ಪ್ರೊ ಕಬಡ್ಡಿ: ಪುನೇರಿ ಮೇಲೆ ತಮಿಳ್‌ ತಲೈವಾಸ್‌ ಸವಾರಿ

Team Udayavani, Dec 31, 2021, 10:28 PM IST

ಬೆಂಗಳೂರು: ಎಂಟನೇ ಪ್ರೊ ಕಬಡ್ಡಿ ಆವೃತ್ತಿಯಲ್ಲಿ ತಮಿಳ್‌ ತಲೈವಾಸ್‌ ಮೊದಲ ಗೆಲುವು ಸಾಧಿಸಿದೆ. ದಿನದ ಮೊದಲ ಪಂದ್ಯದಲ್ಲಿ ಅದು ಪುನೇರಿ ಪಲ್ಟಾನ್‌ ವಿರುದ್ಧ 36-26 ಅಂಕಗಳಿಂದ ಗೆದ್ದು ಬಂದಿತು. ಪಾಟ್ನಾ ಪೈರೇಟ್ಸ್‌ ಮತ್ತು ಬೆಂಗಾಲ್‌ ವಾರಿಯರ್ ನಡುವಿನ ಇನ್ನೊಂದು ಪಂದ್ಯ ಜಿದ್ದಾಜಿದ್ದಿಯಿಂದ ಕೂಡಿತ್ತು. ಇದನ್ನು ಪಾಟ್ನಾ 44-30 ಅಂತರದಿಂದ ಜಯಿಸಿತು.

ಮನ್‌ಜೀತ್ ಸಾಹಸ
ಇದು ಈ ಕೂಟದಲ್ಲಿ ತಮಿಳ್‌ ತಲೈವಾಸ್‌ಗೆ ಒಲಿದ ಮೊದಲ ಜಯ. 4 ಪಂದ್ಯಗಳನ್ನಾಡಿರುವ ತಲೈವಾಸ್‌ ಎರಡನ್ನು ಟೈ ಮಾಡಿಕೊಂಡು, ಒಂದರಲ್ಲಿ ಸೋಲನುಭವಿಸಿತ್ತು. ಇನ್ನೊಂದೆಡೆ ಪುನೇರಿ 4 ಪಂದ್ಯಗಳಲ್ಲಿ 3 ಸೋಲನುಭವಿಸಿ ಕೊನೆಯ ಸ್ಥಾನಕ್ಕೆ ಅಂಟಿಕೊಂಡಿತು.

ತಲೈವಾಸ್‌ ಮೇಲುಗೈಯಲ್ಲಿ ರೈಡರ್‌ ಮನ್‌ಜೀತ್ ಸಾಹಸ ಮಹತ್ವದ್ದಾಗಿತ್ತು. ಅವರು 17 ರೈಡ್‌ ನಡೆಸಿ ಸರ್ವಾಧಿಕ 8 ಅಂಕ ತಂದಿತ್ತರು. 5 ಟಚ್‌ ಪಾಯಿಂಟ್‌ ಮತ್ತು 3 ಬೋನಸ್‌ ಪಾಯಿಂಟ್‌ ಇದರಲ್ಲಿ ಸೇರಿತ್ತು. 17ರಲ್ಲಿ 5 ರೈಡ್‌ ಯಶಸ್ವಿಯಾಗಿತ್ತು. ಮನ್‌ಜೀತ್ ಹೊರತುಪಡಿಸಿದರೆ ನಾಯಕನೂ ಆಗಿರುವ ಡಿಫೆಂಡರ್‌ ಸುರ್ಜೀತ್‌ ಸಿಂಗ್‌ 3 ಅಂಕ ಗಳಿಸಿದರು. ಡಿಫೆಂಡರ್‌ಗಳಾದ ಸಾಗರ್‌ ಮತ್ತು ಸಾಹಿಲ್‌ ತಲಾ 2 ಅಂಕ ಕೊಡಿಸಿದರು. ವಿರಾಮದ ವೇಳೆ 18-11 ಮುನ್ನಡೆಯಲ್ಲಿದ್ದ ತಮಿಳ್‌ ತಲೈವಾಸ್‌ ಆಗಲೇ ಗೆಲುವಿನ ಸೂಚನೆ ನೀಡಿತ್ತು.

ಇದನ್ನೂ ಓದಿ:ದಕ್ಷಿಣ ಆಫ್ರಿಕಾ ವಿರುದ್ಧ ಏಕದಿನ ಸರಣಿ : ರಾಹುಲ್ ಟೀಮ್ ಇಂಡಿಯಾ ನಾಯಕ

ಪುನೇರಿ ಹಿನ್ನಡೆಯಲ್ಲಿ ರಾಹುಲ್‌ ಚೌಧರಿ ಅವರ ವೈಫ‌ಲ್ಯ ಎದ್ದು ಕಂಡಿತು. ಅವರು ಕಳೆದ ವರ್ಷದ ಕಳಫೆ ಫಾರ್ಮನ್ನೇ ಮುಂದುವರಿಸಿದ್ದು ತಂಡದ ಪಾಲಿಗೆ ದೊಡ್ಡ ಆಘಾತವಾಗಿದೆ. ಈ ಪಂದ್ಯದಲ್ಲಿ ರಾಹುಲ್‌ ತಂದಿತ್ತದ್ದು ಕೇವಲ ಎರಡಂಕ. ಮತ್ತೋರ್ವ ರೈಡರ್‌ ಪಂಕಜ್‌ ಮೋಹಿತೆ ಸಾಹಸ ಗಮನಾರ್ಹ ಮಟ್ಟದಲ್ಲಿತ್ತು. ಅವರಿಂದ ತಂಡಕ್ಕೆ ಎಂಟಂಕಗಳ ಲಾಭವಾಯಿತು. ರೈಡರ್‌ ಅಸ್ಲಾಮ್‌ ಮತ್ತು ಡಿಫೆಂಡರ್‌ ವಿಶಾಲ್‌ ಭಾರದ್ವಾಜ್‌ ತಲಾ 4 ಅಂಕ ತಂದು ಕೊಟ್ಟರು.