Pro Kabaddi: ಸಾವಿರ ಪಂದ್ಯಗಳ ಸಂಭ್ರಮ

Team Udayavani, Jan 15, 2024, 6:00 AM IST

ಜೈಪುರ: ಸಂಕ್ರಾಂತಿ ದಿನವಾದ ಸೋಮವಾರ ಪ್ರೊ ಕಬಡ್ಡಿ ಪಾಲಿಗೆ ಐತಿಹಾಸಿಕ ದಿನವಾಗಲಿದೆ. ಪ್ರೊ ಕಬಡ್ಡಿ ಸಾವಿರ ಪಂದ್ಯಗಳ ಸಂಭ್ರಮವನ್ನು ಆಚರಿಸಲಿದೆ. ಈ ಪಂದ್ಯ ಬೆಂಗಳೂರು ಬುಲ್ಸ್‌ ಮತ್ತು ಬೆಂಗಾಲ್‌ ವಾರಿಯರ್ ನಡುವೆ ನಡೆಯಲಿರುವುದು ಕನ್ನಡಿಗರ ಪಾಲಿಗೊಂದು ಖುಷಿ. ಆದರೆ ಪ್ರಸಕ್ತ ಸೀಸನ್‌ನಲ್ಲಿ ಈ ತಂಡಗಳ ಸಾಧನೆ ನಿರೀಕ್ಷಿತ ಮಟ್ಟದಲ್ಲಿಲ್ಲ.

“ಪ್ರೊ ಕಬಡ್ಡಿ ಸಾವಿರ ಪಂದ್ಯಗಳನ್ನು ಕಾಣುತ್ತಿರುವುದೊಂದು ಸಂತಸದ ಸಂಗತಿ. ಇದು ವಿಶ್ವ ಕಬಡ್ಡಿ ಪಾಲಿ ಗೊಂದು ಹೆಮ್ಮೆಯ ಕ್ಷಣ’ ಎಂಬುದಾಗಿ ಜೈಪುರ್‌ ತಂಡದ ಮಾಲಕ ಅಭಿಷೇಕ್‌ ಬಚ್ಚನ್‌ ಹೇಳಿದ್ದಾರೆ.
ಪ್ರೊ ಕಬಡ್ಡಿ ಆರಂಭವಾದದ್ದು 2014ರಲ್ಲಿ. ಇದು 10ನೇ ಸೀಸನ್‌. ಕೆಲವು ಸೀಸನ್‌ಗಳ ಬಳಿಕ ತಂಡಗಳ ಸಂಖ್ಯೆಯನ್ನು ಹೆಚ್ಚಿಸಲಾಯಿತು. ಪರಿಣಾಮ ಈಗ ಪ್ರತೀ ಸೀಸನ್‌ನಲ್ಲಿ 130ರಷ್ಟು ಪಂದ್ಯಗಳನ್ನು ಆಡಲಾಗುತ್ತಿದೆ.

9ನೇ ಜಯ ಸಾಧಿಸಿದ ಹರ್ಯಾಣ
ಹರ್ಯಾಣ ಸ್ಟೀಲರ್ 10ನೇ ಪ್ರೊ ಕಬಡ್ಡಿ ಸೀಸನ್‌ನಲ್ಲಿ 9ನೇ ಗೆಲುವು ಸಾಧಿಸಿದೆ. ರವಿವಾರದ ಮೊದಲ ಪಂದ್ಯದಲ್ಲಿ ತಮಿಳ್‌ ತಲೈವಾಸ್‌ಗೆ 36-31 ಅಂತರದ ಸೋಲುಣಿಸಿತು. ಇದು ತಮಿಳ್‌ಗೆ ಎದುರಾದ 9ನೇ ಆಘಾತ.
ರೈಡರ್‌ಗಳಾದ ವಿನಯ್‌ (10), ಚಂದ್ರನ್‌ ರಂಜಿತ್‌ (7) ಹರ್ಯಾಣ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ತಲೈವಾಸ್‌ ಪರ 6 ಅಂಕ ತಂದಿತ್ತ ಅಜಿಂಕ್ಯ ಪವಾರ್‌ ಅವರದೇ ಹೆಚ್ಚಿನ ಗಳಿಕೆ.

ದಬಾಂಗ್‌ ಡೆಲ್ಲಿ ಮತ್ತು ಪಾಟ್ನಾ ಪೈರೇಟ್ಸ್‌ ನಡುವೆ ನಡೆದ ದ್ವಿತೀಯ ಪಂದ್ಯ ಟೈ ಆಯಿತು. ಎರಡೂ ತಂಡಗಳು 39 ಅಂಕ ಗಳಿಸಿದವು.