ರಾಜಸ್ಥಾನ್‌ ತಂಡದಿಂದ ಕ್ಯಾನ್ಸರ್‌ ಜಾಗೃತಿ

Team Udayavani, May 10, 2018, 7:00 AM IST

ಜೈಪುರ: ರಾಜಸ್ಥಾನ್‌ ರಾಯಲ್ಸ್‌ ತಂಡ ಕ್ಯಾನ್ಸರ್‌ ಜಾಗೃತಿ ಅಭಿಯಾನವೊಂದನ್ನು ಕೈಗೊಂಡಿದ್ದು, ಇದಕ್ಕೆ ಸಂಬಂಧಿಸಿದಂತೆ ನೂತನ ಐಪಿಎಲ್‌ ಜೆರ್ಸಿಯನ್ನು ಬಿಡುಗಡೆ ಮಾಡಿದೆ. ಗುಲಾಲಿ ಬಣ್ಣದ ಈ ಸಮವಸ್ತ್ರವನ್ನು ರಾಜಸ್ಥಾನ್‌ ಕ್ರಿಕೆಟಿಗರು ಮೇ 11ರಂದು ಚೆನ್ನೈ ಎದುರಿನ ಪಂದ್ಯದ ವೇಳೆ ಧರಿಸಿ ಕಣಕ್ಕಿಳಿಯಲಿದ್ದಾರೆ.

ಟಾಟಾ ಟ್ರಸ್ಟ್‌ ಜತೆಗೂಡಿ ರಾಜಸ್ಥಾನ್‌ ರಾಯಲ್ಸ್‌ ಈ ಜಾಗೃತಿ ಅಭಿಯಾನ ಕೈಗೊಂಡಿದೆ. ರಾಜಸ್ಥಾನ ಸರಕಾರ, ನ್ಯಾಶನಲ್‌ ಕ್ಯಾನ್ಸರ್‌ ಗ್ರಿಡ್‌, ಇಂಡಿಯನ್‌ ಕ್ಯಾನ್ಸರ್‌ ಸೊಸೈಟಿ ಮತ್ತು ಇಂಡಿಯನ್‌ ಡೆಂಟಲ್‌ ಅಸೋಸಿಯೇಶನ್‌ ಈ ಅಭಿಯಾನವನ್ನು ಬೆಂಬಲಿಸಲಿವೆ.

ರಾಜಸ್ಥಾನ್‌ ಕ್ರಿಕೆಟಿಗರಾದ ಅಜಿಂಕ್ಯ ರಹಾನೆ, ಹೆನ್ರಿಕ್‌ ಕ್ಲಾಸೆನ್‌, ಕೆ. ಗೌತಮ್‌ ಮತ್ತು ಮಹಿಪಾಲ್‌ ಲೊನ್ರೋರ್‌ ಜೈಪುರದ ಎಸ್‌.ಎಂ.ಎಸ್‌. ಮೆಡಿಕಲ್‌ ಕಾಲೇಜ್‌ ಆಸ್ಪತ್ರೆಗೆ ತೆರಳಿ ಕ್ಯಾನ್ಸರ್‌ ಪೀಡಿತರನ್ನು ಭೇಟಿ ಮಾಡಿ ಸಂತೈಸುವ ಮೂಲಕ ಅಭಿಯಾನವನ್ನು ಆರಂಭಿಸಿದರು. ಬಳಿಕ ಸ್ಥಳೀಯ ವೈದ್ಯರ ಉಪಸ್ಥಿತಿಯಲ್ಲಿ ನೂತನ ಜೆರ್ಸಿಯನ್ನು ಬಿಡುಗಡೆ ಮಾಡಿದರು.