ರಾವಲ್ಪಿಂಡಿ ಟೆಸ್ಟ್‌: 4ನೇ ದಿನದಾಟ ರದ್ದು

Team Udayavani, Dec 14, 2019, 10:58 PM IST

ರಾವಲ್ಪಿಂಡಿ: ಮತ್ತೆ ಸುರಿದ ಭಾರೀ ಮಳೆಯಿಂದ ಪಾಕಿಸ್ಥಾನ-ಶ್ರೀಲಂಕಾ ನಡುವಿನ ರಾವಲ್ಪಿಂಡಿ ಟೆಸ್ಟ್‌ ಪಂದ್ಯದ 4ನೇ ದಿನದಾಟ ಒಂದೂ ಎಸೆತ ಕಾಣದೆ ರದ್ದುಗೊಂಡಿತು. ಇದರೊಂದಿಗೆ ಈ ಪಂದ್ಯ ಡ್ರಾ ಅಲ್ಲದೇ ಬೇರೆ ಯಾವುದೇ ಫ‌ಲಿತಾಂಶ ದಾಖಲಿಸುವ ಸಾಧ್ಯತೆ ಇಲ್ಲವಾಗಿದೆ.

ದಶಕದ ಬಳಿಕ ಪಾಕಿಸ್ಥಾನದಲ್ಲಿ ಟೆಸ್ಟ್‌ ಪಂದ್ಯ ನಡೆಯಲಿದೆ ಎಂಬ ಖುಷಿಯಲ್ಲಿದ್ದ ಕ್ರಿಕೆಟ್‌ ಅಭಿಮಾನಿಗಳಿಗೆ, ಪಿಸಿಬಿಗೆ ಇದರಿಂದ ತೀವ್ರ ನಿರಾಸೆಯಾಗಿದೆ.

ಈ ವರೆಗಿನ 4 ದಿನಗಳ ಆಟದಲ್ಲಿ ಒಂದು ಇನ್ನಿಂಗ್ಸ್‌ ಕೂಡ ಪೂರ್ತಿಯಾಗಿಲ್ಲ. ಕೇವಲ 91.5 ಓವರ್‌ಗಳ ಆಟವಷ್ಟೇ ಸಾಧ್ಯವಾಗಿದೆ. ಮೊದಲು ಬ್ಯಾಟಿಂಗ್‌ ನಡೆಸುತ್ತಿದ್ದ ಶ್ರೀಲಂಕಾ 6 ವಿಕೆಟಿಗೆ 282 ರನ್‌ ಮಾಡಿದೆ. ಧನಂಜಯ ಡಿ ಸಿಲ್ವ 87, ದಿಲುÅವಾನ್‌ ಪೆರೆರ 6 ರನ್‌ ಗಳಿಸಿ ಬ್ಯಾಟಿಂಗ್‌ ಕಾಯ್ದುಕೊಂಡಿದ್ದಾರೆ.

ಪಾಕಿಸ್ಥಾನ ಪರ 16ರ ಹರೆಯದ ಪೇಸ್‌ ಬೌಲರ್‌ ನಸೀಮ್‌ ಶಾ ಮತ್ತು ಶಹೀನ್‌ ಅಫ್ರಿದಿ ತಲಾ 2 ವಿಕೆಟ್‌ ಉರುಳಿಸಿದ್ದಾರೆ.ಮೊದಲ ದಿನ ಮಾತ್ರ ಹವಾಮಾನ ಒಂದಿಷ್ಟು ಅನುಕೂಲಕರವಾಗಿತ್ತು. 68.1 ಓವರ್‌ಗಳ ಆಟ ನಡೆಯಿತು. ಆದರೆ 2ನೇ ದಿನ 18.2 ಓವರ್‌, 3ನೇ ದಿನ 5.2 ಓವರ್‌ಗಳ ಆಟವಷ್ಟೇ ಸಾಗಿತು.