Paris; ಪ್ಯಾರಾಲಂಪಿಕ್ಸ್‌ ನಲ್ಲಿ 2ನೇ ಚಿನ್ನ; ಬ್ಯಾಡ್ಮಿಂಟನ್‌ ಪದಕ ಗೆದ್ದ ನಿತೇಶ್‌ ಕುಮಾರ್

Team Udayavani, Sep 2, 2024, 5:56 PM IST

ಪ್ಯಾರಿಸ್:‌ ಪ್ಯಾರಿಸ್‌ ನಲ್ಲಿ ನಡೆಯುತ್ತಿರುವ ಪ್ಯಾರಾಲಂಪಿಕ್ಸ್‌ ನಲ್ಲಿ (Paris Paralympics) ಭಾರತದ ನಿತೇಶ್‌ ಕುಮಾರ್‌ (Nitesh Kuamr) ಅವರು ಬ್ಯಾಡ್ಮಿಂಟ್ನ ಸಿಂಗಲ್ಸ್‌ ಎಸ್‌ ಎಲ್3‌ ವಿಭಾಗದಲ್ಲಿ ಚಿನ್ನದ ಪದಕ ಗೆದ್ದುಕೊಂಡಿದ್ದಾರೆ. ಫೈನಲ್‌ ಪಂದ್ಯದಲ್ಲಿ ಅಗ್ರ ಶ್ರೇಯಾಂಕದ ನಿತೇಶ್‌ ಕುಮಾರ್‌ ಅವರು ಗ್ರೇಟ್‌ ಬ್ರಿಟನ್‌ ನ ಡೇನಿಯಲ್‌ ಬಿಥೆಲ್‌ ಅವರನ್ನು ಸೋಲಿಸಿ ಚಿನ್ನದ ಪದಕ ಗೆದ್ದುಕೊಂಡರು.

ಲಾ ಚಾಪೆಲ್ಲೆ ಅರೆನಾ ಕೋರ್ಟ್ 1ನಲ್ಲಿ ಅತ್ಯಂತ ರೋಚಕವಾಗಿ ನಡೆದ ಫೈನಲ್‌ ಪಂದ್ಯದಲ್ಲಿ ನಿತೇಶ್‌ ಕುಮಾರ್‌ ಅವರು 21-14, 18-21, 23-21 ಅಂತರದಿಂದ ಗೆಲುವು ಸಾಧಿಸಿದರು.

ಈ ಆಟಕ್ಕೂ ಮೊದಲು ನಿತೇಶ್‌ ಕುಮಾರ್‌ ಅವರು ಬೆಥೆಲ್ ವಿರುದ್ಧ 9 ಬಾರಿ ಆಡಿದ್ದರು, ಆದರೆ ಅವರ ಸಂಪೂರ್ಣ ವೃತ್ತಿಜೀವನದಲ್ಲಿ ಎಂದಿಗೂ ಸೋಲಿಸಿರಲಿಲ್ಲ. ಆದರೆ ಇಂದಿನ ಫೈನಲ್‌ ನಲ್ಲಿ ಸೋಲಿನ ಸರಪಣಿ ಕಳಚಿದರು.

ನಿತೇಶ್ ಅವರ ಚಿನ್ನವು ಪ್ಯಾರಿಸ್ ಪ್ಯಾರಾಲಿಂಪಿಕ್ಸ್‌ ನಲ್ಲಿ ಭಾರತಕ್ಕೆ ಸಿಕ್ಕಿದ ಒಂಬತ್ತನೇ ಪದಕವಾಗಿದೆ. ಕೂಟದಲ್ಲಿ ಭಾರತದ ಎರಡನೇ ಚಿನ್ನದ ಪದಕವಾಗಿದೆ. ನಿತೇಶ್‌ ಗಿಂತ ಮೊದಲು ಶೂಟರ್ ಅವನಿ ಲೆಖರಾ ಚಿನ್ನದ ಪದಕ ಗೆದ್ದಿದ್ದರು.

2009 ರಲ್ಲಿ ನಿತೇಶ್ ಕುಮಾರ್ ಅವರು ಅಪಘಾತದಲ್ಲಿ ಗಾಯಗೊಂಡಿದ್ದರು. ತಿಂಗಳುಗಟ್ಟಲೆ ಹಾಸಿಗೆ ಹಿಡಿದಿದ್ದ ಅವರು ಓದು ಮುಂದುವರಿಸಿದರು. ಒಂದು ವರ್ಷ ರಜೆ ತೆಗೆದುಕೊಂಡು ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಐಐಟಿ) ಪ್ರವೇಶ ಪರೀಕ್ಷೆಗಳಿಗೆ ತಯಾರಿ ನಡೆಸಿದರು. ಅವರು 2013 ರಲ್ಲಿ IIT ಮಂಡಿಗೆ ಪ್ರವೇಶ ಪಡೆದರು. ಈ ಸಮಯದಲ್ಲಿ ಅವರು ನಿತೇಶ್ ಕುಮಾರ್ ಬ್ಯಾಡ್ಮಿಂಟನ್‌‌ ನಲ್ಲಿ ಆಸಕ್ತಿಯನ್ನು ಬೆಳೆಸಿಕೊಂಡರು.