ODI World Cup 2023 ನಲ್ಲಿ ಅಶ್ವಿನ್ ಆಡುತ್ತಾರಾ..?: ಮೌನ ಮುರಿದ ಸ್ಪಿನ್ನರ್

Team Udayavani, Aug 17, 2023, 3:46 PM IST

ಮುಂಬೈ: 2022 ರ ಟಿ 20 ವಿಶ್ವಕಪ್‌ ಗೆ ನಾಟಕೀಯವಾಗಿ ಮರಳಿದ ರವಿಚಂದ್ರನ್ ಅಶ್ವಿನ್ ಇದೀಗ ಏಕದಿನ ವಿಶ್ವಕಪ್ ಗೆ ಆಯ್ಕೆಯಾಗುವ ಬಗ್ಗೆ ಖಚಿತವಾಗಿಲ್ಲ. 2022ರ ಐಪಿಎಲ್ ನಲ್ಲಿ ಉತ್ತಮ ಪ್ರದರ್ಶನ ನೀಡಿ ಭಾರತದ ಟಿ20 ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆದಿದ್ದ ಅಶ್ವಿನ್, ಏಕದಿನ ವಿಶ್ವಕಪ್ ನಲ್ಲಿ ಸ್ಥಾನ ಪಡೆಯುವ ಬಗ್ಗೆ ಅನುಮಾನಗಳಿವೆ.

ಈ ಬಗ್ಗೆ ಸ್ವತಃ ಮಾತನಾಡಿರುವ ಅಶ್ವಿನ್, ಅಂತಹ ಆಲೋಚನೆಗಳಿಗೆ ಮನಸ್ಸಿನಲ್ಲಿ ಯಾವುದೇ ಸ್ಥಳವನ್ನು ನೀಡದಿರಲು ತಾನು ಬಹಳ ಹಿಂದೆಯೇ ನಿರ್ಧರಿಸಿದ್ದೇನೆ ಎಂದು ಹೇಳಿದರು.

ಏಕದಿನ ವಿಶ್ವಕಪ್ ಆಯ್ಕೆಗೆ ಪರಿಗಣಿಸದಿರುವುದು ನಿಮ್ಮ ಮೇಲೆ ಪರಿಣಾಮ ಬೀರುತ್ತದೆಯೇ ಎಂದು ಕೇಳಿದಾಗ ಅಶ್ವಿನ್, “ನಾನು ಹಾಗೆ ಯೋಚಿಸುವುದಿಲ್ಲ, ಏಕೆಂದರೆ ತಂಡದ ಆಯ್ಕೆ ನನ್ನ ಕೆಲಸವಲ್ಲ”ಎಂದಿದ್ದಾರೆ.

“ನನ್ನ ಕೈಯಲ್ಲಿಲ್ಲದ ವಿಷಯಗಳ ಬಗ್ಗೆ ನಾನು ಯೋಚಿಸುವುದಿಲ್ಲ ಎಂದು ನಾನು ಬಹಳ ಹಿಂದೆಯೇ ನಿರ್ಧರಿಸಿದ್ದೆ. ನಾನು ಜೀವನ ಮತ್ತು ನನ್ನ ಕ್ರಿಕೆಟ್ ವಿಷಯದಲ್ಲಿ ಪ್ರಾಮಾಣಿಕವಾಗಿ ಉತ್ತಮ ಜಾಗದಲ್ಲಿದ್ದೇನೆ. ನನ್ನ ಆಲೋಚನೆ ಪ್ರಕ್ರಿಯೆಯಿಂದ ನಕಾರಾತ್ಮಕತೆಯನ್ನು ದೂರವಿರಿಸಲು ಪ್ರಯತ್ನಿಸುತ್ತೇನೆ” ಎಂದು ಅಶ್ವಿನ್ ಟೈಮ್ಸ್ ಆಫ್ ಇಂಡಿಯಾಗೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.

“ನಾನು ಈ ದಿನದಲ್ಲಿ ಬದುಕುತ್ತೇನೆ. ಆದರೆ ನಾನು ಆಡದಿದ್ದರೂ ಭಾರತ ಮತ್ತೆ ವಿಶ್ವಕಪ್ ಗೆಲ್ಲುವುದನ್ನು ನೋಡಲು ನಾನು ಇಷ್ಟಪಡುತ್ತೇನೆ” ಎಂದು ಸ್ಪಿನ್ನರ್ ಹೇಳಿದರು.