Ranji Trophy: ಇನ್ನಿಂಗ್ಸ್‌ ನ ಎಲ್ಲಾ 10 ವಿಕೆಟ್‌ ಕಿತ್ತು ಅನ್ಶುಲ್‌ ಕಾಂಬೋಜ್‌ ದಾಖಲೆ

Team Udayavani, Nov 15, 2024, 12:16 PM IST

ರೋಹ್ಟಕ್:‌ ಕೇರಳ ತಂಡದ ವಿರುದ್ದದ ರಣಜಿ ಪಂದ್ಯದಲ್ಲಿ ಹರ್ಯಾಣ ತಂಡದ ಬೌಲರ್‌ ಅನ್ಶುಲ್‌ ಕಾಂಬೋಜ್‌ ದಾಖಲೆಯೊಂದನ್ನು ಬರೆದಿದ್ದಾರೆ. ಇನ್ನಿಂಗ್ಸ್‌ ನ ಎಲ್ಲಾ ಹತ್ತು ವಿಕೆಟ್‌ ಗಳನ್ನು ಕಿತ್ತು ರಣಜಿ ಟ್ರೋಫಿ ದಾಖಲೆ ಬರೆದಿದ್ದಾರೆ.

49 ರನ್‌ ಗಳಿಗೆ ಕಾಂಬೋಜ್ ಹತ್ತು ವಿಕೆಟ್‌ ಕಿತ್ತರು. ರಣಜಿ ಟ್ರೋಫಿ ಇತಿಹಾಸದಲ್ಲಿ ಇನ್ನಿಂಗ್ಸ್‌ ನಲ್ಲಿ ಎಲ್ಲಾ ವಿಕೆಟ್‌ಗಳನ್ನು ಪಡೆದ ಮೂರನೇ ಬೌಲರ್ ಎನಿಸಿಕೊಂಡರು. ಬಂಗಾಳದ ಪ್ರೇಮಾಂಗ್ಶು ಚಟರ್ಜಿ (10/20, ಅಸ್ಸಾಂ ವಿರುದ್ದ 1956) ಮತ್ತು ರಾಜಸ್ಥಾನದ ಪ್ರದೀಪ್ ಸುಂದರಂ (10/78, ವಿದರ್ಭ ವಿರುದ್ಧ, 1985) ಈ ಹಿಂದೆ ಈ ಸಾಧನೆ ಮಾಡಿದ್ದರು.

ಒಟ್ಟಾರೆಯಾಗಿ, ಅನ್ಶುಲ್ ಕಾಂಬೋಜ್ ಪ್ರಥಮ ದರ್ಜೆ ಕ್ರಿಕೆಟ್‌‌ ನಲ್ಲಿ 10 ವಿಕೆಟ್ ಪಡೆದ ಆರನೇ ಭಾರತೀಯರಾಗಿದ್ದಾರೆ. ಅನಿಲ್ ಕುಂಬ್ಳೆ, ಸುಭಾಷ್ ಗುಪ್ತೆ ಮತ್ತು ದೇಬಶಿಶ್ ಮೊಹಾಂತಿ ಈ ಪಟ್ಟಿಯಲ್ಲಿರುವ ಇತರರು.

ಹರ್ಯಾಣ ಪರ ಒಂದೇ ಇನ್ನಿಂಗ್ಸ್‌ ನಲ್ಲಿ ಅತಿ ಹೆಚ್ಚು ವಿಕೆಟ್‌ ಪಡೆದ ಬೌಲರ್‌ ಗಳ ದಾಖಲೆ ಬರೆದಿದ್ದಾರೆ. ಈ ಹಿಂದೆ 2004-05ರ ಸೀಸನ್‌ ನಲ್ಲಿ ವಿದರ್ಭ ವಿರುದ್ದ ಜೋಗಿಂದರ್‌ ಶರ್ಮಾ ಅವರು ಎಂಟು ವಿಕೆಟ್‌ ಪಡೆದಿದ್ದರು.

ಪಂದ್ಯದ ಎರಡನೇ ದಿನದಾಟದ ಅಂತ್ಯಕ್ಕೆ ಅನ್ಶುಲ್‌ ಕಾಂಬೋಜ್‌ ಎಂಟು ವಿಕೆಟ್‌ ಪಡೆದಿದ್ದರು. ಮೂರನೇ ದಿನವಾದ ಶುಕ್ರವಾರ (ನ.15) ಬಾಸಿಲ್‌ ಥಂಪಿ, ಶೌನ್‌ ರೋಜರ್‌ ಅವರ ವಿಕೆಟ್‌ ಪಡೆದ ದಾಖಲೆ ಬರೆದರು.

ಮೊದಲ ಇನ್ನಿಂಗ್ಸ್‌ ನಲ್ಲಿ ಕೇರಳ 291 ರನ್‌ ಬಾರಿಸಿದ್ದರು. ಅಕ್ಷಯ್‌ ಚಂದ್ರನ್‌ 59 ರನ್‌, ಕುನ್ನುಮ್ಮಲ್‌ 55 ರನ್‌, ನಾಯಕ ಸಚಿನ್‌ ಬೇಬಿ 52 ರನ್‌, ಅಜರುದ್ದೀನ್‌ 53 ರನ್‌ ಮಾಡಿದರು.