ಬುಲ್ಸ್‌ ಭರ್ಜರಿ ಬೇಟೆ

Team Udayavani, Aug 9, 2019, 9:30 AM IST

ಪಾಟಲಿಪುತ್ರ (ಬಿಹಾರ): ತಾರಾ ರೈಡರ್‌ ಪವನ್‌ ಸೆಹ್ರಾವತ್‌ (17 ಅಂಕ) ಅವರ ಮಿಂಚಿನ ರೈಡಿಂಗ್‌ ನೆರವಿನಿಂದ ಬೆಂಗಳೂರು ಬುಲ್ಸ್‌ ತಂಡ 47-26 ಅಂಕಗಳ ಭಾರೀ ಅಂತರದಿಂದ ತೆಲುಗು ಟೈಟಾನ್ಸ್‌ ತಂಡವನ್ನು ಬೇಟೆಯಾಡಿತು.
ಬೆಂಗಳೂರು ಬುಲ್ಸ್‌ ಈ ಕೂಟದಲ್ಲಿ ದಾಖಲಿಸಿದ 4ನೇ ಗೆಲುವು. ಸತತವಾಗಿ ಮೂರನೇ ಜಯವೂ ಹೌದು. ತೆಲುಗು ಟೈಟಾನ್ಸ್‌ಗೆ ಕೂಟದಲ್ಲಿ ಎದುರಾದ 5ನೇ ಹೀನಾಯ ಸೋಲು. ಹಿಂದಿನ ಪಂದ್ಯದಲ್ಲಿ ತೆಲುಗು ಟೈಟಾನ್ಸ್‌ 20-20 ಅಂಕಗಳ ಅಂತರದಿಂದ ಯುಪಿ ಯೋಧಾ ವಿರುದ್ಧ ರೋಚಕ ಟೈ ಸಾಧಿಸಿತ್ತು. ತೆಲುಗು ಟೈಟಾನ್ಸ್‌ ಈವರೆಗೆ ಒಂದು ಪಂದ್ಯದಲ್ಲಷ್ಟೇ ಜಯ ಸಾಧಿಸಿದೆ.

ತೆಲುಗು ಟೈಟಾನ್ಸ್‌ ಅಪ್ಪಚ್ಚಿ
ಗುರುವಾರದ ಈ ಏಕೈಕ ಪಂದ್ಯದಲ್ಲಿ ಪವನ್‌ ಆಲ್‌ರೌಂಡರ್‌ ಆಟ ಪ್ರದರ್ಶಿಸಿರುವುದು ವಿಶೇಷ. 8 ಟಚ್‌ ಪಾಯಿಂಟ್‌ ಹಾಗೂ 5 ಬೋನಸ್‌ನಿಂದ ಪವನ್‌ ಗರ್ಜಿಸಿದರು. ಜತೆಗೆ 4 ಭರ್ಜರಿ ಟ್ಯಾಕಲ್‌ ಕೂಡ ನಡೆಸಿದರು. ಇವರಿಗೆ ರೈಡರ್‌ ರೋಹಿತ್‌ ಕುಮಾರ್‌ (8 ಅಂಕ) ಹಾಗೂ ಮಹೇಂದರ್‌ ಸಿಂಗ್‌ (7 ಅಂಕ) ಟ್ಯಾಕಲ್‌ ನಡೆಸಿ ಸಾಥ್‌ ನೀಡಿದರು.  ಟೈಟಾನ್ಸ್‌ ಪರ ಸಿದ್ಧಾರ್ಥ್ ದೇಸಾಯಿ (11 ಅಂಕ) ಹಾಗೂ ವಿಶಾಲ್‌ ಭಾರದ್ವಾಜ್‌ (6 ಅಂಕ) ಹೋರಾಟ ನಡೆಸಿದರೂ ಪ್ರಯೋಜನಕ್ಕೆ ಬರಲಿಲ್ಲ.