ಮುಂಬಾವನ್ನು ಮಣಿಸಿದ ಹರ್ಯಾಣ

Team Udayavani, Aug 19, 2019, 10:39 PM IST

ಚೆನ್ನೈ: ಸೋಮವಾರದ ಪ್ರೊ ಕಬಡ್ಡಿ ಪಂದ್ಯಗಳಲ್ಲಿ ಹರ್ಯಾಣ ಸ್ಟೀಲರ್ ಮತ್ತು ಯುಪಿ ಯೋಧಾ ತಂಡಗಳು ಜಯ ಸಾಧಿಸಿವೆ.

ಮೊದಲ ಪಂದ್ಯದಲ್ಲಿ ಹರ್ಯಾಣ 30-27 ಅಂತರದಿಂದ ಯು ಮುಂಬಾ ಸೋಲಿಸಿದರೆ, ಇನ್ನೊಂದು ಮುಖಾಮುಖೀಯಲ್ಲಿ ಯುಪಿ ಯೋಧಾ 31-24 ಅಂಕಗಳಿಂದ ಜೈಪುರ್‌ ಪಿಂಕ್‌ ಪ್ಯಾಂಥರ್ಗೆ ಆಘಾತವಿಕ್ಕಿತು.

ಹರ್ಯಾಣದ ರೋಚಕ ಜಯಕ್ಕೆ ನೆರವಾದವರು ದಾಳಿಗಾರ ವಿಕಾಸ್‌ ಕಂಡೊಲ. ಅವರು 21 ಬಾರಿ ಎದುರಾಳಿ ಕೋಟೆಯೊಳಗೆ ನುಗ್ಗಿ 9 ಸಲ ಯಶಸ್ಸು ಸಾಧಿಸಿದರು. ರಕ್ಷಣಾ ವಿಭಾಗದಲ್ಲಿ ರವಿಕುಮಾರ್‌ ಉತ್ತಮ ಸಾಧನೆ ಮಾಡಿದರು. ಅವರು ಕೇವಲ 4 ಯತ್ನದಲ್ಲಿ 3 ಅಂಕ ಗಳಿಸಿದರು.

ಮುಂಬಾ ಕೊನೆಯ ಹಂತದ ತನಕ ದಿಟ್ಟ ಹೋರಾಟ ನೀಡಿತು. ಅಭಿಷೇಕ್‌ ಸಿಂಗ್‌, ಫ‌ಜೆಲ್‌ ಅಟ್ರಾಚೆಲಿ ಉತ್ತಮ ಪ್ರದರ್ಶನ ನೀಡಿದರು. ದಾಳಿಗಾರ ಅಭಿಷೇಕ್‌ 9 ಬಾರಿ ಹರ್ಯಾಣ ಕೋಟೆಗೆ ನುಗ್ಗಿ 6 ಅಂಕ ಗಳಿಸಿದರು. ಅಟ್ರಾಚೆಲಿ 5 ಯತ್ನದಲ್ಲಿ 4 ಅಂಕ ಗಳಿಸಿದರು.