ಏಕದಿನ ರ್‍ಯಾಂಕಿಂಗ್‌: ವಾರ್ನರ್‌ ನಂ.1 ಬ್ಯಾಟ್ಸ್‌ಮನ್‌

Team Udayavani, Jan 28, 2017, 4:00 AM IST

ದುಬಾೖ: ಪಾಕಿಸ್ಥಾನ ವಿರುದ್ಧ ಸತತ 2 ಶತಕ ಬಾರಿಸಿ ಮೆರೆದ ಆಸ್ಟ್ರೇಲಿಯದ ಸ್ಫೋಟಕ ಆರಂಭಕಾರ ಡೇವಿಡ್‌ ವಾರ್ನರ್‌ ಮೊದಲ ಬಾರಿಗೆ ಏಕದಿನ ಬ್ಯಾಟಿಂಗ್‌ ರ್‍ಯಾಂಕಿಂಗ್‌ನಲ್ಲಿ ಅಗ್ರ ಸ್ಥಾನ ಅಲಂಕರಿಸಿದ್ದಾರೆ. ಭಾರತದ ನಾಯಕ ವಿರಾಟ್‌ ಕೊಹ್ಲಿ 3ನೇ ಸ್ಥಾನಕ್ಕೆ ಕುಸಿದಿದ್ದಾರೆ. ದ್ವಿತೀಯ ಸ್ಥಾನದಲ್ಲಿರುವವರು ಎಬಿ ಡಿ ವಿಲಿಯರ್.

ಪಾಕ್‌ ವಿರುದ್ಧದ ಸರಣಿಯಲ್ಲಿ 367 ರನ್‌ ಬಾರಿಸಿದ್ದು ವಾರ್ನರ್‌ ಅವರ ಪ್ರಚಂಡ ಫಾರ್ಮ್ಗೆ ಸಾಕ್ಷಿ. ಕಳೆದ 11 ಇನ್ನಿಂಗ್ಸ್‌ಗಳಲ್ಲಿ ವಾರ್ನರ್‌ ಹೊಡೆದ ಶತಕಗಳ ಸಂಖ್ಯೆ 6ಕ್ಕೆ ಏರಿದೆ. 2016ರ ಜನವರಿಯಿಂದೀಚೆ ಆಡಿದ 28 ಪಂದ್ಯಗಳಿಂದ 1,755 ರನ್‌ ಪೇರಿಸಿದ ಹೆಗ್ಗಳಿಕೆ ಈ ಆಸೀಸ್‌ ಕ್ರಿಕೆಟಿಗನದ್ದು. ದ್ವಿತೀಯ ಸ್ಥಾನಿ ಡಿ ವಿಲಿಯರ್ ಮತ್ತು ವಾರ್ನರ್‌ ನಡುವೆ 19 ಅಂಕಗಳ ಅಂತರವಿದೆ. ಕೊಹ್ಲಿ 852 ಅಂಕ ಹೊಂದಿದ್ದಾರೆ.

ಇಂಗ್ಲೆಂಡ್‌ ವಿರುದ್ಧ 232 ರನ್‌ ಬಾರಿಸಿ ಸರಣಿಶ್ರೇಷ್ಠ ಗೌರವಕ್ಕೆ ಪಾತ್ರರಾದ ಕೇದಾರ್‌ ಜಾಧವ್‌ ಒಮ್ಮೆಲೇ 57 ಮೆಟ್ಟಿಲು ಮೇಲೇರಿದ್ದು, 47ನೇ ಸ್ಥಾನದಲ್ಲಿದ್ದಾರೆ. ಗುರು ವಾರ ವಷ್ಟೇ ಮೊದಲ ಶತಕ ಹೊಡೆದ ಆಸ್ಟ್ರೇಲಿಯದ ಮತ್ತೂಬ್ಬ ಆರಂಭಕಾರ ಟ್ರ್ಯಾವಿಸ್‌ ಹೆಡ್‌ 42 ಸ್ಥಾನಗಳ ಭರ್ಜರಿ ನೆಗೆತದೊಂದಿಗೆ 38ನೇ ಸ್ಥಾನಕ್ಕೆ ಬಂದಿದ್ದಾರೆ. ಇದೇ ಪಂದ್ಯದಲ್ಲಿ ಸೆಂಚುರಿ ದಾಖಲಿಸಿದ ಪಾಕಿಸ್ಥಾನದ ಬಾಬರ್‌ ಆಜಂ ಮೊದಲ ಸಲ ಟಾಪ್‌-10 ಯಾದಿ ಯಲ್ಲಿ ಕಾಣಿಸಿಕೊಂಡಿದ್ದಾರೆ.

ಬೌಲ್ಟ್ ನಂ.1 ಬೌಲರ್‌
ಬೌಲಿಂಗ್‌ ವಿಭಾಗದ ಅಗ್ರಸ್ಥಾನ ನ್ಯೂಜಿಲ್ಯಾಂಡಿನ ಟ್ರೆಂಟ್‌ ಬೌಲ್ಟ್ ಮೊದಲ ಸ್ಥಾನದಲ್ಲಿದ್ದು, 2 ಸ್ಥಾನಗಳ ಭಡ್ತಿ ಪಡೆದ ಮಿಚೆಲ್‌ ಸ್ಟಾರ್ಕ್‌ ಎರಡಕ್ಕೆ ಬಂದು ನಿಂತಿದ್ದಾರೆ. ಟಾಪ್‌-10 ಪಟ್ಟಿಯಲ್ಲಿ ಭಾರತದ ಯಾವುದೇ ಬೌಲರ್‌ಗಳಿಲ್ಲ.

ಏಕದಿನ ಟೀಮ್‌ ರ್‍ಯಾಂಕಿಂಗ್‌ನಲ್ಲಿ ಆಸ್ಟ್ರೇಲಿಯ (120), ದಕ್ಷಿಣ ಆಫ್ರಿಕಾ (116) ಮತ್ತು ಭಾರತ (112) ಮೊದಲ 3 ಸ್ಥಾನದಲ್ಲಿವೆ. ಆಸೀಸ್‌ ವಿರುದ್ಧ ಸರಣಿ ಸೋತ ಪಾಕಿಸ್ಥಾನ 8ನೇ ಸ್ಥಾನದಲ್ಲೇ ಉಳಿದುಕೊಂಡಿದೆ.

ಟಾಪ್‌-10 ಬ್ಯಾಟ್ಸ್‌ಮನ್‌
1. ಡೇವಿಡ್‌ ವಾರ್ನರ್‌ (880) 2. ಎಬಿ ಡಿ ವಿಲಿಯರ್ (861) 3. ವಿರಾಟ್‌ ಕೊಹ್ಲಿ (852)
4. ಕ್ವಿಂಟನ್‌ ಡಿ ಕಾಕ್‌ (779)
5. ಕೇನ್‌ ವಿಲಿಯಮ್ಸನ್‌ (770)
6. ಜೋ ರೂಟ್‌ (753)
7. ಹಾಶಿಮ್‌ ಆಮ್ಲ (748)
8. ಸ್ಟೀವನ್‌ ಸ್ಮಿತ್‌ (740)
9. ಮಾರ್ಟಿನ್‌ ಗಪ್ಟಿಲ್‌ (735)
10. ಬಾಬರ್‌ ಆಜಂ (733)

ಟಾಪ್‌-10 ಬೌಲರ್
1. ಟ್ರೆಂಟ್‌ ಬೌಲ್ಟ್ (718)
2. ಮಿಚೆಲ್‌ ಸ್ಟಾರ್ಕ್‌ (713)
3. ಇಮ್ರಾನ್‌ ತಾಹಿರ್‌ (712)
4. ಸುನೀಲ್‌ ನಾರಾಯಣ್‌ (711)
5. ಹ್ಯಾಝಲ್‌ವುಡ್‌ (672)
6. ಶಕಿಬ್‌ ಅಲ್‌ ಹಸನ್‌ (643)
7. ಮ್ಯಾಟ್‌ ಹೆನ್ರಿ (641)
8. ಕ್ಯಾಗಿಸೊ ರಬಾಡ (628)
9. ಆದಿಲ್‌ ರಶೀದ್‌ (628)
10. ಮೊಹಮ್ಮದ್‌ ನಬಿ (619)