Pro Kabaddi-10; ಬೆಂಗಳೂರಿಗೆ ಮತ್ತೆ ಸೋಲು: ಜೈಪುರ್‌ ವಿರುದ್ಧ ಪುನೇರಿ ಜಯ

Team Udayavani, Dec 4, 2023, 11:20 PM IST

ಅಹ್ಮದಾಬಾದ್‌: ಪ್ರೊ ಕಬಡ್ಡಿ 10ನೇ ಆವೃತ್ತಿಯಲ್ಲಿ ಬೆಂಗಳೂರು ಬುಲ್ಸ್‌ ನಿರಾಶಾದಾಯಕ ಆಟ ಮುಂದುವರಿಸಿದೆ. ಸತತ 2ನೇ ಸೋಲಿಗೆ ತುತ್ತಾಗಿದೆ. ಸೋಮವಾರದ ಪಂದ್ಯದಲ್ಲಿ ಬೆಂಗಾಲ್‌ ವಾರಿಯರ್ 32-30 ಅಂತರದಿಂದ ಬುಲ್ಸ್‌ ಪಡೆಯನ್ನು ಕೆಡವಿತು.

ಬೆಂಗಳೂರು ಬುಲ್ಸ್‌ ತನ್ನ ಆರಂಭಿಕ ಪಂದ್ಯದಲ್ಲಿ ಗುಜರಾತ್‌ ಜೈಂಟ್ಸ್‌ ವಿರುದ್ಧ ಎಡವಿತ್ತು. ಬೆಂಗಾಲ್‌ ಎದುರು ಆರಂಭದಿಂದಲೇ ಹಿನ್ನಡೆ ಕಾಣುತ್ತ ಹೋದ ಬುಲ್ಸ್‌ ಕೊನೆಯ 5 ನಿಮಿಷದಲ್ಲಿ ಸಮಬಲ ಸಾಧಿಸುವಲ್ಲಿ ಯಶಸ್ವಿಯಾಯಿತು. ಆದರೆ ಅಂತಿಮ ಕ್ಷಣದಲ್ಲಿ ಬೆಂಗಾಲ್‌ ಮತ್ತೆ ಮೇಲುಗೈ ಸಾಧಿಸಿ ರೋಚಕ ಗೆಲುವು ಸಾಧಿಸಿತು.
ಬೆಂಗಾಲ್‌ ಜಯದಲ್ಲಿ ನಾಯಕ ಮಣಿಂದರ್‌ ಸಿಂಗ್‌ ಪ್ರಮುಖ ಪಾತ್ರ ವಹಿಸಿದರು (11 ಅಂಕ). ಡಿಫೆಂಡರ್‌ ಶುಭಂ ಶಿಂಧೆ ಮತ್ತು ರೈಡರ್‌ ವಿಶ್ವಾಸ್‌ ತಲಾ 4 ಅಂಕ ಗಳಿಸಿದರು. ಬುಲ್ಸ್‌ ಸಾಂ ಕ ಆಟದ ಮೂಲಕ ಗಮನ ಸೆಳೆದರೂ ದಡ ಸೇರುವಲ್ಲಿ ವಿಫ‌ಲವಾಯಿತು. ರೈಡರ್‌ ಭರತ್‌ 6, ನೀರಜ್‌ ನರ್ವಾಲ್‌ 5 ಅಂಕ ಸಂಪಾದಿಸಿದರು.

ಪುನೇರಿ ಗೆಲುವು
ತೀವ್ರ ಪೈಪೋಟಿಯಿಂದ ಕೂಡಿದ ಮೊದಲ ಪಂದ್ಯದಲ್ಲಿ ಪುನೇರಿ ಪಲ್ಟಾನ್‌ 37-33 ಅಂತರದಿಂದ ಜೈಪುರ್‌ ಪಿಂಕ್‌ ಪ್ಯಾಂಥರ್ಗೆ ಸೋಲುಣಿಸಿತು. ಮೊದಲ ಅವಧಿಯ ಆಟದಲ್ಲಿ ಜೈಪುರ್‌ 18-14 ಅಂತರದ ಮುನ್ನಡೆಯಲ್ಲಿತ್ತು. ಆದರೆ ದ್ವಿತೀಯಾರ್ಧದಲ್ಲಿ ಪುನೇರಿ ತಿರುಗಿ ಬಿತ್ತು.

ಪುನೇರಿ ಗೆಲುವಿನಲ್ಲಿ ನಾಯಕ, ರೈಡರ್‌ ಅಸ್ಲಾಂ ಮುಸ್ತಾಫಾ ಪ್ರಧಾನ ಪಾತ್ರ ವಹಿಸಿದರು. ಇವರದು ಗರಿಷ್ಠ 10 ಅಂಕಗಳ ಸಾಧನೆ.