ಪ್ರೊ ಕಬಡ್ಡಿ : ಪ್ಲೇಆಫ್ಗೇರಿದ ಹರ್ಯಾಣ ಸ್ಟೀಲರ್ಸ್‌

Team Udayavani, Sep 29, 2019, 10:35 PM IST

ಪಂಚಕುಲ (ಹರ್ಯಾಣ): ಆತಿಥೇಯ ಹರ್ಯಾಣ ಸ್ಟೀಲರ್ಸ್‌ ತಂಡ 7ನೆ ಆವೃತ್ತಿ ಪ್ರೊ ಕಬಡ್ಡಿಯ ಪ್ಲೇಆಫ್ ಸುತ್ತಿಗೇರಿದೆ. ಭಾನುವಾರ ನಡೆದ ಪಂದ್ಯದಲ್ಲಿ ಹರ್ಯಾಣ ತಂಡ 38-37 ಅಂಕಗಳಿಂದ ಅತ್ಯಂತ ರೋಚಕವಾಗಿ ಗುಜರಾತ್‌ ಫಾರ್ಚೂನ್‌ ಜೈಂಟ್ಸ್‌$ತಂಡವನ್ನು ಸದೆಬಡಿಯಿತು. ಇದರಿಂದ ಅದರ ಫ್ಲೇಆಫ್ ಪ್ರವೇಶ ಖಾತ್ರಿಯಾಯಿತು. ಈ ಬಾರಿ ಪ್ಲೇಆಫ್ಗೇರಿದ 3ನೆ ತಂಡ ಹರ್ಯಾಣ. ಇದಕ್ಕೂ ಮುನ್ನ ಡೆಲ್ಲಿ ಹಾಗೂ ಬೆಂಗಾಲ್‌ ವಾರಿಯರ್ಸ್‌ ತಂಡಗಳು ಈ ಹಂತಕ್ಕೇರಿದ್ದವು. ಬೆಂಗಳೂರು ಬುಲ್ಸ್‌, ಯುಪಿ ಯೋಧಾ ಹಾಗೂ ಯು ಮುಂಬಾ ತಂಡಗಳು ಪ್ಲೇಆಫ್ನಲ್ಲಿ ಸ್ಥಾನ ಗಳಿಸಲು ಸದ್ಯ ಹೋರಾಟ ನಡೆಸುತ್ತಿವೆ.

ಇಡೀ ಪಂದ್ಯದಲ್ಲಿ ಭರ್ಜರಿ ಹೋರಾಟ ನಡೆಯಿತು. ಗೆಲುವಿಗಾಗಿ ಇತ್ತಂಡಗಳು ನಿಕಟವಾಗಿ ಸೆಣಸಿದವು. ಆದ್ದರಿಂದ ಫ‌ಲಿತಾಂಶ ಸಿಗಲು ಕಡೆಯವರೆಗೂ ಕಾಯಬೇಕಾಯಿತು. ಹರ್ಯಾಣ ಪರ ವಿಕಾಸ್‌ ಕಂಡೊಲ ಭರ್ಜರಿಯಾಗಿ ದಾಳಿ ನಡೆಸಿದರು. 20 ಬಾರಿ ಎದುರಾಳಿ ಕೋಟೆಯೊಳಗೆ ನುಗ್ಗಿಹೋದ ಅವರು 10 ಅಂಕಗಳಿಸಿದರು. ಇದು ತಂಡದ ಪರ ದಾಖಲಾದ ಅತ್ಯುತ್ತಮ ಪ್ರದರ್ಶನ. ಈ ಇಡೀ ಕೂಟದಲ್ಲಿ ಕಂಡೊಲ ಅತ್ಯುತ್ತಮವಾಗಿಯೇ ಆಡುತ್ತಿದ್ದಾರೆನ್ನುವುದನ್ನು ಇಲ್ಲಿ ಗಮನಿಸಬೇಕು. ರಕ್ಷಣೆಯಲ್ಲಿ ಹರ್ಯಾಣದ ಕೈಹಿಡಿದಿದ್ದು ಸುನೀಲ್‌. ಅವರು 6 ಯತ್ನಗಳಲ್ಲಿ 4 ಅಂಕ ಗಳಿಸಿದರು.

ಗುಜರಾತ್‌ ಪರ ಸೋನು ಇದ್ದಿದ್ದರಲ್ಲಿ ಪರವಾಗಿಲ್ಲ ಎನ್ನುವ ದಾಳಿ ನಡೆಸಿದರು. ಅವರು 20 ಬಾರಿ ಎದುರಾಳಿ ಕೋಟೆಯೊಳಗೆ ನುಗ್ಗಿದರೂ, ಗಳಿಸಲು ಸಾಧ್ಯವಾಗಿದ್ದು 8 ಅಂಕ ಮಾತ್ರ. ಇದು ತಂಡದ ಸ್ಥಿತಿಯನ್ನು ತೋರಿಸುತ್ತದೆ. ರಕ್ಷಣೆಯಲ್ಲಿ ರೋಹಿತ್‌ ಗುಲಿಯ ಅತ್ಯುತ್ತಮ ಪ್ರದರ್ಶನ ನೀಡಿದರು.

ಅಗ್ರಸ್ಥಾನಿ ಡೆಲ್ಲಿಗೆ ಮತ್ತೂಂದು ಜಯ
ಭಾನುವಾರ ನಡೆದ ಮೊದಲ ಪಂದ್ಯದಲ್ಲಿ ಡೆಲ್ಲಿ ದಬಾಂಗ್‌ ತಂಡ 60-40 ಅಂಕಗಳಿಂದ ಪುನೇರಿ ಪಲ್ಟಾನ್‌ ತಂಡವನ್ನು ಹೀನಾಯವಾಗಿ ಸೋಲಿಸಿತು. ಪುನೇರಿ ಮೇಲೆರಗಿ ಹೋದ ಡೆಲ್ಲಿ ದಾಳಿಗಾರರು ಸ್ವಲ್ಪವೂ ಕರುಣೆ ತೋರಿಸದೆ, ಎದುರಾಳಿಯನ್ನು ಹೊಸಕಿ ಹಾಕಿದರು. ಡೆಲ್ಲಿ ಪರ ದಾಳಿಯಲ್ಲಿ ನವೀನ್‌ ಕುಮಾರ್‌ 19 ಅಂಕಗಳಿಸಿದರೆ, ರಕ್ಷಣೆಯಲ್ಲಿ ರವೀಂದರ್‌ ಪಹಲ್‌ 6 ಅಂಕಗಳಿಸಿದರು.