ಪ್ರೊ ಕಬಡ್ಡಿ ಲೀಗ್‌: ಪುನೇರಿ ಪಲ್ಟಾನ್ಸ್‌, ಹರಿಯಾಣಕ್ಕೆ ಜಯ

Team Udayavani, Oct 25, 2022, 11:46 PM IST

ಬೆಂಗಳೂರು: ಪ್ರೊ ಕಬಡ್ಡಿ ಲೀಗ್‌ನ ಮಂಗಳವಾರದ ಪಂದ್ಯಗಳಲ್ಲಿ ಪುನೇರಿ ಪಲ್ಟಾನ್ಸ್‌ ಮತ್ತು ಹರಿಯಾಣ ಸ್ಟೀಲರ್ ಭರ್ಜರಿ ಗೆಲುವು ದಾಖಲಿಸಿದೆ.

ಮೊದಲ ಪಂದ್ಯದಲ್ಲಿ ರೈಡರ್‌ ಅಸ್ಲಾಂ ಇನಾಂದರ್‌ ಅವರ ಉತ್ತಮ ಆಟದಿಂದಾಗಿ ಪುನೇರಿ ಪಲ್ಟಾನ್ಸ್‌ ತಂಡವು ಜೈಪುರ ಪಿಂಕ್‌ ಪ್ಯಾಂಥರ್ ತಂಡವನ್ನು 32-24 ಅಂಕಗಳಿಂದ ಸೋಲಿಸಿತು.

ದಿನದ ಇನ್ನೊಂದು ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ ತಂಡವು ತೆಲುಗು ಟೈಟಾನ್ಸ್‌ ತಂಡವನ್ನು 43-24 ಅಂಕಗಳಿಂದ ಮಣಿಸಿತು. ಮೀತು ಶರ್ಮ ರೈಡ್‌ ಮೂಲಕ 13 ಅಂಕ ಪಡೆದು ತಂಡದ ಗೆಲುವಿಗೆ ಉತ್ತಮ ಕೊಡುಗೆ ಸಲ್ಲಿಸಿದರು.

ಪುನೇರಿ ಮತ್ತು ಜೈಪುರ ನಡುವಣ ಪಂದ್ಯ ತೀವ್ರ ಪೈಪೋಟಿಯಿಂದ ಸಾಗಿತ್ತು. ಪ್ರತಿಯೊಂದು ಅಂಕ ಗಳಿಸಲು ಎರಡೂ ತಂಡಗಳ ಆಟಗಾರರು ಒದ್ದಾಡಿದರು. ಇನಾಂದರ್‌ ಅವರ ವೇಗದ ಚಲನೆ ಮತ್ತು ಎದುರಾಳಿ ಜೈಪುರದ ರಕ್ಷಣಾ ಆಟಗಾರರನ್ನು ವಂಚಿಸಿ ಅಂಕ ಗಳಿಸಿದ ರೀತಿ ಅಮೋಘವಾಗಿತ್ತು. ಪಂದ್ಯದ ಮೊದಲ ಅವಧಿ ಮುಗಿದಾಗ ಪುನೇರಿ 17-11 ರಿಂದ ಮುನ್ನಡೆಯಲ್ಲಿತ್ತು.

ದ್ವಿತೀಯ ಅವಧಿಯಲ್ಲಿ ಜೈಪುರ ಭರ್ಜರಿಯಾಗಿ ಆಡಿತು. ಅರ್ಜುನ್‌ ದೇಶ್ವಾಲ್‌ ಮತ್ತು ರಾಹುಲ್‌ ಚೌಧರಿ ಉತ್ತಮವಾಗಿ ರೈಡ್‌ ಮಾಡಿ ಅಂಕ ಗಳಿಸಲು ಪ್ರಯತ್ನಿಸಿ ಪುನೇರಿ ಆಟಗಾರರನ್ನು ಒತ್ತಡಕ್ಕೆ ಸಿಲುಕಿಸಿದರು. ಗೌರವ್‌ ಖತ್ರಿ ಅವರ ಅಮೋಘ ಆಟದಿಂದ ಪುನೇರಿ ಮೇಲುಗೈ ಸಾಧಿಸಿತು.