ಪಾಟ್ನಾ ಉರುಳಿಸಿದ ಗುಜರಾತ್‌

Team Udayavani, Oct 9, 2017, 6:50 AM IST

ಜೈಪುರ: ಸರ್ವಾಂಗೀಣ ಆಟದ ಪ್ರದರ್ಶನ ನೀಡಿದ “ಎ’ ವಲಯದ ಅಗ್ರಸ್ಥಾನಿ ಗುಜರಾತ್‌ ಫಾರ್ಚೂನ್‌ ಜೈಂಟ್ಸ್‌ ತಂಡವು ಪ್ರೊ ಕಬಡ್ಡಿ ಲೀಗ್‌ ಐದರ ಜೈಪುರ ಚರಣದ ರವಿವಾರ ನಡೆದ ಅಂತರ್‌ ವಲಯ ಪಂದ್ಯದಲ್ಲಿ “ಬಿ’ ಬಣದ ದ್ವಿತೀಯ ಸ್ಥಾನಿ ಪಾಟ್ನಾ ಪೈರೇಟ್ಸ್‌ ತಂಡವನ್ನು 33-29 ಅಂಕಗಳಿಂದ ರೋಚಕವಾಗಿ ಸೋಲಿಸಿತು.

ತಂಡದ ಎಲ್ಲ ಆಟಗಾರರ ಅಮೋಘ ನಿರ್ವಹಣೆಯಿಂದಾಗಿ ಗುಜರಾತ್‌ ಈ ಕೂಟದಲ್ಲಿ ಸತತ ನಾಲ್ಕನೇ ಗೆಲುವು ದಾಖಲಿಸುವಂತಾಯಿತು. ಇದು ಪಾಟ್ನಾ ತಂಡದ ಸತತ ಎರಡನೇ ಸೋಲು ಆಗಿದೆ. ಚೆನ್ನೈ ಚರಣದ ವೇಳೆ ಗುಜರಾತ್‌ ಪಾಟ್ನಾ ತಂಡವನ್ನು 30-29 ಅಂಕಗಳಿಂದ ರೋಮಾಂಚಕವಾಗಿ ಕೆಡಹಿತ್ತು.

ಈ ಗೆಲುವಿನಿಂದ ಗುಜರಾತ್‌ ತಾನಾಡಿದ 20 ಪಂದ್ಯಗಳಿಂದ 13ನೇ ಜಯ ಸಾಧಿಸಿ 77 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿ ಮುಂದುವರಿಯಿತಲ್ಲದೇ ಸೂಪರ್‌ ಪ್ಲೇ ಆಫ್ಗೆ ತೇರ್ಗಡೆಯಾಗುವುದನ್ನು ಖಚಿತಪಡಿಸಿತು. ಬದಲಿ ಆಟಗಾರರಾಗಿ ಬಂದ ಮಹೇಂದ್ರ ರಾಜ್‌ಪುತ್‌ 6 ಅಂಕ ಪಡೆದರೆ ಸುನೀಲ್‌ 4, ಸಚಿನ್‌ 5, ಫ‌ಜೆಲ್‌ ಅತ್ರಾಚಲಿ 5 ಮತ್ತು ಅಬೋಜರ್‌ 4 ಅಂಕ ಗಳಿಸಿದರು.

ಪ್ರದೀಪ್‌, ಮೊನು ಗೊಯಟ್‌ ಮತ್ತು ವಿಜಯ್‌ ಗೆಲುವಿಗಾಗಿ ಶಕ್ತಿಮೀರಿ ಪ್ರಯತ್ನಿಸಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಈ ಪಂದ್ಯದಲ್ಲಿ ಪಾಟ್ನಾ ಮತ್ತು ಗುಜರಾತ್‌ ಒಮ್ಮೆ ಆಲೌಟಾಗಿದ್ದರೆ ಪಾಟ್ನಾ ರೈಡ್‌ನ‌ಲ್ಲಿಯೇ ಗರಿಷ್ಠ ಅಂಕ ಗಳಿಸಿತ್ತು. ಆದರೆ ಗುಜರಾತ್‌ ಟ್ಯಾಕಲ್‌ನಲ್ಲಿ ಗರಿಷ್ಠ ಅಂಕ ಗಳಿಸಿ ಮೇಲುಗೈ ಸಾಧಿಸಿತ್ತು.

ಪ್ರದೀಪ್‌, ದೀಪಕ್‌ ದಾಖಲೆ
ಪ್ರೊ ಕಬಡ್ಡಿ ಲೀಗ್‌ ಇತಿಹಾಸದಲ್ಲಿ ಪಾಟ್ನಾದ ಪ್ರದೀಪ್‌ ನರ್ವಾಲ್‌ ಮತ್ತು ಪುನೇರಿ ಪಲ್ಟಾನ್ಸ್‌ನ ದೀಪಕ್‌ ಹೂಡ ಅವರು 500 ರೈಡ್‌ ಅಂಕ ಗಳಿಸಿ ದಾಖಲೆ ನಿರ್ಮಿಸಿದ್ದಾರೆ.