ಬೆಂಗಳೂರಿಗೆ 5ನೇ ಸೋಲು

Team Udayavani, Aug 19, 2017, 12:25 PM IST

ಲಕ್ನೋ: ಜಸ್ವೀರ್‌ ಸಿಂಗ್‌ ಚುರುಕಿನ ರೈಡಿಂಗ್‌ (10 ಅಂಕ) ಹಾಗೂ ಮಂಜಿತ್‌ ಚಿಲ್ಲಾರ್‌ (8 ಅಂಕ) ಅಮೋಘ ಕ್ಯಾಚಿಂಗ್‌ನಿಂದಾಗಿ ಬೆಂಗಳೂರು ಬುಲ್ಸ್‌ ವಿರುದ್ಧ ಜೈಪುರ ಪಿಂಕ್‌ ಪ್ಯಾಂಥರ್ ರೋಚಕ 30-28 ಅಂತರದ ಜಯ ಸಾಧಿಸಿದೆ. ಸೋಲುಂಡ ಬೆಂಗಳೂರು ಬುಲ್ಸ್‌ ಕೂಟದಲ್ಲಿ
ಒಟ್ಟಾರೆ 5ನೇ ಮುಖಭಂಗ ಅನುಭವಿಸಿತು. 

ಕೊನೆ 2 ನಿಮಿಷದಲ್ಲಿ ಬುಲ್ಸ್‌ಗೆ ಸೋಲು: ಬಾಬು ಬನಾರಸಿ ಒಳಾಂಗಣ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆದ ಪಂದ್ಯ ರೋಚಕವಾಗಿತ್ತು. ಕೊನೆ 5 ನಿಮಿಷದವರೆಗೆ ಬೆಂಗಳೂರು ಹಾಗೂ ಜೈಪುರ ಸಮಬಲ ಕಾಯ್ದುಕೊಂಡಿದ್ದವು. ಆದರೆ ಪಂದ್ಯ ಮುಗಿಯಲು ಇನ್ನೇನು 2 ನಿಮಿಷವಷ್ಟೇ ಇದ್ದಾಗ
ಜೈಪುರ ಮಿಂಚಿನ ಆಟ ಪ್ರದರ್ಶಿಸಿತು. ಏಕಾಏಕಿ ದಾಳಿಯಿಂದ ಬುಲ್ಸ್‌ ಕುಸಿಯಿತು. ಒಟ್ಟಾರೆ 22 ರೈಡಿಂಗ್‌ ಮಾಡಿದ್ದ ಜಸ್ವೀರ್‌ 10 ಅಂಕ ತಂದರು. ಟ್ಯಾಕ್ಲಿಂಗ್‌ ಮೂಲಕ ಮಂಜಿತ್‌ ಚಿಲ್ಲಾರ್‌ ಜೈಪುರ ತಂಡಕ್ಕೆ ನೆರವಾದರು.

ನಡೆಯಲಿಲ್ಲ ರೋಹಿತ್‌ ಜಾದೂ: ಬುಲ್ಸ್‌ ಪರ ನಾಯಕ ರೋಹಿತ್‌ ಕುಮಾರ್‌ (10 ಅಂಕ) ಏಕಾಂಗಿ ಹೋರಾಟ ನಡೆಸಿದರು. ತಂಡವನ್ನು ಗೆಲ್ಲಿಸಲು ಗರಿಷ್ಠ ಪ್ರಯತ್ನ ನಡೆಸಿದರು. ಆದರೆ ರೋಹಿತ್‌ಗೆ ತಂಡದ ಉಳಿದ ಆಟಗಾರರಿಂದ ಉತ್ತಮ ಬೆಂಬಲ ಸಿಗದ ಕಾರಣ ಪಂದ್ಯ
ಕಳೆದುಕೊಳ್ಳಬೇಕಾಯಿತು.

ಹರ್ಷವರ್ಧನ ಸುಳ್ಯ