ಸಚಿನ್ ತೆಂಡೂಲ್ಕರ್ ಮತ್ತು ವಿರಾಟ್ ಕೊಹ್ಲಿಗೆ ಸಾಮ್ಯತೆಯಿದೆ: ಅಂಪಾಯರ್ ಇಯಾನ್ ಗೂಲ್ಡ್

Team Udayavani, May 31, 2020, 11:04 AM IST

ಮುಂಬೈ: ಖ್ಯಾತ ಕ್ರಿಕೆಟ್ ಅಂಪಾಯರ್ ಇಯಾನ್ ಗೂಲ್ಡ್ ಟೀಂ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿಯ ಬಗ್ಗೆ ಮಾತನಾಡಿದ್ದಾರೆ. ಕ್ರಿಕೆಟ್ ಆಟದ ಬಗ್ಗೆ ವಿರಾಟ್ ಗೆ ಅತ್ಯುತ್ತಮ ಜ್ಞಾನವಿದ್ದು, ಆಟದ ಬಗ್ಗೆ ಎಷ್ಟು ಬೇಕಾದರೂ ಮಾತನಾಡಬಲ್ಲರು ಎಂದಿದ್ದಾರೆ.

ಖಾಸಗಿ ಮಾಧ್ಯಮವೊಂದಕ್ಕೆ ಮಾತನಾಡಿದ ಅವರು, ಕೊಹ್ಲಿಯ ಫಿಟ್ನೆಸ್ ಲೆವೆಲ್ ಅದ್ಭುತ. ಆತ ಯಾವುದೇ ರೂಪದರ್ಶಿಗೆ ಕಡಿಮೆಯಿಲ್ಲ. ವಿರಾಟ್ ಒಬ್ಬ ಅತ್ಯುತ್ತಮ ಆಟಗಾರ. ಸಚಿನ್ ತೆಂಡೂಲ್ಕರ್ ಗೆ ಇದ್ದಂತೆ ಆತನಿಗೆ ಇಡೀ ಭಾರತದ ಬೆಂಬಲವಿದೆ ಎಂದಿದ್ದಾರೆ.

ವಿರಾಟ್ ಕೊಹ್ಲಿಗೆ ಕ್ರಿಕೆಟ್ ಬಗ್ಗೆ ಉತ್ತಮ ಜ್ಞಾನವಿದೆ. ನೀವು ಆತನ ಜೊತೆ ಎಷ್ಟು ಬೇಕಾದರೂ ಮಾತನಾಡಬಹುದು. ಆತನಿಗೆ ಆಟದ ಒಳ ಹೊರಗು, ಇತಿಹಾಸ ಎಲ್ಲವೂ ತಿಳಿದಿದೆ ಎಂದಿದ್ದಾರೆ ಗೂಲ್ಡ್.

ಮೈದಾನದಲ್ಲಿ ಅಂಪಾಯರ್ ತೀರ್ಮಾನಕ್ಕೆ ಕೊಹ್ಲಿ ಕೆಲವೊಮ್ಮ ಅಸಮಧಾನ ತೋರಿಸುವ ಬಗ್ಗೆ ಮಾತನಾಡಿದ ಗೂಲ್ಡ್, ಅನುಭವವಾಗುತ್ತಿದ್ದಂತೆ ಕೊಹ್ಲಿ ತುಂಬಾ ಕಲಿತಿದ್ದಾನೆ. ವಿರಾಟ್ ಒಳ್ಳೆಯ ಮನುಷ್ಯ. ಭಾರತೀಯ ಆಟಗಾರರು ಒಳ್ಳೆಯ ಜನರು, ಸಂಸ್ಕಾರವಂತರು ಎಂದು ಗೂಲ್ಡ್ ಹೇಳಿದ್ದಾರೆ.