5 ಕಿ.ಮೀ. ಓಟ ಜೋಶುವ ಶೆಪ್ಟೆಗೆ ವಿಶ್ವದಾಖಲೆ

Team Udayavani, Feb 17, 2020, 6:15 AM IST

ಮೊನಾಕೊ: ಉಗಾಂಡದ ಜೋಶುವ ಶೆಪ್ಟೆಗೆ 5 ಕಿ.ಮೀ. ಓಟದಲ್ಲಿ ನೂತನ ವಿಶ್ವದಾಖಲೆ ಬರೆದಿದ್ದಾರೆ. ರವಿವಾರ ಮೊನಾಕೊದಲ್ಲಿ ನಡೆದ ಈ ಸ್ಪರ್ಧೆಯನ್ನು ಅವರು 12 ನಿಮಿಷ, 51 ಸೆಕೆಂಡ್‌ಗಳಲ್ಲಿ ಕ್ರಮಿಸಿ ಈ ಸಾಧನೆಗೈದರು.

10 ಸಾವಿರ ಮೀ. ಓಟದಲ್ಲಿ ವಿಶ್ವದಾಖಲೆ ಹೊಂದಿರುವ ಶೆಪ್ಟೆಗೆ, ಕೀನ್ಯದ ರೋನೆಕ್ಸ್‌ ಕಿಪ್ರುಟೊ ಅವರ ದಾಖಲೆಯನ್ನು ಮುರಿದರು. ಕಳೆದ ತಿಂಗಳಷ್ಟೇ ವೆಲೆನ್ಸಿಯಾ ಕೂಟದಲ್ಲಿ ಕಿಪ್ರುಟೊ 13 ನಿಮಿಷ, 18 ಸೆಕೆಂಡ್‌ಗಳಲ್ಲಿ ಈ ದೂರವನ್ನು ಪೂರೈಸಿ ವಿಶ್ವದಾಖಲೆ ಸ್ಥಾಪಿಸಿದ್ದರು.

“ನಿಜಕ್ಕೂ ಇದು ಮಹಾನ್‌ ಸಾಧನೆ. 13 ನಿಮಿಷಗಳ ಒಳಗೆ ಈ ದೂರವನ್ನು ಪೂರ್ತಿಗೊಳಿಸಬೇಕು ಎಂದು ನಿರ್ಧರಿಸಿದ್ದೆ. ಆದರೆ ಇದಕ್ಕೂ ಮುಂಚಿತವಾಗಿ ಗುರಿ ಮುಟ್ಟಿದೆ. ಒಲಿಂಪಿಕ್ಸ್‌ನಲ್ಲಿ ಇಂಥದೇ ಸಾಧನೆ ಮಾಡಬೇಕಿದೆ’ ಎಂದು 23ರ ಹರೆಯದ ಶೆಪ್ಟೆಗೆ ಹೇಳಿದರು.

2016ರ ರಿಯೋ ಒಲಿಂಪಿಕ್ಸ್‌ನಲ್ಲಿ 5 ಸಾವಿರ ಮೀ. ಹಾಗೂ 10 ಸಾವಿರ ಮೀ. ಓಟಗಳೆರಡರಲ್ಲೂ ಪ್ರತಿನಿಧಿಸಿದ್ದ ಜೋಶುವ ಶೆಪ್ಟೆಗೆ ಕ್ರಮವಾಗಿ 8ನೇ ಹಾಗೂ 6ನೇ ಸ್ಥಾನ ಪಡೆದಿದ್ದರು.