ಟೆಸ್ಟ್‌ನಲ್ಲಿ 2 ದ್ವಿಶತಕ: ರಹೀಂ ವಿಶ್ವದ ಮೊದಲ ವಿಕೆಟ್‌ಕೀಪರ್‌

Team Udayavani, Nov 13, 2018, 6:20 AM IST

ಢಾಕಾ: ಮುಶ್ಫಿàಕರ್‌ ರಹೀಂ ಅವರ ಅಮೋಘ ದ್ವಿಶತಕ ಪರಾಕ್ರಮದಿಂದ ಜಿಂಬಾಬ್ವೆ ವಿರುದ್ಧದ ಢಾಕಾ ಟೆಸ್ಟ್‌ ಪಂದ್ಯದಲ್ಲಿ ಬಾಂಗ್ಲಾದೇಶ 7 ವಿಕೆಟಿಗೆ 522 ರನ್‌ ಪೇರಿಸಿ ಡಿಕ್ಲೇರ್‌ ಮಾಡಿದೆ. ಇನಿಂಗ್ಸ್‌ ಆರಂಭಿಸಿದ ಜಿಂಬಾಬ್ವೆ 2ನೇ ದಿನದಾಟದ ಅಂತ್ಯಕ್ಕೆ ಒಂದು ವಿಕೆಟಿಗೆ 25 ರನ್‌ ಗಳಿಸಿದೆ. ಟೆಸ್ಟ್‌ನಲ್ಲಿ 2ನೇ ದ್ವಿಶತಕ ಬಾರಿಸಿದ ರಹೀಂ, ಈ ಸಾಧನೆ ಮಾಡಿದ ವಿಶ್ವದ ಮೊದಲ ವಿಕೆಟ್‌ ಕೀಪರ್‌  ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

111 ರನ್‌ ಮಾಡಿ ಬ್ಯಾಟಿಂಗ್‌ ಕಾಯ್ದುಕೊಂಡಿದ್ದ ರಹೀಂ ಸೋಮವಾರದ ಆಟದಲ್ಲಿ ಇದೇ ಲಯವನ್ನು ಮುಂದುವರಿಸಿ ಅಜೇಯ 219ರ ತನಕ ಬೆಳೆದರು. ಇದು ಅವರ 2ನೇ ದ್ವಿಶತಕ ಹಾಗೂ ಜೀವನಶ್ರೇಷ್ಠ ಗಳಿಕೆ. ಬಾಂಗ್ಲಾ ಇತಿಹಾಸದಲ್ಲೇ ಇನಿಂಗ್ಸ್‌ ಒಂದರಲ್ಲಿ ಅತೀ ಹೆಚ್ಚು 421 ಎಸೆತ ನಿಭಾಯಿಸಿದ ರಹೀಂ 18 ಬೌಂಡರಿ ಹಾಗೂ ಒಂದು ಸಿಕ್ಸರ್‌ ಬಾರಿಸಿದರು. ಇದು ಬಾಂಗ್ಲಾ ಟೆಸ್ಟ್‌ ಚರಿತ್ರೆಯಲ್ಲಿ ದಾಖಲಾದ ಸರ್ವಾಧಿಕ ವೈಯಕ್ತಿಕ ರನ್‌ ಎಂಬುದೊಂದು ವಿಶೇಷ. ಇದಕ್ಕೂ ಮುನ್ನ ಶಕೀಬ್‌ ಅಲ್‌ ಹಸನ್‌ ಕಳೆದ ವರ್ಷ ನ್ಯೂಜಿಲೆಂಡ್‌ ವಿರುದ್ಧ 217 ರನ್‌ ಹೊಡೆದದ್ದು ದಾಖಲೆಯಾಗಿತ್ತು.

ರಹೀಂ 200 ಪ್ಲಸ್‌ ರನ್‌ ಗಳಿಕೆಯ ಎರಡೂ ಸಂದರ್ಭಗಳಲ್ಲಿ ದೇಶದ ಸರ್ವಾಧಿಕ ವೈಯಕ್ತಿಕ ಮೊತ್ತದ ದಾಖಲೆ ಸ್ಥಾಪಿಸಿದ ವಿಶ್ವದ 6ನೇ ಬ್ಯಾಟ್ಸ್‌ಮನ್‌ ಎನಿಸಿದರು. ಉಳಿದವರೆಂದರೆ ಡಾನ್‌ ಬ್ರಾಡ್‌ಮನ್‌, ಜಾರ್ಜ್‌ ಹ್ಯಾಡ್ಲಿ, ವಿನೂ ಮಂಕಡ್‌, ಬ್ರಿಯಾನ್‌ ಲಾರಾ ಮತ್ತು ವೀರೇಂದ್ರ ಸೆಹವಾಗ್‌.