ಟಿ20: ಪಾಕ್‌ ಗೆಲುವಿನ ಆರಂಭ

Team Udayavani, Oct 28, 2017, 6:15 AM IST

ಅಬುದಾಭಿ: ಏಕದಿನ ಸರಣಿಯಲ್ಲಿ ವೈಟ್‌ವಾಶ್‌ ಸಂಕಟಕ್ಕೆ ಸಿಲುಕಿದ ಶ್ರೀಲಂಕಾ, ಟಿ20 ಸರಣಿಯಲ್ಲೂ ಪಾಕಿಸ್ಥಾನದ ವಿರುದ್ಧ ಸೋಲಿನ ಆರಂಭ ಪಡೆದಿದೆ. ಗುರುವಾರ ರಾತ್ರಿ ಅಬುದಾಭಿಯಲ್ಲಿ ಶೋಚನೀಯ ಬ್ಯಾಟಿಂಗ್‌ ಪ್ರದರ್ಶಿಸಿದ ಲಂಕಾ ಪಡೆ 7 ವಿಕೆಟ್‌ಗಳಿಂದ ಎಡವಿದೆ.

ಟಾಸ್‌ ಸೋತು ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಶ್ರೀಲಂಕಾ 18.3 ಓವರ್‌ಗಳಲ್ಲಿ 102 ರನ್ನಿಗೆ ಸರ್ವಪತನ ಕಂಡಿತು. ಜವಾಬಿತ್ತ ಪಾಕಿಸ್ಥಾನ 17.2 ಓವರ್‌ಗಳಲ್ಲಿ 3 ವಿಕೆಟಿಗೆ 103 ರನ್‌ ಮಾಡಿ 3 ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿತು.

ಪಾಕಿಸ್ಥಾನದ ನೂತನ ಬೌಲಿಂಗ್‌ ಅಸ್ತ್ರವಾಗಿರುವ ಎಡಗೈ ವೇಗಿ ಉಸ್ಮಾನ್‌ ಖಾನ್‌ 4 ಓವರ್‌ಗಳ ಕೋಟಾದಲ್ಲಿ 20 ರನ್ನಿತ್ತು 2 ವಿಕೆಟ್‌ ಹರಿಸಿದರೆ, ಮತ್ತೂಬ್ಬ ವೇಗಿ ಹಸನ್‌ ಅಲಿ 23 ರನ್‌ ನೀಡಿ 3 ವಿಕೆಟ್‌ ಕಿತ್ತರು. ಆಫ್ಸ್ಪಿನ್‌ ಆಲ್‌ರೌಂಡರ್‌ ಮೊಹಮ್ಮದ್‌ ಹಫೀಜ್‌ ಕೇವಲ 10 ರನ್‌ ನೀಡಿ ಇಬ್ಬರನ್ನು ಪೆವಿಲಿಯನ್ನಿಗೆ ಅಟ್ಟಿದರು. ಉಸ್ಮಾನ್‌ ಖಾನ್‌ ಅವರಿಗೆ ಪಂದ್ಯಶ್ರೇಷ್ಠ ಗೌರವ ಒಲಿಯಿತು.

ಪಾಕಿಸ್ಥಾನದ ಬೌಲಿಂಗ್‌ ಸರದಿಯಲ್ಲಿ 6 ಮಂದಿ ದಾಳಿಗಿಳಿದು ಲಂಕಾ ಮೇಲೆ ಮುಗಿಬಿದ್ದರು. ಎಲ್ಲರೂ ವಿಕೆಟ್‌ ಕೀಳುವಲ್ಲಿ ಯಶಸ್ವಿಯಾದರು. ಇಮಾದ್‌ ವಾಸಿಮ್‌, ಫಾಹಿಮ್‌ ಅಶ್ರಫ್ ಮತ್ತು ಶಾದಾಬ್‌ ಖಾನ್‌ ಅವರಿಗೆ ಒಂದೊಂದು ವಿಕೆಟ್‌ ಲಭಿಸಿತು.

ಪಂದ್ಯದ 3ನೇ ಎಸೆತದಲ್ಲೇ ಮುನವೀರ (0) ವಿಕೆಟ್‌ ಕಳೆದುಕೊಂಡ ಶ್ರೀಲಂಕಾ, ಅನಂತರ ಸ್ವಲ್ಪ ಚೇತರಿಕೆಯ ಆಟವಾಡಿತು. 9ನೇ ಓವರ್‌ ವೇಳೆ ಎರಡೇ ವಿಕೆಟಿಗೆ 51 ರನ್‌ ಗಳಿಸಿ ಹೋರಾಟದ ಸೂಚನೆ ನೀಡಿತು. ಆದರೆ ಇಲ್ಲಿಂದ ಮೊದಲ್ಗೊಂಡ ಕುಸಿತ ನಿಲ್ಲಲೇ ಇಲ್ಲ. ಲಂಕಾ ಪರ ಕೀಪರ್‌ ಸಮರವಿಕ್ರಮ ಮತ್ತು ಸಿಕ್ಕುಗೆ ಪ್ರಸನ್ನ ತಲಾ 23 ರನ್‌ ಹೊಡೆದರು.

ಪಾಕಿಸ್ಥಾನದ 2 ವಿಕೆಟ್‌ 18 ರನ್ನಿಗೆ ಬಿತ್ತಾದರೂ ಶೋಯಿಬ್‌ ಮಲಿಕ್‌ (ಔಟಾಗದೆ 42) ಮತ್ತು ಮೊಹಮ್ಮದ್‌ ಹಫೀಜ್‌ (ಔಟಾಗದೆ 25) ತಂಡವನ್ನು ಸುರಕ್ಷಿತವಾಗಿ ದಡ ಸೇರಿಸಿದರು.

ಸಂಕ್ಷಿಪ್ತ ಸ್ಕೋರ್‌: ಶ್ರೀಲಂಕಾ-18.3 ಓವರ್‌ಗಳಲ್ಲಿ 102 (ಸಮರವಿಕ್ರಮ 23, ಪ್ರಸನ್ನ 23, ಗುಣತಿಲಕ 18, ಅಲಿ 23ಕ್ಕೆ 3, ಉಸ್ಮಾನ್‌ 20ಕ್ಕೆ 2, ಹಫೀಜ್‌ 10ಕ್ಕೆ 2). ಪಾಕಿಸ್ಥಾನ-17.2 ಓವರ್‌ಗಳಲ್ಲಿ 3 ವಿಕೆಟಿಗೆ 103 (ಮಲಿಕ್‌ ಔಟಾಗದೆ 42, ಹಫೀಜ್‌ ಔಟಾಗದೆ 25, ಶೆಹಜಾದ್‌ 22, ವಿಕುಮ್‌ ಸಂಜಯ 20ಕ್ಕೆ 2).

ಪಂದ್ಯಶ್ರೇಷ್ಠ: ಉಸ್ಮಾನ್‌ ಖಾನ್‌.