ಫೆಡರರ್‌-ವಾವ್ರಿಂಕ ಮುಖಾಮುಖೀ

Team Udayavani, Mar 20, 2017, 2:57 PM IST

ಇಂಡಿಯನ್‌ ವೆಲ್ಸ್‌: ಇಂಡಿಯನ್‌ ವೆಲ್ಸ್‌ ಪುರುಷರ ಸಿಂಗಲ್ಸ್‌ ಫೈನಲ್‌ನಲ್ಲಿ ಸ್ವಿಸ್‌ ಟೆನಿಸ್‌ ತಾರೆಯರಿಬ್ಬರ ಮುಖಾಮುಖೀಗೆ ವೇದಿಕೆ ಸಿದ್ಧಗೊಂಡಿದೆ. ರೋಜರ್‌ ಫೆಡರರ್‌ ಮತ್ತು ಸ್ಟಾನಿಸ್ಲಾಸ್‌ ವಾವ್ರಿಂಕ ಪ್ರಶಸ್ತಿಗಾಗಿ ಹೋರಾಟ ನಡೆಸಲಿದ್ದಾರೆ. ವರ್ಷಾರಂಭದಲ್ಲಿ ಆಸ್ಟ್ರೇಲಿಯನ್‌ ಓಪನ್‌ ಪ್ರಶಸ್ತಿಯೊಂದಿಗೆ 18ನೇ ಗ್ರ್ಯಾನ್‌ಸ್ಲಾಮ್‌ ಗೆದ್ದು ಮಿಂಚಿದ ಫೆಡರರ್‌, ಶನಿವಾರ ರಾತ್ರಿಯ ಸೆಮಿಫೈನಲ್‌ ಸೆಣಸಾಟದಲ್ಲಿ ಅಮೆರಿಕದ ಜಾಕ್‌ ಸೋಕ್‌ ಅವರನ್ನು 6-1, 7-6 (7-4) ಅಂತರದಿಂದ ಹಿಮ್ಮೆಟ್ಟಿಸಿದರು. ಇನ್ನೊಂದು ಸೆಮಿಸೆಣಸಾಟದಲ್ಲಿ ಸ್ಟಾನಿಸ್ಲಾಸ್‌ ವಾವ್ರಿಂಕ ಸ್ಪೇನಿನ ಪಾಬ್ಲೊ ಕರೆನೊ ಬುಸ್ಟ ಅವರನ್ನು 6-3, 6-2ರಿಂದ ಪರಾಭವಗೊಳಿಸಿದರು.

ವಾವ್ರಿಂಕ ಈ ಕೂಟದ ಕ್ವಾರ್ಟರ್‌ ಫೈನಲ್‌ ದಾಟುತ್ತಿರುವುದು ಇದೇ ಮೊದಲು. ಈ ವರ್ಷ ಆಕ್ಲೆಂಡ್‌ ಮತ್ತು ಡೆಲ್ರೆ ಬೀಚ್‌ ಟೆನಿಸ್‌ ಪ್ರಶಸ್ತಿ ಜಯಿಸಿ ಪ್ರಚಂಡ ಫಾರ್ಮ್ನಲ್ಲಿದ್ದ ಜಾಕ್‌ ಸೋಕ್‌ ದ್ವಿತೀಯ ಸೆಟ್‌ನಲ್ಲಿ ಫೆಡರರ್‌ಗೆ ಸಾಕಷ್ಟು ಬೆವರಿಳಿಸಿದರು. ಇದನ್ನು ಟೈ ಬ್ರೇಕರ್‌ಗೆ ಕೊಂಡೊಯ್ದರು. ಆದರೆ ಇಲ್ಲಿ ಅವರು ಫೆಡರರ್‌ ಅನುಭವಕ್ಕೆ ಶರಣಾಗಬೇಕಾಯಿತು. ಫೈನಲ್‌ ಪಂದ್ಯದ ಕುರಿತು ಪ್ರತಿಕ್ರಿಯಿಸಿದ ವಾವ್ರಿಂಕ, ‘ರೋಜರ್‌ ಫೆಡರರ್‌ ಅವರನ್ನು ನಾವೆಲ್ಲ ಬಲ್ಲೆವು. ಹೀಗಾಗಿ ಹೆಚ್ಚೇನನ್ನೂ ಹೇಳಬೇಕಾಗಿಲ್ಲ…’ ಎಂದು ನಗು ಹೊಮ್ಮಿಸಿದರು.