ಅಂಡರ್‌-19 ಬದಲು “ಎ’ ತಂಡದೊಂದಿಗೆ ದ್ರಾವಿಡ್‌ ಪ್ರವಾಸ

Team Udayavani, Jul 5, 2017, 10:00 AM IST

ಹೊಸದಿಲ್ಲಿ: ಇತ್ತೀಚೆಗೆ ಭಾರತ ತಂಡದ ಮಾಜಿ ನಾಯಕ, “ಗೋಡೆ’ ಖ್ಯಾತಿಯ ರಾಹುಲ್‌ ದ್ರಾವಿಡ್‌ ಭಾರತ “ಎ’ ಮತ್ತು ಭಾರತದ ಅಂಡರ್‌-19 ಕ್ರಿಕೆಟ್‌ ತಂಡದ ಕೋಚ್‌ ಆಗಿ ಮುಂದುವರಿದಿದ್ದರು. ಇದಕ್ಕಾಗಿ ಅವರು ಐಪಿಎಲ್‌ನ ಡೆಲ್ಲಿ ಡೇರ್‌ಡೆವಿಲ್ಸ್‌ ತಂಡದ  ಮೆಂಟರ್‌ ಹುದ್ದೆಯನ್ನೇ ತ್ಯಜಿಸಿದ್ದರು. 

ಆದರೆ ಕೋಚ್‌ ಆಗಿ ದ್ರಾವಿಡ್‌ ಮುಂದುವರಿಕೆ ಖಚಿತವಾಗುತ್ತಿದ್ದಂತೆ ಅವರು ಸಣ್ಣ ಸಂದಿಗ್ಧದಲ್ಲಿ ಬಿದ್ದಿದ್ದಾರೆ. ಭಾರತ ಎ ತಂಡ ಮತ್ತು ಅಂಡರ್‌-19 ತಂಡಗಳ ಪ್ರವಾಸ ಒಂದೇ ಬಾರಿಗೆ ನಡೆಯಲಿದೆ. ಆದ್ದರಿಂದ ಯಾವ ತಂಡದೊಂದಿಗೆ ತೆರಳುವುದು ಎಂಬುದು ಅವರ ಗೊಂದಲಕ್ಕೆ ಕಾರಣ. ಕಡೆಗೂ ದ್ರಾವಿಡ್‌ “ಎ’ ತಂಡದೊಂದಿಗೆ ಪ್ರವಾಸ ಮಾಡುವ ತೀರ್ಮಾನ ತೆಗೆದುಕೊಂಡಿದ್ದಾರೆ. 

ಸದ್ಯದಲ್ಲಿಯೇ ಅಂಡರ್‌-19 ತಂಡ ಇಂಗ್ಲೆಂಡ್‌ ಪ್ರವಾಸಕ್ಕೆ ತೆರಳಲಿದೆ. ಅದೇ ರೀತಿ “ಎ’ ತಂಡ 4 ದಿನಗಳ 2 ಪಂದ್ಯ, ಏಕದಿನ ತ್ರಿಕೋನ ಸರಣಿಗಾಗಿ ದಕ್ಷಿಣ ಆಫ್ರಿಕಾ ಪ್ರವಾಸ ಮಾಡಲಿದೆ. ಈ ಎರಡರಲ್ಲಿ ದ್ರಾವಿಡ್‌ ಭಾರತ “ಎ’ ತಂಡದ ಜತೆ ಪ್ರವಾಸಕ್ಕೆ ಮುಂದಾಗಿದ್ದಾರೆ.  ಅಂಡರ್‌-19 ತಂಡಕ್ಕೆ ತಾತ್ಕಾಲಿಕ ಕೋಚ್‌ ನೇಮಿಸಿಕೊಳ್ಳಲು ಬಿಸಿಸಿಐ ಮುಂದಾಗಿದೆ.