ವೇಗಿ ಭುವನೇಶ್ವರ್‌ ಕುಮಾರ್‌ ಗೆ ಲಂಡನ್‌ನಲ್ಲಿ ಶಸ್ತ್ರಚಿಕಿತ್ಸೆ

Team Udayavani, Jan 17, 2020, 3:36 PM IST

ನವದೆಹಲಿ: ಖ್ಯಾತ ಬೌಲರ್‌ ಭುವನೇಶ್ವರ್‌ ಕುಮಾರ್‌ ಲಂಡನ್‌ನಲ್ಲಿ ಹರ್ನಿಯಾ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದಾರೆ. ಅಲ್ಲಿಂದ ಬಂದ ನಂತರ ಬೆಂಗಳೂರಿನಲ್ಲಿರುವ ರಾಷ್ಟ್ರೀಯ ಕ್ರಿಕೆಟ್‌ ಅಕಾಡೆಮಿ (ಎನ್‌ಸಿಎ) ಪುನಶ್ಚೇತನ ತರಬೇತಿ ಶಿಬಿರಕ್ಕೆ ಭುವನೇಶ್ವರ್‌ ಕುಮಾರ್‌ ವಾಪಸ್‌ ಆಗಲಿದ್ದಾರೆ ಎಂದು ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ ತಿಳಿಸಿದೆ.

ಸದ್ಯ ಭುವನೇಶ್ವರ್‌ ಕುಮಾರ್‌ ಆರೋಗ್ಯ ಯಾವಾಗ ಸುಧಾರಿಸಿಕೊಳ್ಳಲಿದೆ ಎನ್ನುವ ಬಗ್ಗೆ ಖಚಿತ ಮಾಹಿತಿ ಸಿಕ್ಕಿಲ್ಲವಾದರೂ ಐಪಿಎಲ್‌ ಟಿ20 ಕೂಟದ ವೇಳೆ ಅವರು ಸುಧಾರಿಸಿಕೊಂಡು ಮತ್ತೆ ಕಣಕ್ಕೆ ಇಳಿಯುವ ನಿರೀಕ್ಷೆ ಇದೆ. ಭುವನೇಶ್ವರ್‌ ಕುಮಾರ್ ಗಾಯಗೊಂಡಿರುವುದರಿಂದ ಮುಂಬರುವ ನ್ಯೂಜಿಲೆಂಡ್‌ ವಿರುದ್ಧದ ಟಿ20 ಸರಣಿಗೆ ಆಯ್ಕೆ ಆಗಿಲ್ಲ.

29 ವರ್ಷದ ಭುವನೇಶ್ವರ್‌ ಕುಮಾರ್‌ ಭಾರತ ಪರ 21 ಟೆಸ್ಟ್‌, 114 ಏಕದಿನ ಹಾಗೂ 43 ಟಿ20 ಪಂದ್ಯವನ್ನಾಡಿದ್ದಾರೆ.