Pro Kabaddi; ತಲೈವಾಸ್‌ಗೆ ಮತ್ತೆ ಆಘಾತ, ಗುಜರಾತ್‌ ವಿಜಯ

Team Udayavani, Dec 23, 2023, 11:39 PM IST

ಚೆನ್ನೈ: ಆತಿಥೇಯ ತಮಿಳ್‌ ತಲೈವಾಸ್‌ ತವರಿನ ಆವೃತ್ತಿಯ ಸತತ 2ನೇ ಪಂದ್ಯದಲ್ಲೂ ಸೋಲಿನ ಆಘಾತಕ್ಕೆ ಸಿಲುಕಿದೆ. ಶನಿವಾರದ ರೋಚಕ ಹೋರಾಟದಲ್ಲಿ ಜೈಪುರ್‌ ಪಿಂಕ್‌ ಪ್ಯಾಂಥರ್ಗೆ ಬರೀ ಒಂದಂಕದಿಂದ ಶರಣಾಯಿತು. ಅಂತರ 24-25.

ಇದರೊಂದಿಗೆ ತಮಿಳ್‌ 6 ಪಂದ್ಯಗಳಲ್ಲಿ 4ನೇ ಸೋಲುಂಡಿತು. ಜೈಪುರ್‌ 7 ಪಂದ್ಯಗಳಲ್ಲಿ 4ನೇ ಗೆಲುವು ಸಾಧಿಸಿತು. ರೈಡರ್‌ ಅರ್ಜುನ್‌ ದೇಶ್ವಾಲ್‌ (7), ಡಿಫೆಂಡರ್‌ ರೇಝ (5) ಜೈಪುರ್‌ ಜಯದಲ್ಲಿ ಪ್ರಮುಖ ಪಾತ್ರ ವಹಿಸಿದರು. ತಮಿಳ್‌ ಪರ ರೈಡರ್‌ ಹಿಮಾಂಶು ನರ್ವಾಲ್‌ (8) ಪ್ರದರ್ಶನ ಗಮನಾರ್ಹ ಮಟ್ಟದಲ್ಲಿತ್ತು. ಡಿಫೆಂಡರ್‌ ಎಂ. ಅಭಿಷೇಕ್‌ 4 ಅಂಕ ತಂದಿತ್ತರು.

ಗುಜರಾತ್‌ ವಿಜಯ
ಎರಡನೇ ಪಂದ್ಯದಲ್ಲಿ ಯುಪಿ ಯೋಧಾಸ್‌ ವಿರುದ್ಧ ಗುಜರಾತ್‌ ಜೈಂಟ್ಸ್‌ 38-30 ಅಂತರದ ಜಯ ಸಾಧಿಸಿತು. ಇದು 7 ಪಂದ್ಯಗಳಲ್ಲಿ ಗುಜರಾತ್‌ಗೆ ಒಲಿದ 4ನೇ ಗೆಲುವು. ರೈಡರ್‌ ರಾಕೇಶ್‌ ಪ್ರಚಂಡ ಆಟವಾಡಿ ಗುಜರಾತ್‌ಗೆ ಮೇಲುಗೈ ತಂದಿತ್ತರು. ರಾಕೇಶ್‌ ಗಳಿಕೆ 14 ಅಂಕ. ವಿರಾಮದ ವೇಳೆ ಗುಜರಾತ್‌ 5 ಅಂಕಗಳ ಹಿನ್ನಡೆಯಲ್ಲಿತ್ತು. ಯೋಧಾಸ್‌ ಪರ ರೈಡರ್‌ ಸುರೇಂದರ್‌ ಗಿಲ್‌ ಏಕಾಂಗಿ ಹೋರಾಟ ನಡೆಸಿ 13 ಅಂಕ ತಂದಿತ್ತರು. ಇದು ಯೋಧಾಸ್‌ ಆಡಿದ 7ನೇ ಪಂದ್ಯ. ಈವರೆಗೆ ಎರಡನ್ನಷ್ಟೇ ಜಯಿಸಿದೆ.

ಇಂದಿನ ಪಂದ್ಯಗಳು
1. ಮುಂಬಾ-ಬೆಂಗಾಲ್‌  ಆರಂಭ: ರಾತ್ರಿ 8.00

2. ಬುಲ್ಸ್‌-ಟೈಟಾನ್ಸ್‌  ಆರಂಭ: ರಾತ್ರಿ 9.00
 ಪ್ರಸಾರ: ಸ್ಟಾರ್‌ ಸ್ಪೋರ್ಟ್ಸ್