ರೋಮ್‌ ರ್‍ಯಾಂಕಿಂಗ್‌ ಸೀರಿಸ್‌ : ಬಂಗಾರ ಗೆದ್ದ ಭಜರಂಗ್‌, ರವಿ ಕುಮಾರ್‌

Team Udayavani, Jan 20, 2020, 1:14 AM IST

ರೋಮ್‌: ರೋಮ್‌ ರ್‍ಯಾಂಕಿಂಗ್‌ ಸೀರಿಸ್‌ ಕುಸ್ತಿ ಸ್ಪರ್ಧೆಯಲ್ಲಿ ಭಾರತದ ಭಜರಂಗ್‌ ಪೂನಿಯ ಮತ್ತು ರವಿ ಕುಮಾರ್‌ ದಹಿಯಾ ಚಿನ್ನದ ಪದಕ ಜಯಿಸಿದ್ದಾರೆ. ಇದರೊಂದಿಗೆ ಟೋಕಿಯೊ ಒಲಿಂಪಿಕ್ಸ್‌ಗೆ ಭರ್ಜರಿ ಸಿದ್ಧತೆ ನಡೆಸಿದ್ದಾರೆ.

25 ವರ್ಷದ ಭಜರಂಗ್‌ ಪೂನಿಯ ಶನಿವಾರ ತಡರಾತ್ರಿ ನಡೆದ 65 ಕೆಜಿ ಫ್ರೀಸ್ಟೈಲ್‌ ವಿಭಾಗದಲ್ಲಿ ಅಮೆರಿಕದ ಜೋರ್ಡನ್‌ ಮೈಕಲ್‌ ಒಲಿವರ್‌ ಅವರನ್ನು 4-3 ಅಂತರದಿಂದ ಮಣಿಸುವ ಮೂಲಕ ಚಿನ್ನವನ್ನು ಕೊರಳಿಗೆ ಅಲಂಕರಿಸಿಕೊಂಡರು.

61 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಿದ ರವಿ ಕುಮಾರ್‌ ಫೈನಲ್‌ ಪಂದ್ಯದಲ್ಲಿ ಕಜಕಿಸ್ಥಾನದ ನೂಬೊìಲತ್‌ ಅಬ್ದುಲಿಯೇವ್‌ ಅವರನ್ನು 12-2 ಅಂತರದಿಂದ ಉರುಳಿಸಿ ಅಧಿಕಾರಯುತ ಜಯ ಸಾಧಿಸಿದರು. ಈ ವರೆಗೆ 57 ಕೆಜಿ ವಿಭಾಗದಲ್ಲಿ ಸ್ಪರ್ಧೆಗೆ ಇಳಿಯುತ್ತಿದ್ದ ರವಿ ಕುಮಾರ್‌, ರೋಮ್‌ನಲ್ಲಿ 61 ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಿ ಚೊಚ್ಚಲ ಚಿನ್ನ ಗೆದ್ದ ಸಾಧನೆ ಮಾಡಿದರು.

74 ಕೆಜಿ ವಿಭಾಗದಲ್ಲಿ ಜೀತೆಂದರ್‌ ಮತ್ತು 86 ಕೆಜಿ ವಿಭಾಗದಲ್ಲಿ ದೀಪಕ್‌ ಪೂನಿಯ ಬೇಗನೇ ನಿರ್ಗಮಿಸಿ ನಿರಾಸೆ ಮೂಡಿಸಿದರು. ಜೀತೆಂದರ್‌ ರೆಪಿಶೇಜ್‌ ಸುತ್ತಿನಲ್ಲಿ ಎಡವಿ ಕಂಚನ್ನು ಕಳೆದುಕೊಂಡರೆ, ದೀಪಕ್‌ ಮೊದಲ ಸುತ್ತಿನಲ್ಲೇ ಎಡವಿದರು.