ಪಾಕ್‌ ಶರಣು:ಇಂದು ಭಾರತ-ಬಾಂಗ್ಲಾದೇಶ ಫೈನಲ್‌

Team Udayavani, Jun 10, 2018, 9:54 AM IST

ಕೌಲಾಲಂಪುರ: ಹಿಂದಿನ ಆರೂ ಏಶ್ಯ ಕಪ್‌ ಕ್ರಿಕೆಟ್‌ ಪಂದ್ಯಾವಳಿಯಲ್ಲಿ ಚಾಂಪಿಯನ್‌ ಆಗಿರುವ ಭಾರತದ ವನಿತಾ ಕ್ರಿಕೆಟ್‌ ತಂಡ 7ನೇ ಪ್ರಶಸ್ತಿ ಗುರಿಯೊಂದಿಗೆ ಮತ್ತೂಮ್ಮೆ ಫೈನಲ್‌ ಪ್ರವೇಶಿಸಿದೆ.

ರವಿವಾರದ ಪ್ರಶಸ್ತಿ ಸಮರದಲ್ಲಿ ಹರ್ಮನ್‌ಪ್ರೀತ್‌ ಕೌರ್‌ ಬಳಗ ಬಾಂಗ್ಲಾದೇಶವನ್ನು ಎದುರಿಸಲಿದೆ. ಪಾಕಿಸ್ಥಾನವನ್ನು ಮೀರಿಸಿ ದ್ವಿತೀಯ ಸ್ಥಾನಿಯಾದ ಬಾಂಗ್ಲಾದೇಶಕ್ಕೆ ಇದು ಮೊದಲ ಏಶ್ಯ ಕಪ್‌ ಫೈನಲ್‌ ಎಂಬುದು ವಿಶೇಷ.

ಶನಿವಾರದ ಕೊನೆಯ ಲೀಗ್‌ ಪಂದ್ಯದಲ್ಲಿ ಭಾರತ 7 ವಿಕೆಟ್‌ಗಳಿಂದ ಪಾಕಿಸ್ಥಾನವನ್ನು ಮಣಿಸಿತು. ಇನ್ನೊಂದು ಪಂದ್ಯದಲ್ಲಿ ಬಾಂಗ್ಲಾದೇಶ 70 ರನ್ನುಗಳಿಂದ ಆತಿಥೇಯ ಮಲೇಶ್ಯಕ್ಕೆ ಆಘಾತವಿಕ್ಕಿತು. ಭಾರತ ಮತ್ತು ಬಾಂಗ್ಲಾದೇಶಗಳೆರಡೂ ತಲಾ 8 ಅಂಕ ಹೊಂದಿದ್ದರೂ ರನ್‌ರೇಟ್‌ನಲ್ಲಿ ಭಾರತವೇ ಅಗ್ರಸ್ಥಾನ ಕಾಯ್ದುಕೊಂಡಿತು.

ಲೀಗ್‌ ಹಂತದಲ್ಲಿ ಭಾರತ ತಂಡ ಬಾಂಗ್ಲಾದೇಶ ವಿರುದ್ಧ 7 ವಿಕೆಟ್‌ಗಳ ಸೋಲನುಭವಿಸಿತ್ತು. ಇದಕ್ಕೆ ಸೇಡು ತೀರಿಸಿಕೊಳ್ಳುವ ಅಪೂರ್ವ ಅವಕಾಶವೊಂದು ಕೌರ್‌ ಪಡೆಗೆ ಎದುರಾಗಿದೆ.

ಪಾಕ್‌ ಗಳಿಸಿದ್ದು ಬರೀ 72 ರನ್‌
ಶನಿವಾರದ ಲೀಗ್‌ ಪಂದ್ಯದಲ್ಲಿ ಭಾರತದ ಬಿಗಿಯಾದ ಬೌಲಿಂಗ್‌ ದಾಳಿಗೆ ತತ್ತರಿಸಿದ ಪಾಕಿಸ್ಥಾನಕ್ಕೆ ಗಳಿಸಲು ಸಾಧ್ಯವಾದದ್ದು 7 ವಿಕೆಟಿಗೆ 72 ರನ್‌ ಮಾತ್ರ. ಭಾರತ 16.1 ಓವರ್‌ಗಳಲ್ಲಿ 3 ವಿಕೆಟಿಗೆ 75 ರನ್‌ ಮಾಡಿ ತನ್ನ 4ನೇ ಗೆಲುವು ಸಾಧಿಸಿತು.

ಪಾಕ್‌ ಸರದಿಯಲ್ಲಿ ಎರಡಂಕೆಯ ಗಡಿ ದಾಟಿದ್ದು ಸನಾ ಮಿರ್‌ (ಔಟಾಗದೆ 20) ಮತ್ತು ನಹಿದಾ ಖಾನ್‌ (18) ಮಾತ್ರ. ಏಕ್ತಾ ಬಿಷ್ಟ್ 4 ಓವರ್‌ಗಳ ಕೋಟಾದಲ್ಲಿ 14 ರನ್ನಿಗೆ 3 ವಿಕೆಟ್‌ ಕಿತ್ತು ಹೆಚ್ಚಿನ ಯಶಸ್ಸು ಸಾಧಿಸಿದರು. ಪೂನಂ ಯಾದವ್‌ (11ಕ್ಕೆ 1), ದೀಪ್ತಿ ಶರ್ಮ (13ಕ್ಕೆ 1), ಶಿಖಾ ಪಾಂಡೆ (6ಕ್ಕೆ 1) ಬೌಲಿಂಗ್‌ ಕೂಡ ಅಮೋಘ ಮಟ್ಟದಲ್ಲಿತ್ತು. ಒಟ್ಟು 69 ಡಾಟ್‌ ಬಾಲ್‌ ಎಸೆದ ಭಾರತ, ಎದುರಾಳಿಗೆ ಬಿಟ್ಟುಕೊಟ್ಟ ಬೌಂಡರಿ ಕೇವಲ 4.

ಚೇಸಿಂಗ್‌ ವೇಳೆ ಮಿಥಾಲಿ ರಾಜ್‌ ಮತ್ತು ದೀಪ್ತಿ ಶರ್ಮ ಅವರನ್ನು ಶೂನ್ಯಕ್ಕೆ ಕಳೆದುಕೊಂಡ ಭಾರತಕ್ಕೂ ಕುಸಿತದ ಭೀತಿ ಎದುರಾಯಿತು. ಇವರಿಬ್ಬರ ವಿಕೆಟ್‌ 5 ರನ್‌ ಆಗುವಷ್ಟರಲ್ಲಿ ಉರುಳಿತು. ಆದರೆ 3ನೇ ವಿಕೆಟಿಗೆ ಜತೆಯಾದ ಸ್ಮತಿ ಮಂಧನಾ (38) ಮತ್ತು ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ (ಔಟಾಗದೆ 34) ಜವಾಬ್ದಾರಿಯುತ ಆಟವಾಡಿ 65 ರನ್‌ ಪೇರಿಸಿದರು. ಗೆಲುವಿಗೆ ಇನ್ನೇನು 3 ರನ್‌ ಅಗತ್ಯವಿರುವಾಗ ಮಂಧನಾ ವಿಕೆಟ್‌ ಬಿತ್ತು.

ಸಂಕ್ಷಿಪ್ತ ಸ್ಕೋರ್‌: ಪಾಕಿಸ್ಥಾನ-20 ಓವರ್‌ಗಳಲ್ಲಿ 7 ವಿಕೆಟಿಗೆ 72 (ಸನಾ ಮಿರ್‌ ಔಟಾಗದೆ 20, ನಹಿದಾ 18, ಏಕ್ತಾ 14ಕ್ಕೆ 3). ಭಾರತ-16.1 ಓವರ್‌ಗಳಲ್ಲಿ 3 ವಿಕೆಟಿಗೆ 75 (ಮಂಧನಾ 38, ಕೌರ್‌ ಔಟಾಗದೆ 34).

ಪಂದ್ಯಶ್ರೇಷ್ಠ: ಏಕ್ತಾ ಬಿಷ್ಟ್