Champions Trophy ಸ್ಥಳಾಂತರ ಸುದ್ದಿಯನ್ನು ತಳ್ಳಿಹಾಕಿದ ಪಿಸಿಬಿ

Team Udayavani, Jan 11, 2025, 6:20 AM IST

ಲಾಹೋರ್‌: ಕ್ರಿಕೆಟ್‌ ಸ್ಟೇಡಿಯಂಗಳಿನ್ನೂ ಸಜ್ಜುಗೊಳ್ಳದ ಕಾರಣ ಐಸಿಸಿ ಚಾಂಪಿಯನ್ಸ್‌ ಟ್ರೋಫಿ ಪಂದ್ಯಾವಳಿ ಸ್ಥಳಾಂತರಗೊಳ್ಳಲಿದೆ ಎಂಬ ಮಾಧ್ಯಮಗಳ ವರದಿಗೆ ಪಾಕಿಸ್ಥಾನ ಕ್ರಿಕೆಟ್‌ ಮಂಡಳಿ ಕಿಡಿಕಾರಿದೆ, ಇದರಲ್ಲಿ ಯಾವುದೇ ಹುರುಳಿಲ್ಲ ಎಂದಿದೆ.

ಚಾಂಪಿಯನ್ಸ್‌ ಟ್ರೋಫಿ ಕ್ರಿಕೆಟ್‌ ಟೂರ್ನಿಯ ಪಂದ್ಯಗಳು ಲಾಹೋರ್‌ನ ಗದ್ದಾಫಿ ಸ್ಟೇಡಿಯಂ, ಕರಾಚಿಯ ನ್ಯಾಶನಲ್‌ ಸ್ಟೇಡಿಯಂ ಹಾಗೂ ರಾವಲ್ಪಿಂಡಿ ಕ್ರಿಕೆಟ್‌ ಸ್ಟೇಡಿಯಂನಲ್ಲಿ ನಡೆಯಲಿದೆ. ಆದರೆ ಈ ಮೂರೂ ಕ್ರೀಡಾಂಗಣಗಳ ನವೀಕರಣ ಕಾಮಗಾರಿ ನಡೆಯುತ್ತಿದ್ದು, ಇನ್ನೂ ಕುಂಟುತ್ತಲೇ ಇದೆ. ಅರೆಬರೆ ಕಾಮಗಾರಿಯ ದೃಶ್ಯಾವಳಿ ಇತ್ತೀಚೆಗೆ ವೈರಲ್‌ ಆಗಿತ್ತು.

“ಚಾಂಪಿಯನ್ಸ್‌ ಟ್ರೋಫಿ ಕ್ರಿಕೆಟ್‌ ಪಂದ್ಯಾವಳಿ ನಮ್ಮ ಪಾಲಿನ ಪ್ರತಿಷ್ಠೆ. ಸ್ಟೇಡಿಯಂಗಳ ಆಧುನೀಕರಣಕ್ಕೆ ನಾವು 12 ಬಿಲಿಯನ್‌ ರೂ. ಮೊತ್ತವನ್ನು ವ್ಯಯಿಸುತ್ತಿದ್ದೇವೆ. ಪಿಸಿಬಿಯೇ ಮುಂದು ನಿಂತು ಇದರ ಉಸ್ತುವಾರಿ ನೋಡಿಕೊಳ್ಳುತ್ತಿದೆ. ಪಂದ್ಯಾವಳಿಗೂ ಮುನ್ನ ಕ್ರೀಡಾಂಗಣಗಳು ಸಜ್ಜಾಗಲಿವೆ. ನಮ್ಮ ಮಾಧ್ಯಮಗಳು ವಾಸ್ತವವನ್ನು ತಿಳಿದುಕೊಳ್ಳದೆಯೇ ವರದಿ ಮಾಡಿದ ಕಾರಣ ಈ ಸ್ಪಷ್ಟನೆ ನೀಡಬೇಕಾಯಿತು’ ಎಂದು ಪಿಸಿಬಿ ತನ್ನ ಪ್ರಕಟನೆಯಲ್ಲಿ ತಿಳಿಸಿದೆ.