Pro Kabaddi:ಯುಪಿ, ತೆಲುಗು ಜಯಭೇರಿ

Team Udayavani, Nov 29, 2024, 12:47 AM IST

ನೋಯ್ಡಾ: ಜೈಪುರ ಪಿಂಕ್‌ ಪ್ಯಾಂಥರ್ ತಂಡದ ಸವಾಲನ್ನು ದಿಟ್ಟ ರೀತಿಯಲ್ಲಿ ಮೆಟ್ಟಿ ನಿಂತ ಯುಪಿ ಯೋಧಾಸ್‌ ತಂಡವು ಪ್ರೊ ಕಬಡ್ಡಿಯ ಗುರುವಾರದ ಪಂದ್ಯದಲ್ಲಿ 33-29 ಅಂಕಗಳಿಂದ ಜಯಭೇರಿ ಬಾರಿಸಿದೆ. ದಿನದ ಇನ್ನೊಂದು ಪಂದ್ಯದಲ್ಲಿ ತೆಲುಗು ಟೈಟಾನ್ಸ್‌ ತಂಡವು ಯು ಮುಂಬಾ ತಂಡವನ್ನು 41-35 ಅಂಕಗಳಿಂದ ಸೋಲಿಸಿದೆ.

ಈ ಗೆಲುವಿನಿಂದ ತೆಲುಗು ಒಟ್ಟಾರೆ 48 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ ದ್ವಿತೀಯ ಸ್ಥಾನಕ್ಕೇರಿದರೆ ಯು ಮುಂಬಾ ಮೂರನೇ ಹಾಗೂ ಯುಪಿ ಯೋಧಾಸ್‌ ನಾಲ್ಕನೇ ಸ್ಥಾನದಲ್ಲಿದೆ.

ಯುಪಿ ತಂಡವು ರೈಡಿಂಗ್‌ನಲ್ಲಿ 15 ಮತ್ತು ಟ್ಯಾಕಲ್‌ನಲ್ಲಿ 14 ಅಂಕ ಗಳಿಸಿ ಮುನ್ನಡೆ ಸಾಧಿಸಿತು. ಜೈಪುರ ರೈಡಿಂಗ್‌ನಲ್ಲಿ 12 ಹಾಗೂ ಟ್ಯಾಕಲ್‌ನಲ್ಲಿ 13 ಅಂಕ ಗಳಿಸಿತ್ತು. ಯುಪಿ ತಂಡದ ಭವಾನಿ ರಾಜ್‌ಪುತ್‌ ಭರ್ಜರಿಯಾಗಿ ಆಡಿದರು. ಉತ್ತಮ ರೈಡಿಂಗ್‌ ಮಾಡಿದ ಅವರು ಎಂಟಂಕ ಗಳಿಸಿ ತಂಡದ ಗೆಲುವಿಗೆ ಕಾರಣರಾದರು. ಗಗನ್‌ ಗೌಡ 6 ಮತ್ತು ಸುಮಿತ್‌ ಟ್ಯಾಕಲ್‌ನನಲ್ಲಿ 5 ಅಂಕ ಗಳಿಸಿದರು.

ಯುಪಿಯಂತೆ ಜೈಪುರ ಕೂಡ ಗೆಲುವು ದಾಖಲಿಸಲು ಶಕ್ತಿಮೀರಿ ಪ್ರಯತ್ನಿಸಿತು. ತಂಡದ ಅರ್ಜುನ್‌ ದೇಶ್ವಾಲ್‌ ರೈಡಿಂಗ್‌ನಲ್ಲಿ ಆರಂಕ, ನೀರಜ್‌ ನರ್ವಾಲ್‌ 5 ಅಂಕ ಪಡೆದರೆ ಲಕ್ಕಿ ಶರ್ಮ ಟ್ಯಾಕಲ್‌ನಲ್ಲಿ 4 ಅಂಕ ಪಡೆದರು.
ಶುಕ್ರವಾರ ನಡೆಯುವ ಮೊದಲ ಪಂದ್ಯದಲ್ಲಿ ತಮಿಳ್‌ ತಲೈವಾಸ್‌ ತಂಡವು ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ಹರಿಯಾಣ ಸ್ಟೀಲರ್ ತಂಡವನ್ನು ಎದುರಿಸಲಿದೆ. ದ್ವಿತೀಯ ಪಂದ್ಯದಲ್ಲಿ ಗುಜರಾತ್‌ ತಂಡವು ಪುನೇರಿ ತಂಡವನ್ನು ಎದುರಿಸಲಿದೆ.