Perth Test: ಟೀಂ ಇಂಡಿಯಾಗಿಲ್ಲ ಶುಭಾರಂಭ: ಮೊದಲ ಸೆಶನ್‌ ನಲ್ಲೇ ಪರದಾಡಿದ ಬ್ಯಾಟರ್‌ ಗಳು

Team Udayavani, Nov 22, 2024, 10:14 AM IST

ಪರ್ತ್:‌ ಅತ್ಯಂತ ಚರ್ಚಿತ, ಬಹು ನಿರೀಕ್ಷಿತ ಬಾರ್ಡರ್‌ – ಗಾವಸ್ಕರ್ ಟ್ರೋಫಿ ( Border Gavaskar Trophy) ಸರಣಿ ಆರಂಭವಾಗಿದೆ. ಭಾರತ ಮತ್ತು ಆಸ್ಟ್ರೇಲಿಯಾ ವಿರುದ್ದದ ಟೆಸ್ಟ್‌ ಸರಣಿಯ ಮೊದಲ ಪಂದ್ಯ ಪರ್ತ್‌ ನಲ್ಲಿ ಆರಂಭವಾಗಿದೆ. ಆದರೆ ಮೊದಲ ಸೆಶನ್‌ ನಲ್ಲಿಯೇ ಟೀಂ ಇಂಡಿಯಾ (Team India) ಬ್ಯಾಟರ್‌ ಗಳು ಕ್ರೀಸ್‌ ಕಚ್ಚಿ ನಿಲ್ಲಲು ಪರದಾಡಿದ್ದಾರೆ. ಭೋಜನ ವಿರಾಮದ ವೇಳೆ ಭಾರತ ತಂಡವು ನಾಲ್ಕು ವಿಕೆಟ್‌ ಕಳೆದುಕೊಂಡು 51 ರನ್‌ ಮಾಡಿದೆ.

ಪರ್ತ್‌ ನ ಆಪ್ಟಸ್‌ ಸ್ಟೇಡಿಯಂನಲ್ಲಿ ಮೊದಲು ಬ್ಯಾಟಿಂಗ್‌ ಆಯ್ಕೆ ಮಾಡಿದ ಭಾರತಕ್ಕೆ ನಿರೀಕ್ಷಿತ ಆರಂಭ ಸಿಗಲಿಲ್ಲ. ಕೆಎಲ್‌ ರಾಹುಲ್‌ (KL Rahul) ಜತೆ ಬ್ಯಾಟಿಂಗ್‌ ಆರಂಭಿಸಿದ ಯಶಸ್ವಿ ಜೈಸ್ವಾಲ್‌ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದರು. ಗಾಯಗೊಂಡ ಗಿಲ್‌ ಬದಲಿಗೆ ಅವಕಾಶ ಪಡೆದ ಕನ್ನಡಿಗ ದೇವದತ್ತ ಪಡಿಕ್ಕಲ್‌ ಉತ್ತಮ ರಕ್ಷಣಾತ್ಮಕ ಆಟವಾಡಿದರೂ ರನ್‌ ಗಳಿಸಲು ಸಾಧ್ಯವಾಗಲಿಲ್ಲ. 23 ಎಸೆತ ಎದುರಿಸಿದ ಪಡಿಕ್ಕಲ್‌ ಶೂನ್ಯಕ್ಕೆ ಕ್ಯಾಚಿತ್ತು ಔಟಾದರು.

ಒಂದೆಡೆ ವಿಕೆಟ್‌ ಉರುಳುತ್ತಿದ್ದರೂ ಉತ್ತಮವಾಗಿ ಆಡುತ್ತಿದ್ದ ಕೆಎಲ್‌ ರಾಹುಲ್‌ 26 ರನ್‌ ಗಳಿಸಿದರು. ಉತ್ತಮ ಲಯದಲ್ಲಿ ಕಾಣುತ್ತಿದ್ದ ರಾಹುಲ್‌ 74 ಎಸೆತ ಎದುರಿಸಿ 26 ರನ್‌ ಮಾಡಿ ಸ್ಟಾರ್ಕ್‌ ಎಸೆತಕ್ಕೆ ಔಟಾದರು. ಅನುಭವಿ ವಿರಾಟ್‌ ಮತ್ತೆ ವೈಫಲ್ಯ ಅನುಭವಿಸಿದರು. ಅವರ ಕೊಡುಗೆ ಕೇವಲ ಐದು ರನ್.‌

ಸದ್ಯ 10 ರನ್‌ ಗಳಿಸಿರುವ ಪಂತ್‌ ಮತ್ತು ನಾಲ್ಕು ರನ್‌ ಮಾಡಿರುವ ಧ್ರುವ್‌ ಜುರೆಲ್‌ ಕ್ರೀಸ್‌ ನಲ್ಲಿದ್ದಾರೆ. ಆಸೀಸ್‌ ಪರ ಮಿಚೆಲ್‌ ಸ್ಟಾರ್ಕ್‌ ಮತ್ತು ಜೋಶ್‌ ಹೇಜಲ್‌ ವುಡ್‌ ತಲಾ ಎರಡು ವಿಕೆಟ್‌ ಕಿತ್ತರು.

ಇಬ್ಬರು ಪದಾರ್ಪಣೆ

ಟೀಂ ಇಂಡಿಯಾ ಪರ ಇಂದು ಇಬ್ಬರು ಟೆಸ್ಟ್‌ ಕ್ರಿಕೆಟ್‌ ಗೆ ಪದಾರ್ಪಣೆ ಮಾಡಿದರು. ಆಲ್‌ ರೌಂಡರ್‌ ನಿತೀಶ್‌ ಕುಮಾರ್‌ ರೆಡ್ಡಿ ಮತ್ತು ವೇಗಿ ಹರ್ಷಿತ್‌ ರಾಣಾ ಅವರು ಟೆಸ್ಟ್‌ ಕ್ಯಾಪ್‌ ಪಡೆದರು.

ಅಶ್ವಿನ್-ಜಡ್ಡು ಇಲ್ಲ

ಈ ಪಂದ್ಯಕ್ಕೆ ಭಾರತ ಏಕೈಕ ಸ್ಪಿನ್ನರ್‌ ನೊಂದಿಗೆ ಕಣಕ್ಕಿಳಿದಿದೆ. ಅದು ವಾಷಿಂಗ್ಟನ್‌ ಸುಂದರ್.‌ ಅವರು ಆಲ್‌ ರೌಂಡರ್‌ ರೂಪದಲ್ಲಿ ಆಡುತ್ತಿದ್ದಾರೆ. ಪ್ರಮುಖ ಸ್ಪಿನ್ನರ್‌ ಗಳಾದ ರವಿಚಂದ್ರನ್‌ ಅಶ್ವಿನ್‌ ಮತ್ತು ರವೀಂದ್ರ ಜಡೇಜಾಗೆ ಅವಕಾಶ ನೀಡಲಾಗಿಲ್ಲ.

ತಂಡಗಳು

ಭಾರತ: ಕೆಎಲ್ ರಾಹುಲ್, ಯಶಸ್ವಿ ಜೈಸ್ವಾಲ್, ದೇವದತ್ ಪಡಿಕ್ಕಲ್, ವಿರಾಟ್ ಕೊಹ್ಲಿ, ರಿಷಬ್ ಪಂತ್ (ವಿ.ಕೀ), ಧ್ರುವ್ ಜುರೆಲ್, ನಿತೀಶ್ ರೆಡ್ಡಿ, ವಾಷಿಂಗ್ಟನ್ ಸುಂದರ್, ಹರ್ಷಿತ್ ರಾಣಾ, ಜಸ್ಪ್ರೀತ್ ಬುಮ್ರಾ (ನಾ), ಮೊಹಮ್ಮದ್ ಸಿರಾಜ್.

ಆಸ್ಟ್ರೇಲಿಯಾ: ಉಸ್ಮಾನ್ ಖವಾಜಾ, ನಾಥನ್ ಮೆಕ್‌ಸ್ವೀನಿ, ಮಾರ್ನಸ್ ಲ್ಯಾಬುಶೇನ್, ಸ್ಟೀವನ್ ಸ್ಮಿತ್, ಟ್ರಾವಿಸ್ ಹೆಡ್, ಮಿಚೆಲ್ ಮಾರ್ಷ್, ಅಲೆಕ್ಸ್ ಕ್ಯಾರಿ (ವಿ.ಕೀ), ಪ್ಯಾಟ್ ಕಮಿನ್ಸ್ (ನಾ), ಮಿಚೆಲ್ ಸ್ಟಾರ್ಕ್, ನಾಥನ್ ಲಿಯಾನ್, ಜೋಶ್ ಹ್ಯಾಜಲ್‌ವುಡ್.