Paris; ಹಾಕಿಯಲ್ಲಿ ಭಾರತದ ವಿಕ್ರಮ; ಶೂಟೌಟ್‌ ಬ್ರಿಟನ್‌ ವಿರುದ್ದ ಗೆದ್ದು ಸೆಮಿಗೆ ಎಂಟ್ರಿ

Team Udayavani, Aug 4, 2024, 3:48 PM IST

ಪ್ಯಾರಿಸ್:‌ ಅತ್ಯಂತ ರೋಮಾಂಚನಕಾರಿಯಾಗಿ ಸಾಗಿದ ಭಾರತ ಮತ್ತು ಗ್ರೇಟ್‌ ಬ್ರಿಟನ್‌ ನಡುವಿನ ಹಾಕಿ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಭಾರತ ಗೆಲುವು ಸಾಧಿಸಿದೆ. ಈ ಮಹತ್ವದ ಗೆಲುವಿನೊಂದಿಗೆ ಭಾರತವು ಒಲಿಂಪಿಕ್ಸ್‌ ಕೂಟದ ಸೆಮಿ ಫೈನಲ್‌ ಗೆ ಎಂಟ್ರಿ ಪಡೆದಿದೆ.

ಪಂದ್ಯವು 1-1ರಿಂದ ಸಮನಾದ ಬಳಿಕ ಫಲಿತಾಂಶಕ್ಕಾಗಿ ಶೂಟೌಟ್‌ ಮೊರೆ ಹೋಗಲಾಯಿತು. ಕೊನೆಯ ಒಲಿಂಪಿಕ್‌ ಆಡುತ್ತಿರುವ ಭಾರತದ ಗೋಲ್‌ ಕೀಪರ್ ಪಿಆರ್ ಶ್ರೀಜೇಶ್ ಪೆನಾಲ್ಟಿ ಶೂಟೌಟ್‌ನಲ್ಲಿ ಹೀರೋ ಆದರು. ಭಾರತವು ಶೂಟೌಟ್‌ನಲ್ಲಿ ಗ್ರೇಟ್ ಬ್ರಿಟನ್ ತಂಡವನ್ನು 4-2 ಗೋಲುಗಳಿಂದ ಸೋಲಿಸಿ ಸತತ ಎರಡನೇ ಒಲಿಂಪಿಕ್‌ ಸೆಮಿ ಫೈನಲ್‌ ಪ್ರವೇಶ ಮಾಡಿತು.

ಟೋಕಿಯೊ 2020ರ ಒಲಿಂಪಿಕ್ಸ್‌ ನಲ್ಲಿ ಭಾರತವು ಕಂಚಿನ ಪದಕ ಗೆದ್ದುಕೊಂಡಿತ್ತು. ಈ ಬಾರಿಯ ಪುರುಷರ ಹಾಕಿ ಸ್ಪರ್ಧೆಯ ಸೆಮಿಫೈನಲ್‌ ಮಂಗಳವಾರ(ಆಗಸ್ಟ್ 6) ನಡೆಯಲಾಯಿತು.

17ನೇ ನಿಮಿಷದಲ್ಲಿ ಭಾರತದ ಅಮಿತ್‌ ರೋಹಿದಾಸ್‌ ಗೆ ರೆಡ್‌ ಕಾರ್ಡ್‌ ನೀಡಲಾಯಿತು. 22ನೇ ನಿಮಿಷದಲ್ಲಿ ಭಾರತದ ನಾಯಕ ಹರ್ಮನ್‌ ಪ್ರೀತ್‌ ಸಿಂಗ್‌ ಮೊದಲ ಗೋಲು ಬಾರಿಸಿ ಭಾರತಕ್ಕೆ ಮುನ್ನಡೆ ಒದಗಿಸಿದರು. 27ನೇ ನಿಮಿಷದಲ್ಲಿ ಬ್ರಿಟನ್ ನ ಲೀ ಮೊರ್ಟನ್‌ ಗೋಲು ಬಾರಿಸಿ 1-1ರ ಸಮಬಲಕ್ಕೆ ತಂದರು. ಒಂದು ಕಡಿಮೆ ಸದಸ್ಯರೊಂದಿಗೆ ಆಡಿದ ಭಾರತವು ಭಾರೀ ಪೈಪೋಟಿಯ ಹೊರತಾಗಿಯೂ ಬಳಿಕ ಬ್ರಿಟನ್‌ ಗೆ ಗೋಲು ಬಾರಿಸಲು ಅವಕಾಶ ನೀಡಲಿಲ್ಲ.

ಪೆನಾಲ್ಟಿ ಶೂಟೌಟ್‌ ನಲ್ಲಿ ಭಾರತದ ಪರ ಹರ್ಮನ್‌ಪ್ರೀತ್, ಲಲಿತ್, ಸುಖಜೀತ್, ಅಭಿಷೇಕ್ ಮತ್ತು ರಾಜ್‌ಕುಮಾರ್ ಗೋಲು ಬಾರಿಸಿದರು. ಬ್ರಿಟನ್‌ ಪರ ಜೇಮಸ್‌ ಆಲ್ಬೆ, ವಾಲಸ್‌ ಗೋಲು ಬಾರಿಸಿದರು. ಆದರೆ ನಂತರದ ಎರಡು ಗೋಲುಗಳನ್ನು ತಡೆದ ಶ್ರೀಜೆಶ್‌ ಭಾರತಕ್ಕೆ ಹೀರೋ ಆಗಿ ಮೂಡಿ ಬಂದರು.

ಅರ್ಜೈಂಟಿನಾ ಮತ್ತು ಜರ್ಮನಿ ನಡುವಿನ ಪಂದ್ಯದಲ್ಲಿ ಗೆದ್ದವರ ವಿರುದ್ದ ಭಾರತ ಸೆಮಿ ಫೈನಲ್‌ ಆಡಲಿದೆ.