7ನೇ ಗ್ರ್ಯಾನ್‌ಸ್ಲಾಮ್‌ ಪ್ರಶಸ್ತಿ ಸನಿಹ ಸಾನಿಯಾ

Team Udayavani, Jan 28, 2017, 3:45 AM IST

ಮೆಲ್ಬರ್ನ್: ಭಾರತದ ಟೆನಿಸ್‌ ತಾರೆ ಸಾನಿಯಾ ಮಿರ್ಜಾ 7ನೇ ಗ್ರ್ಯಾನ್‌ಸ್ಲಾಮ್‌ ಪ್ರಶಸ್ತಿಯ ಸನಿಹದಲ್ಲಿ ನಿಂತಿದ್ದಾರೆ. ಅವರು ಆಸ್ಟ್ರೇಲಿಯನ್‌ ಓಪನ್‌ ಮಿಕ್ಸೆಡ್‌ ಡಬಲ್ಸ್‌ ನಲ್ಲಿ ಕ್ರೊವೇಶಿಯಾದ ಇವಾನ್‌ ಡೋಡಿಗ್‌ ಜತೆಗೂಡಿ ಫೈನಲಿಗೆ ಲಗ್ಗೆ ಇರಿಸಿದ್ದಾರೆ.

ಶುಕ್ರವಾರದ ಸೆಮಿಫೈನಲ್‌ ಮುಖಾಮುಖೀ ಯಲ್ಲಿ ದ್ವಿತೀಯ ಶ್ರೇಯಾಂಕದ ಸಾನಿಯಾ ಮಿರ್ಜಾ-ಇವಾನ್‌ ಡೋಡಿಗ್‌ ಸೇರಿಕೊಂಡು ಒಂದು ಗಂಟೆ, 18 ನಿಮಿಷಗಳ ಹೋರಾಟದ ಬಳಿಕ ತವರಿನ ನೆಚ್ಚಿನ ಜೋಡಿ ಎನಿಸಿದ್ದ ಸಮಂತಾ ಸ್ಟೋಸರ್‌-ಸ್ಯಾಮ್‌ ಗ್ರೋತ್‌ ವಿರುದ್ಧ 6-4, 2-6, 1-0 (10-5) ಅಂತರದಿಂದ ಗೆದ್ದು ಬಂದರು. 

ಸಾನಿಯಾ-ಡೋಡಿಗ್‌ ಇನ್ನು ಕೊಲಂಬಿಯಾದ ಅಬಿಗೇಲ್‌ ಸ್ಪಿಯರ್-ಜುವಾನ್‌ ಸೆಬಾಸ್ಟಿಯನ್‌ ಕಬಾಲ್‌ ವಿರುದ್ಧ ಸೆಣಸಲಿ ದ್ದಾರೆ. ದ್ವಿತೀಯ ಸೆಮಿಫೈನಲ್‌ನಲ್ಲಿ ಇವರು ಎಲಿನಾ ಸ್ವಿಟೋಲಿನಾ (ಉಕ್ರೇನ್‌)-ಕ್ರಿಸ್‌ ಗ್ಯುಸಿಯೋನ್‌ (ಆಸ್ಟ್ರೇಲಿಯ) ವಿರುದ್ಧ 7-6 (7-1), 6-2 ಅಂತರದ ಗೆಲುವು ಸಾಧಿಸಿದರು.

2009ರಲ್ಲೂ  ಚಾಂಪಿಯನ್‌
ಸಾನಿಯಾ ಮಿರ್ಜಾ ಈವರೆಗೆ 6 ಗ್ರ್ಯಾನ್‌ಸ್ಲಾಮ್‌ ಪ್ರಶಸ್ತಿ ಜಯಿಸಿದ್ದು, ಇದರಲ್ಲಿ 3 ಮಿಕ್ಸೆಡ್‌ ಡಬಲ್ಸ್‌ ಪ್ರಶಸ್ತಿಗಳಾಗಿವೆ. ಇದರಲ್ಲಿ ಒಂದು ಆಸ್ಟ್ರೇಲಿಯನ್‌ ಓಪನ್‌ ಪ್ರಶಸ್ತಿ ಕೂಡ ಸೇರಿದೆ. ಅದು 2009ರ ಮುಖಾಮುಖೀಯಾಗಿತ್ತು. ಭಾರತದವರೇ ಆದ ಮಹೇಶ್‌ ಭೂಪತಿ ಜತೆಗೂಡಿ ಆಡಿದ ಸಾನಿಯಾ ಮಿರ್ಜಾ ಫೈನಲ್‌ನಲ್ಲಿ ನಥಾಲಿ ಡೆಶಿ-ಆ್ಯಂಡಿ ರಾಮ್‌ ವಿರುದ್ಧ ಜಯ ದಾಖಲಿಸಿದ್ದರು.

ಸಾನಿಯಾ ಕೊನೆಯ ಸಲ ಮಿಕ್ಸೆಡ್‌ ಡಬಲ್ಸ್‌ ಚಾಂಪಿಯನ್‌ ಎನಿಸಿದ್ದು 2014ರ ಯುಎಸ್‌ ಓಪನ್‌ ಪಂದ್ಯಾವಳಿಯಲ್ಲಿ. ಅಂದು ಸಾನಿಯಾ ಜತೆಗಾರನಾಗಿದ್ದ ಆಟಗಾರ ಬ್ರಝಿಲ್‌ನ ಬ್ರುನೊ ಸೋರೆಸ್‌. ಈ ನಡುವೆ 2012ರಲ್ಲಿ ಫ್ರೆಂಚ್‌ ಓಪನ್‌ ಪ್ರಶಸ್ತಿಯೂ ಸಾನಿಯಾಗೆ ಒಲಿದಿತ್ತು. ಆಗಲೂ ಮಹೇಶ್‌ ಭೂಪತಿಯೇ ಜತೆಗಾರನಾಗಿದ್ದರು.

ಸಾನಿಯಾ ಮಿರ್ಜಾ-ಇವಾನ್‌ ಡೋಡಿಗ್‌ ಜೋಡಿಗೆ ಕಳೆದ ಫ್ರೆಂಚ್‌ ಓಪನ್‌ ಪಂದ್ಯಾವಳಿಯಲ್ಲಿ ಪ್ರಶಸ್ತಿ ಗೆಲ್ಲುವ ಅವಕಾಶ ಎದುರಾಗಿತ್ತು. ಆದರೆ ಫೈನಲ್‌ನಲ್ಲಿ ಇವರು ಮಾರ್ಟಿನಾ ಹಿಂಗಿಸ್‌-ಲಿಯಾಂಡರ್‌ ಪೇಸ್‌ ಜೋಡಿಗೆ ಶರಣಾದರು. 

ಭರ್ಜರಿ ಸೆಮಿ ಫೈಟ್‌
ಸೆಮಿಫೈನಲ್‌ ಸ್ಪರ್ಧೆಯ ಮೊದಲ ಸೆಟ್‌ನಲ್ಲಿ ಸಾನಿಯಾ-ಡೋಡಿಗ್‌ ಜೋಡಿಯ ಸರ್ವ್‌ ಅತ್ಯುತ್ತಮ ಮಟ್ಟದಲ್ಲಿತ್ತು. ಆದರೆ ದ್ವಿತೀಯ ಸೆಟ್‌ನ 4ನೇ ಹಾಗೂ 9ನೇ ಗೇಮ್‌ ವೇಳೆ ಸಾನಿಯಾ ಸರ್ವ್‌ ಕಳೆದು ಕೊಂಡರು. ಜತೆಗೆ ಸೆಟ್‌ ಕೂಡ ಕೈಜಾರಿತು. 

ಸ್ಪರ್ಧೆ ಟೈ-ಬ್ರೇಕರ್‌ಗೆ ವಿಸ್ತರಿಸಲ್ಪಟ್ಟಿತು. ಇಲ್ಲಿ 3-3ರ ಸಮಬಲದ ಬಳಿಕ ಸಾನಿಯಾ- ಡೋಡಿಗ್‌ ಸತತ 5 ಅಂಕಗಳನ್ನು ಬುಟ್ಟಿಗೆ ಹಾಕಿಕೊಂಡರು. ಎದುರಾಳಿ ಗ್ರೋತ್‌ ಮೊದಲ ಸರ್ವ್‌ನಲ್ಲೇ ಎಡವಿದರು. ಇದಕ್ಕೆ ಭಾರೀ ಬೆಲೆ ತೆರಬೇಕಾಯಿತು. 

ಸಾನಿಯಾ ಮಿರ್ಜಾ ಈ ಪಂದ್ಯಾ ವಳಿಯಲ್ಲಿ ಉಳಿದಿರುವ ಭಾರತದ ಏಕೈಕ ಸ್ಪರ್ಧಿಯಾಗಿದ್ದಾರೆ. ರೋಹನ್‌ ಬೋಪಣ್ಣ, ಲಿಯಾಂಡರ್‌ ಪೇಸ್‌, ಪುರವ್‌ ರಾಜ, ದಿವಿಜ್‌ ಸರಣ್‌, ಜೂನಿಯರ್‌ಗಳಾದ ಝೀಲ್‌ ದೇಸಾಯಿ, ಸಿದ್ಧಾಂತ್‌ ಬಂಥಿಯ ಅವರೆಲ್ಲ ಬಹಳ ಬೇಗನೆ ನಿರ್ಗಮಿಸಿದ್ದಾರೆ.