ದೊಡ್ಡ  ಸೋಲನುಭವಿಸಿದ ಸೆರೆನಾ ವಿಲಿಯಮ್ಸ್‌

Team Udayavani, Aug 2, 2018, 12:17 PM IST

ಸ್ಯಾನ್‌ ಜೋಸ್‌ : ವಿಶ್ವ ಟೆನಿಸಿನ ದೈತ್ಯ ಆಟಗಾರ್ತಿ ಸೆರೆನಾ ವಿಲಿಯಮ್ಸ್‌ ತಮ್ಮ ಟೆನಿಸ್‌ ಬಾಳ್ವೆಯಲ್ಲೇ ದೊಡ್ಡ ಸೋಲನುಭವಿಸಿದ್ದಾರೆ. ಸ್ಯಾನ್‌ ಜೋಸ್‌ ಡಬ್ಲ್ಯುಟಿಎ ಪಂದ್ಯಾವಳಿಯ ಮೊದಲ ಸುತ್ತಿನ ಪಂದ್ಯದಲ್ಲೇ ಅವರನ್ನು ಬ್ರಿಟನ್ನಿನ ಜೊಹಾನ್ನಾ ಕೊಂಟಾ 6-1, 6-0 ಅಂತರದಿಂದ ಮಣಿಸಿದರು.

ಈ ಪಂದ್ಯದ ವೇಳೆ ಸೆರೆನಾ ಸತತವಾಗಿ ಕೊನೆಯ 12 ಗೇಮ್ಸ್‌ ಕಳೆದುಕೊಂಡರು. ಇಡೀ ಪಂದ್ಯದಲ್ಲಿ ಅವರಿಗೆ ಗಳಿಸಲು ಸಾಧ್ಯವಾದದ್ದು ಒಂದು ಅಂಕ ಮಾತ್ರ. ಈ ಲೆಕ್ಕಾಚಾರದಲ್ಲಿ ಇದು ಸೆರೆನಾ ಅನುಭವಿಸಿದ ದೊಡ್ಡ ಸೋಲಾಗಿ ದಾಖಲಾಗಿದೆ. ಕೊಂಟಾ ಕೇವಲ 51 ನಿಮಿಷಗಳಲ್ಲಿ 23 ಗ್ರ್ಯಾನ್‌ಸ್ಲಾಮ್‌ ವಿಜೇತೆಗೆ ಆಘಾತವಿಕ್ಕಿದರು. ಅವರ ಮುಂದಿನ ಸುತ್ತಿನ ಎದುರಾಳಿ ಅಮೆರಿಕದ ಸೋಫಿಯಾ ಕೆನಿನ್‌.

“ನನ್ನ ತಲೆಯಲ್ಲಿ ಅದೆಷ್ಟೋ ಸಂಗತಿಗಳು ತುಂಬಿವೆ. ಹೀಗಾಗಿ ಈ ಆಘಾತದ ಬಗ್ಗೆ ಚಿಂತಿಸಲಿಕ್ಕೂ ನನಗೆ ಸಮಯವಿಲ್ಲ. ಒಂದಂತೂ ಸತ್ಯ, ನಾನು ಬಹಳ ಕಳಪೆ ಆಟವಾಡಿದೆ…’ ಎಂದು ಸೆರೆನಾ ಸೋಲಿನ ಬಳಿಕ ಪ್ರತಿಕ್ರಿಯಿಸಿದ್ದಾರೆ.ಸೆರೆನಾ ಈ ಪಂದ್ಯಾವಳಿಯಲ್ಲಿ 3 ಸಲ ಚಾಂಪಿಯನ್‌ ಆಗಿ ಮೂಡಿಬಂದಿದ್ದಾರೆ (2011, 2012 ಮತ್ತು 2014). ಕೊಂಟಾ 2016ರಲ್ಲಿ ವೀನಸ್‌ ವಿಲಿಯಮ್ಸ್‌ಗೆ ಸೋಲುಣಿಸಿ ಪ್ರಶಸ್ತಿ ಎತ್ತಿದ್ದರು.