ಸರ್ಫರಾಜ್‌ ಶತಕ; ಮುಂಬಯಿ ಮೇಲುಗೈ

Team Udayavani, Jan 4, 2023, 9:49 PM IST

ಮುಂಬಯಿ: ತಮಿಳುನಾಡು ವಿರುದ್ಧದ ರಣಜಿ ಮುಖಾಮುಖೀಯಲ್ಲಿ ಮುಂಬಯಿ ಭರ್ಜರಿ ಮೇಲುಗೈ ಸಾಧಿಸಿದೆ. ಸರ್ಫರಾಜ್‌ ಖಾನ್‌ ಅವರ ಅಮೋಘ 162 ರನ್‌ ಸಾಹಸದಿಂದ 481 ರನ್‌ ಪೇರಿಸಿ 337 ರನ್ನುಗಳ ಭಾರೀ ಮುನ್ನಡೆ ಗಳಿಸಿದೆ.

ತಮಿಳುನಾಡು ಮೊದಲ ಇನ್ನಿಂಗ್ಸ್‌ನಲ್ಲಿ 144 ರನ್‌ ಗಳಿಸಿತ್ತು. ಈ ಮೊತ್ತವನ್ನು ಸರ್ಫರಾಜ್‌ ಒಬ್ಬರೇ ಮೀರಿ ನಿಂತರು. ಅವರ 162 ರನ್‌ ಕೇವಲ 220 ಎಸೆತಗಳಿಂದ ಬಂತು. ಸಿಡಿಸಿದ್ದು 19 ಬೌಂಡರಿ ಹಾಗೂ ಒಂದು ಸಿಕ್ಸರ್‌. ಕೆಳ ಕ್ರಮಾಂಕದ ಆಟಗಾರರಾದ ತನುಷ್‌ ಕೋಟ್ಯಾನ್‌ 71 ರನ್‌ (114 ಎಸೆತ, 8 ಬೌಂಡರಿ, 1 ಸಿಕ್ಸರ್‌), ಮೋಹಿತ್‌ ಅವಸ್ತಿ 69 ರನ್‌ (97 ಎಸೆತ, 8 ಬೌಂಡರಿ, 1 ಸಿಕ್ಸರ್‌) ಮತ್ತು ಸಿದ್ಧಾರ್ಥ್ ರಾವುತ್‌ ಅಜೇಯ 31 ರನ್‌ ಮಾಡಿದರು.

ಮುಂಬಯಿಯ 6 ವಿಕೆಟ್‌ 161ಕ್ಕೆ ಹಾರಿ ಹೋಗಿತ್ತು. ಕೊನೆಯ 4 ವಿಕೆಟ್‌ಗಳಿಂದ 320 ರನ್‌ ಹರಿದು ಬಂತು. ದ್ವಿತೀಯ ಇನ್ನಿಂಗ್ಸ್‌ ಆರಂಭಿಸಿರುವ ತಮಿಳುನಾಡು ಒಂದು ವಿಕೆಟಿಗೆ 62 ರನ್‌ ಗಳಿಸಿದೆ. ಇನ್ನೂ 275 ರನ್‌ ಹಿನ್ನಡೆಯಲ್ಲಿದೆ.

ಸಂಕ್ಷಿಪ್ತ ಸ್ಕೋರ್‌: ತಮಿಳುನಾಡು-144 ಮತ್ತು ಒಂದು ವಿಕೆಟಿಗೆ 82. ಮುಂಬಯಿ-481 (ಸಫ‌ìರಾಜ್‌ ಖಾನ್‌ 162, ತನುಷ್‌ ಕೋಟ್ಯಾಟನ್‌ 71, ಮೋಹಿತ್‌ ಅವಸ್ತಿ 69, ಅಜಿಂಕ್ಯ ರಹಾನೆ 42, ಅಶ್ವಿ‌ನ್‌ ಕ್ರಿಸ್ಟ್‌ 69ಕ್ಕೆ 3, ತ್ರಿಲೋಕ್‌ ನಾಗ್‌ 110ಕ್ಕೆ 3, ಸಾಯಿ ಕಿಶೋರ್‌ 124ಕ್ಕೆ 2).