Rajinikanth: ವಿಶ್ವಕಪ್‌ಗೆ ರಜಿನಿಕಾಂತ್‌”ಗೋಲ್ಡನ್‌” ಅತಿಥಿ

Team Udayavani, Sep 20, 2023, 10:16 AM IST

ಚೆನ್ನೈ: ಅ.5ರಿಂದ ಅಹ್ಮದಾಬಾದ್‌ನಲ್ಲಿ ಐಸಿಸಿ ಏಕದಿನ ವಿಶ್ವಕಪ್‌ ಆರಂಭವಾಗಲಿದೆ. ಈ ಕೂಟದ ಗೋಲ್ಡನ್‌ ಟಿಕೆಟ್‌ ಸೂಪರ್‌ಸ್ಟಾರ್‌ ರಜಿನೀಕಾಂತ್‌ಗೆ ಸಿಕ್ಕಿದೆ. ತಮ್ಮ ಅಭಿನಯ, ವಿಭಿನ್ನ ಹಾವಭಾವಗಳ ಮೂಲಕ ರಜನಿಕಾಂತ್‌ ಇಡೀ ದೇಶದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿದ್ದಾರೆ.

ಅವರು ವಿಶ್ವಕಪ್‌ನಲ್ಲಿ ಗಣ್ಯಾತಿಗಣ್ಯ ವಿಶೇಷ ಅತಿಥಿಗಳ ಪಟ್ಟಿಯಲ್ಲಿ ಸ್ಥಾನಪಡೆದಿದ್ದಾರೆ. ಇಂತಹ ಅತಿಥಿಗಳಿಗೆ ಯಾವುದೇ ಗೋಜಲುಗಳಿಲ್ಲದೇ ನೇರವಾಗಿ ಪಂದ್ಯದ ವೇಳೆ ಪ್ರವೇಶ ಸಿಗಲಿದೆ. ಅ.8ರಂದು ಚೆನ್ನೈನಲ್ಲಿ ಭಾರತ-ಆಸ್ಟ್ರೇಲಿಯ ನಡುವೆ ಅತ್ಯಂತ ಮಹತ್ವದ ಪಂದ್ಯ ನಡೆಯಲಿದೆ. ಇದರ ವೀಕ್ಷಣೆಗೆ ರಜಿನಿ ಹಾಜರಾಗುವ ನಿರೀಕ್ಷೆಯಿದೆ. ಇನ್ನುಳಿದಂತೆ ಅವರು ಯಾವ ಪಂದ್ಯಗಳಿಗೆ ಹೋಗುತ್ತಾರೆನ್ನುವುದನ್ನು ಕಾದು ನೋಡಬೇಕು. ಬಿಸಿಸಿಐ ಕಾರ್ಯದರ್ಶಿ ಜಯ್‌ ಶಾ ತಾವೇ ಸ್ವತಃ ಟಿಕೆಟನ್ನು ರಜನಿಕಾಂತ್‌ಗೆ ತಲುಪಿಸಿದ್ದಾರೆ.

ಈ ಬಗ್ಗೆ ಟ್ವೀಟ್‌ ಮಾಡಿರುವ ಬಿಸಿಸಿಐ, ತಲೈವಾ ಐಸಿಸಿ ವಿಶ್ವಕಪ್‌ನಲ್ಲಿ ನಮ್ಮ ವಿಶೇಷ ಅತಿಥಿಯಾಗಿ ಪಂದ್ಯಗಳನ್ನು ವೀಕ್ಷಿಸಲಿದ್ದಾರೆ. ತಮ್ಮ ಹಾಜರಾತಿಯಿಂದ ಬೃಹತ್‌ ಕೂಟದಕಳೆಯನ್ನು ಹೆಚ್ಚಿಸಲಿದ್ದಾರೆ. ಅವರು ಸಿನಿಮಾವನ್ನು, ಭಾಷೆಗಳನ್ನು, ಸಂಸ್ಕೃತಿಗಳನ್ನು ಮೀರಿ ಬೆಳೆಯುವ ಮೂಲಕ ಲಕ್ಷಾಂತರ ವ್ಯಕ್ತಿಗಳ ಮೇಲೆ ವಿಶೇಷ ಪ್ರಭಾವ ಬೀರಿದ್ದಾರೆ ಎಂದು ಹೇಳಿದೆ.