ವಿಂಬಲ್ಡನ್‌-2018: ಫೆಡರರ್‌ಗೆ 16ನೇ ಕ್ವಾರ್ಟರ್‌ ಫೈನಲ್‌

Team Udayavani, Jul 10, 2018, 6:00 AM IST

ಲಂಡನ್‌: ಎಂಟು ಬಾರಿಯ ಚಾಂಪಿಯನ್‌ ರೋಜರ್‌ ಫೆಡರರ್‌ 16ನೇ ಬಾರಿಗೆ ವಿಂಬಲ್ಡನ್‌ ಕ್ವಾರ್ಟರ್‌ ಫೈನಲ್‌ ತಲುಪಿದ್ದಾರೆ. ಸೋಮವಾರದ ಪಂದ್ಯದಲ್ಲಿ ಅವರು ಫ್ರಾನ್ಸ್‌ನ ಅಡ್ರಿಯನ್‌ ಮನ್ನಾರಿನೊ ವಿರುದ್ಧ 6-0, 7-5, 6-4 ಅಂತರದ ಜಯ ಸಾಧಿಸಿದರು. ಇದು ಫೆಡರರ್‌ ಕಾಣುತ್ತಿರುವ 53ನೇ ಗ್ರ್ಯಾನ್‌ಸ್ಲಾಮ್‌ ಕ್ಟಾರ್ಟರ್‌ ಫೈನಲ್‌.

ಇದರೊಂದಿಗೆ ಫೆಡರರ್‌ ವಿಂಬಲ್ಡನ್‌ನಲ್ಲಿ ಸತತ 32 ಸೆಟ್‌ಗಳನ್ನು ಗೆದ್ದಂತಾಯಿತು. 2005-06ರ ಅವಧಿಯಲ್ಲಿ 34 ಸೆಟ್‌ ಗೆಲ್ಲುವ ಮೂಲಕ ಫೆಡರರ್‌ ದಾಖಲೆ ನಿರ್ಮಿಸಿದ್ದರು. ಕೆನಡದ ಬಿಗ್‌ ಸರ್ವರ್‌ ಮಿಲೋಸ್‌ ರಾನಿಕ್‌ ಕೂಡ ಎಂಟರ ಸುತ್ತು ಪ್ರವೇಶಿಸಿದ್ದು, ಅಮೆರಿಕದ ಮೆಕೆಂಜಿ ಮೆಕ್‌ಡೊನಾಲ್ಡ್‌ ವಿರುದ್ಧ 6-3, 6-4, 6-7 (5-7), 6-2 ಅಂತರದಿಂದ ಗೆದ್ದು ಬಂದರು.

ಸೆರೆನಾ, ಕೆರ್ಬರ್‌ ಮುನ್ನಡೆ
ವನಿತೆಯರ ಸಿಂಗಲ್ಸ್‌ನಲ್ಲಿ ಸೆರೆನಾ ವಿಲಿಯಮ್ಸ್‌, ಜೆಲೆನಾ ಒಸ್ಟಾಪೆಂಕೊ, ಜೂಲಿಯಾ ಜಾರ್ಜಸ್‌, ಆ್ಯಂಜೆಲಿಕ್‌ ಕೆರ್ಬರ್‌, ಡರಿಯಾ ಕಸತ್ಕಿನಾ ಕ್ವಾರ್ಟರ್‌ ಫೈನಲ್‌ ತಲುಪಿದ್ದಾರೆ. ಸೆರೆನಾ ವಿಲಿಯಮ್ಸ್‌ ರಶ್ಯದ ಅರ್ಹತಾ ಆಟಗಾರ್ತಿ ಎವೆYನಿಯಾ ರೊಡಿನಾ ಅವರನ್ನು ಕೇವಲ 62 ನಿಮಿಷಗಳಲ್ಲಿ 6-2, 6-2 ನೇರ ಸೆಟ್‌ಗಳಲ್ಲಿ ಮಣಿಸಿದರು.

ಲಾತ್ವಿಯಾದ ಜೆಲೆನಾ ಒಸ್ಟಾಪೆಂಕೊ ಬೆಲರೂಸ್‌ನ ಅಲೆಕ್ಸಾಂಡ್ರಾ ಸಾನ್ಸೋವಿಕ್‌ ಅವರನ್ನು 7-6 (7-4), 6-0 ಅಂತರದಿಂದ ಪರಾಭವಗೊಳಿಸಿದರೆ, ರಶ್ಯದ ಡರಿಯಾ ಕಸತ್ಕಿನಾ ಬೆಲ್ಜಿಯಂನ ಅಲಿಸನ್‌ ವಾನ್‌ ಯುಟ್ವಾಂಕ್‌ ಅವರನ್ನು 6-7 (6-8), 6-3, 6-2 ಅಂತರದಿಂದ ಮಣಿಸಿದರು. 
ಜರ್ಮನಿಯ ಜೂಲಿಯಾ ಜಾರ್ಜಸ್‌ ಕ್ರೊವೇಶಿಯದ ಡೋನಾ ವೆಕಿಕ್‌ ವಿರುದ್ಧ 6-3, 6-2 ಅಂತರದ ಜಯ ಸಾಧಿಸಿ ಮೊದಲ ಗ್ರ್ಯಾನ್‌ಸ್ಲಾಮ್‌ ಕ್ವಾರ್ಟರ್‌ ಫೈನಲ್‌ ತಲುಪಿದರು.