂದಿಗೆ ಮಾತುಕತೆ ನಡೆಸುತ್ತಿದ್ದಾರೆ. ಯಾವುದೂ ಅಧಿಕೃತಗೊಂಡಿಲ್ಲ’ ಎಂದು ಹೇಳಿದ್ದಾರೆ. ಅವರು ಟ್ಯುರಿನ್‌ನಲ್ಲಿ ಎಟಿಪಿ ಫೈನಲ್ಸ್‌ ಕೂಟದ ಮೊದಲ ಪಂದ್ಯದಲ್ಲಿ ಗೆದ್ದ ಬಳಿಕ ವರದಿಗಾರರಿಗೆ ಈ ಹೇಳಿಕೆ ನೀಡಿದರು.