ಸಾತ್ವಿಕ್‌ ಸಾಯಿರಾಜ್‌-ಚಿರಾಗ್‌ ಸೆಮಿಫೈನಲಿಗೆ

Team Udayavani, Aug 3, 2019, 5:07 AM IST

ಬ್ಯಾಂಕಾಕ್‌: ಭಾರತದ ಸಾತ್ವಿಕ್‌ ಸಾಯಿರಾಜ್‌ ರಾಂಕಿರೆಡ್ಡಿ ಮತ್ತು ಚಿರಾಗ್‌ ಶೆಟ್ಟಿ ಅವರು ಥಾೖಲಂಡ್‌ ಓಪನ್‌ನ ಪುರುಷರ ಡಬಲ್ಸ್‌ನಲ್ಲಿ ಸೆಮಿಫೈನಲ್‌ ತಲುಪಿದ ಸಾಧನೆ ಮಾಡಿದ್ದಾರೆ.

ಅರ್ಹತಾ ಆಟಗಾರರಾದ ಕೊರಿಯದ ಚೊಯ್‌ ಸೊಗ್ಯು ಮ ತ್ತು ಸೀ ಸಿಯುಂಗ್‌ ಜೆ ಅವರನ್ನು 21-17, 17-21, 21-19 ಗೇಮ್‌ಗಳ ಕಠಿನ ಹೋರಾಟದಲ್ಲಿ ಸಾತ್ವಿಕ್‌-ಚಿರಾಗ್‌ ಉರುಳಿಸಿದರು. ಶ್ರೇಯಾಂ ಕರಹಿತ ಆಟಗಾರರಾದ ಸಾತ್ವಿಕ್‌-ಚಿರಾಗ್‌ ಗೆಲುವು ದಾಖಲಿಸಲು ಸರಿಯಾಗಿ ಒಂದು ತಾಸು ತೆಗೆದುಕೊಂಡರು.

ಸಾತ್ವಿಕ್‌-ಚಿರಾಗ್‌ ಶನಿವಾರ ನಡೆಯುವ ಸೆಮಿಫೈನಲ್‌ ಹೋರಾಟದಲ್ಲಿ ಕೊರಿಯದ ಕೊ ಸಂಗ್‌ ಹ್ಯುನ್‌ ಮತ್ತು ಶಿನ್‌ ಬ್ಯಾಕ್‌ ಚೋಲ್‌ ಅವರನ್ನು ಎದುರಿಸಲಿದ್ದಾರೆ.

ಸಾಯಿ ಪ್ರಣೀತ್‌ಗೆ ಸೋಲು
ಇದೇ ವೇಳೆ ಸಾಯಿ ಪ್ರಣೀತ್‌ ಸೋಲುವುದರೊಂದಿಗೆ ಸಿಂಗಲ್ಸ್‌ನಲ್ಲಿ ಭಾರತದ ಸವಾಲು ಅಂತ್ಯಗೊಂಡಿದೆ. ಕ್ವಾರ್ಟರ್‌ಫೈನಲ್‌ ಪಂದ್ಯದಲ್ಲಿ ಪ್ರಣೀತ್‌ ಅವರು ಜಪಾನಿನ ಏಳನೇ ಶ್ರೇಯಾಂಕದ ಕೆಂಟ ಟಿಸುನೆಯಾಮ ಅವರಿಗೆ 18-21, 12-21 ಗೇಮ್‌ಗಳಿಂದ ಶರಣಾದರು.

ಅಶ್ವಿ‌ನಿ ಪೊನ್ನಪ್ಪ ಜತೆಗೂಡಿ ಮಿಕ್ಸೆಡ್‌ ಡಬಲ್ಸ್‌ನಲ್ಲಿ ಆಡಿದ್ದ ಸಾತ್ವಿಕ್‌ ಸಾಯಿರಾಜ್‌ರಾಂಕಿರೆಡ್ಡಿ ಅವರು ಕ್ವಾರ್ಟರ್‌ಫೈನಲ್‌ನಲ್ಲಿ ಸೋತು ಕೂಟದಿಂದ ನಿರ್ಗಮಿಸಿದರು. ಅವರು ಜಪಾನಿನ ಮೂರನೇ ಶ್ರೇಯಾಂಕದ ಯುಟಾ ವಾಟನಾಬೆ ಮತ್ತು ಅರಿಸಾ ಹಿಗಾಶಿನೊ ಅವರಿಗೆ 13-21, 15-21 ಗೇಮ್‌ಗಳಿಂದ ಸೋತು ಹೊರಬಿದ್ದರು.