ರಾಜಸ್ಥಾನ್‌ ರಾಯಲ್ಸ್‌ ಕೋಚ್‌ ದಿಶಾಂತ್‌ಗೆ ಸೋಂಕು

Team Udayavani, Aug 12, 2020, 10:56 PM IST

ಹೊಸದಿಲ್ಲಿ: ಇನ್ನೇನು ಈ ವರ್ಷದ ಐಪಿಎಲ್‌ ಪಂದ್ಯಾವಳಿ ಆರಂಭವಾಗಲಿದೆ ಎಂಬ ಖುಷಿಯಲ್ಲಿರುವಾಗಲೇ ಈ ಶ್ರೀಮಂತ ಕೂಟದ ಮೇಲೆ ಕೋವಿಡ್ ಕರಿನೆರಳು ಆವರಿಸತೊಡಗಿದೆ. ರಾಜಸ್ಥಾನ್‌ ರಾಯಲ್ಸ್‌ ತಂಡದ ಫೀಲ್ಡಿಂಗ್‌ ಕೋಚ್‌ ದಿಶಾಂತ್‌ ಯಾಗ್ನಿಕ್‌ ಅವರಲ್ಲಿ ಸೋಂಕು ದೃಢಪಟ್ಟಿದೆ. ತಂಡಗಳೆಲ್ಲ ಮುಂದಿನ ವಾರ ಯುಎಇಗೆ ತೆರಳುವ ಹೊತ್ತಿನಲ್ಲೇ ಈ ಆಘಾತಕಾರಿ ಸುದ್ದಿ ಪ್ರಕಟಗೊಂಡಿದೆ.

ದಿಶಾಂತ್‌ ಯಾಗ್ನಿಕ್‌ ಉದಯಪುರ ದಲ್ಲಿದ್ದು, 14 ದಿನಗಳ ಕ್ವಾರಂಟೈನ್‌ನಲ್ಲಿ ರಲು ಆಸ್ಪತ್ರೆಗೆ ದಾಖಲಾಗುವಂತೆ ಸೂಚಿ ಸಲಾಗಿದೆ. ಅವರು ಇನ್ನೂ ಎರಡು ಸಲ ಕೋವಿಡ್‌-19 ಪರೀಕ್ಷೆಗೆ ಒಳಗಾ ಗಬೇಕಿದ್ದು, ಇಲ್ಲಿ ನೆಗೆಟಿವ್‌ ಬಂದರಷ್ಟೇ ತಂಡಕ್ಕೆ ಮರಳಲಿದ್ದಾರೆ.

ಯುಎಇಗೆ ಆಗಮಿಸಿದ ಬಳಿಕ 6 ದಿನಗಳ ಕಾಲ ಯಾಗ್ನಿಕ್‌ ಸೆಲ್ಫ್ ಐಸೊ ಲೇಶನ್‌ನಲ್ಲಿ ಇರಬೇಕಾಗುತ್ತದೆ. ಈ ಅವಧಿ ಯಲ್ಲಿ 3 ಸಲ ಕೋವಿಡ್‌-19 ಪರೀಕ್ಷೆಗೆ ಒಳಗಾಗಲಿದ್ದಾರೆ. ಎರಡು ನೆಗೆಟಿವ್‌ ಫ‌ಲಿತಾಂಶ ಬಂದ ಬಳಿಕವಷ್ಟೇ ಅವರು ತಂಡವನ್ನು ಸೇರಿಕೊಳ್ಳಲು ಅರ್ಹರು.

ಮುಂದಿನ ವಾರ ಯುಎಇಗೆ ತೆರ ಳುವ ಕಾರಣ ತಂಡದ ಸದಸ್ಯರೆಲ್ಲ ಮುಂಬಯಿಯಲ್ಲಿ ಸೇರಬೇಕಾಗಿದ್ದು, ಬಿಸಿಸಿಐ ಎರಡು ಕೋವಿಡ್‌-19 ಟೆಸ್ಟ್‌ ಆಯೋಜಿಸಲಿದೆ. ಆದರೆ ಇದಕ್ಕೂ ಮೊದಲೇ ಯಾಗ್ನಿಕ್‌ ಅವರಲ್ಲಿ ಪಾಸಿಟಿವ್‌ ಕಂಡುಬಂದಿದೆ.

ಆಟಗಾರರ ಸಂಪರ್ಕವಿಲ್ಲ
ಕಳೆದ 10 ದಿನಗಳಿಂದ ದಿಶಾಂತ್‌ ಯಾಗ್ನಿಕ್‌ ಸಂಪರ್ಕದಲ್ಲಿದ್ದವರೆಲ್ಲ ಸೆಲ್ಫ್ ಐಸೊಲೇಶನ್‌ಗೆ ಒಳಗಾಗಿ ಕೋವಿಡ್‌-19 ಪರೀಕ್ಷೆಗೆ ಒಳಗಾಗುವಂತೆ ರಾಜಸ್ಥಾನ್‌ ರಾಯಲ್ಸ್‌ ತನ್ನ ಪ್ರಕಟನೆಯಲ್ಲಿ ತಿಳಿಸಿದೆ. ಆದರೆ ಯಾವುದೇ ಆಟಗಾರರು ದಿಶಾಂತ್‌ ಯಾಗ್ನಿಕ್‌ ಸಂಪರ್ಕಕ್ಕೆ ಬಂದಿಲ್ಲ ಎಂಬುದಾಗಿ ಫ್ರಾಂಚೈಸಿ ಸ್ಪಷ್ಟಪಡಿಸಿದ್ದು, ಅವರು ಶೀಘ್ರದಲ್ಲಿ ಗುಣಮುಖರಾಗಿ ಯುಎಇಗೆ ಹೊರಡುವಂತಾಗಲಿ ಎಂದು ಹಾರೈಸಿದೆ.
37 ವರ್ಷದ ದಿಶಾಂತ್‌ ಯಾಗ್ನಿಕ್‌ ಎಡಗೈ ಹಾರ್ಡ್‌ ಹಿಟ್ಟಿಂಗ್‌ ಬ್ಯಾಟ್ಸ್‌ಮನ್‌ ಹಾಗೂ ವಿಕೆಟ್‌ ಕೀಪರ್‌ ಆಗಿದ್ದರು. 25 ಐಪಿಎಲ್‌ ಪಂದ್ಯಗಳಿಂದ 170 ರನ್‌ ಬಾರಿಸಿದ್ದಾರೆ.