ಆಸ್ಟ್ರೇಲಿಯನ್‌ ಓಪನ್‌ ಸೂಪರ್‌-500 ಬ್ಯಾಡ್ಮಿಂಟನ್‌ ಕೂಟ: ಫೈನಲ್‌ನಲ್ಲಿ ಪ್ರಣಯ್‌ ಪರಾಭವ

21-9, 21-23, 22-20ರಿಂದ ಗೆದ್ದ ಚೀನಾದ ವೆಂಗ್‌ ಹಾಂಗ್‌ ಯಾಂಗ್‌

Team Udayavani, Aug 6, 2023, 9:54 PM IST

ಸಿಡ್ನಿ: ಭಾರತದ ಎಚ್‌.ಎಸ್‌. ಪ್ರಣಯ್‌ ಆಸ್ಟ್ರೇಲಿಯನ್‌ ಓಪನ್‌ ಸೂಪರ್‌-500 ಬ್ಯಾಡ್ಮಿಂಟನ್‌ ಕೂಟದ ಪ್ರಶಸ್ತಿಯಿಂದ ವಂಚಿತರಾಗಿ ರನ್ನರ್ ಅಪ್‌ ಸ್ಥಾನಕ್ಕೆ ತೃಪ್ತಿಪಟ್ಟಿದ್ದಾರೆ. ಭಾನುವಾರದ ತ್ರೀ ಗೇಮ್‌ ಥ್ರಿಲ್ಲರ್‌ ಫೈನಲ್‌ನಲ್ಲಿ ಚೀನಾದ ವೆಂಗ್‌ ಹಾಂಗ್‌ ಯಾಂಗ್‌ ವಿರುದ್ಧ ಪ್ರಣಯ್‌ 9-21, 23-21, 20-22 ಅಂತರದಿಂದ ಪರಾಭವಗೊಂಡರು.

ಇದರೊಂದಿಗೆ ಕಳೆದ ಮೇ ತಿಂಗಳಲ್ಲಿ ನಡೆದ “ಮಲೇಷ್ಯಾ ಮಾಸ್ಟರ್” ಪಂದ್ಯಾವಳಿಯ ಫೈನಲ್‌ನಲ್ಲಿ ಪ್ರಣಯ್‌ ವಿರುದ್ಧ ಅನುಭವಿಸಿದ ಸೋಲಿಗೆ ವೆಂಗ್‌ ಹಾಂಗ್‌ ಯಾಂಗ್‌ ಸೇಡು ತೀರಿಸಿಕೊಂಡಂತಾಯಿತು. ಇವರಿಬ್ಬರ ನಡುವಿನ 2 ಪಂದ್ಯಗಳ ಫ‌ಲಿತಾಂಶವೀಗ 1-1ರಿಂದ ಸಮನಾಗಿದೆ.

ಮೊದಲ ಗೇಮ್‌ನಲ್ಲಿ ಪ್ರಣಯ್‌ ನಿರೀಕ್ಷಿತ ಪ್ರದರ್ಶನ ನೀಡುವಲ್ಲಿ ವಿಫ‌ಲರಾದರು. ಇಲ್ಲಿ ಅವರಿಗೆ ಭಾರೀ ಹಿನ್ನಡೆಯಾಯಿತು. ಈ ಅಂತರವನ್ನು ಸರಿದೂಗಿಸಲು ಸಾಧ್ಯವಾಗಲೇ ಇಲ್ಲ. ಆದರೆ ದ್ವಿತೀಯ ಗೇಮ್‌ನಲ್ಲಿ ಪ್ರಣಯ್‌ ಆಕ್ರಮಣಕಾರಿ ಆಟಕ್ಕಿಳಿದರು. ಇಲ್ಲಿ ಯಾರೂ ಗೆಲ್ಲಬಹುದಾದ ಸ್ಥಿತಿ ನಿರ್ಮಾಣವಾಗಿತ್ತು. ಆದರೆ ಅದೃಷ್ಟ ಪ್ರಣಯ್‌ಗೆ ಒಲಿಯಿತು. ಎರಡೇ ಅಂಕಗಳ ಅಂತರದಿಂದ ಗೆದ್ದ ಪ್ರಣಯ್‌ ಹೋರಾಟವನ್ನು ಸಮಬಲಕ್ಕೆ ತಂದು ನಿಲ್ಲಿಸಿದರು.

ನಿರ್ಣಾಯಕ ಗೇಮ್‌ನಲ್ಲೂ ಪ್ರಣಯ್‌ ಭಾರೀ ಜೋಶ್‌ ತೋರಿದರು. ಒಂದು ಹಂತದಲ್ಲಿ 5 ಅಂಕಗಳ ಮುನ್ನಡೆಯನ್ನೂ ಹೊಂದಿದ್ದರು. 14-9ರ ಲೀಡ್‌ನ‌ಲ್ಲಿದ್ದಾಗ ಪ್ರಣಯ್‌ ಗೆದ್ದೇ ಬಿಟ್ಟರೆಂದು ಭಾವಿಸಲಾಗಿತ್ತು. ಆದರೆ ಈ ಹಂತದಲ್ಲಿ ಹಾಂಗ್‌ ಯಾಂಗ್‌ ಭರ್ಜರಿ “ಬೌನ್ಸ್‌ ಬ್ಯಾಕ್‌” ಮಾಡಿ ಪ್ರಣಯ್‌ ಮೇಲೆ ಸವಾರಿಗೈದರು.