ಕೊಂಟಾ ಸೆರೆನಾ ಕ್ವಾರ್ಟರ್‌ ಪಯಣ

Team Udayavani, Jan 24, 2017, 3:45 AM IST

ಮೆಲ್ಬರ್ನ್: ಉತ್ತಮ ಫಾರ್ಮ್ನಲ್ಲಿರುವ ಗ್ರೇಟ್‌ ಬ್ರಿಟನ್‌ನ ಜೊಹಾನಾ ಕೊಂಟಾ ನೇರ ಸೆಟ್‌ಗಳ ಜಯ ಸಾಧಿಸಿ ಆಸ್ಟ್ರೇಲಿಯನ್‌ ಓಪನ್‌ ಟೆನಿಸ್‌ ಕೂಟದ ಕ್ವಾರ್ಟರ್‌ಫೈನಲ್‌ ಹಂತ ಕ್ಕೇರಿದ್ದಾರೆ. ಕ್ವಾರ್ಟರ್‌ಫೈನಲ್‌ನಲ್ಲಿ ಅವರು ದ್ವಿತೀಯ ಶ್ರೇಯಾಂಕದ ಸೆರೆನಾ ವಿಲಿಯಮ್ಸ್‌ ಅವರ ಸವಾಲನ್ನು ಎದು ರಿಸಲಿದ್ದಾರೆ. 

9ನೇ ಶ್ರೇಯಾಂಕದ 25ರ ಹರೆಯದ ಕೊಂಟಾ ರಶ್ಯದ 30ನೇ ಶ್ರೇಯಾಂಕದ ಏಕತೆರಿನಾ ಮಕರೋವಾ ಅವರನ್ನು 6-1, 6-4 ಸೆಟ್‌ಗಳಿಂದ ಸೋಲಿಸಿ ಅಂತಿಮ ಎಂಟರ ಸುತ್ತಿಗೇರಿದರು. ಕೊಂಟಾ ಸತತ ಎರಡನೇ ವರ್ಷ ಇಲ್ಲಿ ಕ್ವಾರ್ಟರ್‌ಫೈನಲಿಗೇರಿದ ಸಾಧನೆ ಮಾಡಿದ್ದಾರೆ. ಕಳೆದ ವರ್ಷ ಕೊಂಟಾ ಎಲ್ಲರಿಗೂ ಅಪರಿಚಿತರಾಗಿದ್ದರು. ಆದರೆ ಕ್ವಾರ್ಟರ್‌ಫೈನಲಿಗೇರುವ ಮೂಲಕ ತನ್ನ ಪರಿಚಯ ಮಾಡಿಕೊಟ್ಟಿದ್ದ ಕೊಂಟಾ ಈ ಬಾರಿಯೂ ಅಂತಿಮ ಎಂಟರ ಸುತ್ತಿಗೇರಿ ಗಮನ ಸೆಳೆದಿದ್ದಾರೆ.

ಸಿಡ್ನಿ ಇಂಟರ್‌ನ್ಯಾಶನಲ್‌ ಕೂಟದ ಪ್ರಶಸ್ತಿ ಗೆದ್ದಿರುವ ಕೊಂಟಾ ಮೆಲ್ಬರ್ನ್ ನಲ್ಲಿ ಇಷ್ಟರವರೆಗೆ ಯಾವುದೇ ಸೆಟ್‌ ಕಳೆದುಕೊಳ್ಳದೇ ಮುನ್ನುಗ್ಗುತ್ತಿದ್ದಾರೆ.

ಬರೋನಿ ಗೆಲುವು
ಕ್ರೊವೇಶಿಯದ ಮಿರ್ಜಾನಾ ಲೂಸಿಕ್‌ ಬರೋನಿ ಅಮೆರಿಕದ ಅರ್ಹತಾ ಆಟಗಾರ್ತಿ ಜೆನ್ನಿಫ‌ರ್‌ ಬ್ರ್ಯಾಡಿ ಅವರನ್ನು ನೇರ ಸೆಟ್‌ಗಳಿಂದ ಸೋಲಿಸಿ 18 ವರ್ಷಗಳ ಬಳಿಕ ಗ್ರ್ಯಾನ್‌ ಸ್ಲಾಮ್‌ ಕೂಟದ ಕ್ವಾರ್ಟರ್‌ಫೈನಲಿಗೇರಿದ ಸಾಧನೆ ಮಾಡಿದರು. ಕ್ವಾರ್ಟರ್‌ಫೈನಲ್‌ನಲ್ಲಿ ಅವರು ಜೆಕ್‌ ಗಣರಾಜ್ಯದ ಕ್ಯಾರೋಲಿನಾ ಪ್ಲಿಸ್ಕೋವಾ ಅವರನ್ನು ಎದುರಿಸಲಿದ್ದಾರೆ. ಪ್ಲಿಸ್ಕೋವಾ ಇನ್ನೊಂದು ಪಂದ್ಯದಲ್ಲಿ ಆಸ್ಟ್ರೇಲಿಯದ ದರಿಯಾ ಗಾವ್ರಿಲೋವಾರನ್ನು 6-3, 6-3 ಸೆಟ್‌ಗಳಿಂದ ಉರುಳಿಸಿದ್ದರು.

1999ರಲ್ಲಿ ವಿಂಬಲ್ಡನ್‌ ಕೂಟದಲ್ಲಿ ಕ್ವಾರ್ಟರ್‌ಫೈನಲ್‌ ಹಂತಕ್ಕೇರಿದ್ದ ಬರೋನಿ ಆಬಳಿಕ ವೈಯಕ್ತಿಕ ಮತ್ತು ಗಾಯದ ಸಮಸ್ಯೆಯಿಂದಾಗಿ ಟೆನಿಸ್‌ ಆಟದಿಂದ ದೂರ ಉಳಿಯಬೇಕಾಯಿತು. ಕ್ವಾರ್ಟರ್‌ಫೈನಲಿಗೇರುವ ಮೂಲಕ ನನ್ನಲ್ಲಿ ಇನ್ನೂ ಆಟವಿದೆ ಎಂಬುದು ಸಾಬೀತಾಗಿದೆ ಎಂದು 34ರ ಹರೆಯದ ಬರೋನಿ ತಿಳಿಸಿದರು. ಅವರು ದ್ವಿತೀಯ ಸುತ್ತಿನಲ್ಲಿ ಮೂರನೇ ಶ್ರೇಯಾಂಕದ ಅಗ್ನಿàಸ್ಕಾ ರಾದ್ವಂಸ್ಕಾ ಅವರನ್ನು ಕೆಡಹಿದ್ದರು. ತನ್ನ 15ರ ಹರೆಯದಲ್ಲಿ 1997ರಲ್ಲಿ ಯುಎಸ್‌ ಓಪನ್‌ ಮೂಲಕ ಗ್ರ್ಯಾನ್‌ ಸ್ಲಾಮ್‌ಗೆ ಪಾದಾರ್ಪಣೆಗೈದಿದ್ದ ಬರೋನಿ ಮಾರ್ಟಿನಾ ಹಿಂಗಿಸ್‌ ಜತೆಗೂಡಿ 1998ರಲ್ಲಿ ಆಸ್ಟ್ರೇಲಿಯನ್‌ ಓಪನ್‌ನ ವನಿತಾ ಡಬಲ್ಸ್‌ ಪ್ರಶಸ್ತಿ ಜಯಿಸಿದ್ದರು.

ಪೇಸ್‌-ಹಿಂಗಿಸ್‌ ಕ್ವಾರ್ಟರ್‌ ಫೈನಲಿಗೆ
ಮೆಲ್ಬರ್ನ್: ಭಾರತದ ಲಿಯಾಂಡರ್‌ ಪೇಸ್‌ ಮತ್ತು ಮಾರ್ಟಿನಾ ಹಿಂಗಿಸ್‌ ಅವರು ಸುಲಭ ಜಯದೊಂದಿಗೆ ಆಸ್ಟ್ರೇಲಿಯನ್‌ ಓಪನ್‌ನ ಮಿಕ್ಸೆಡ್‌ ಡಬಲ್ಸ್‌ನಲ್ಲಿ ಕ್ವಾರ್ಟರ್‌ಫೈನಲ್‌ ತಲುಪಿದ್ದಾರೆ. ಪೇಸ್‌ ಮತ್ತು ಹಿಂಗಿಸ್‌ ದ್ವಿತೀಯ ಸುತ್ತಿನ ಪಂದ್ಯದಲ್ಲಿ ಆಸ್ಟ್ರೇಲಿಯದ ಕ್ಯಾಸೆ ಡೆಲ್ಲಾಕ್ವಾ ಮತ್ತು ಮ್ಯಾಟ್‌ ರೈಡ್‌ ಅವರನ್ನು 6-2, 6-3 ಸೆಟ್‌ಗಳಿಂದ ಉರುಳಿಸಿದರು. ಪೇಸ್‌-ಹಿಂಗಿಸ್‌ ಮೊದಲ ಸುತ್ತಿನಲ್ಲೂ ಆಸ್ಟ್ರೇಲಿಯದ ಜೋಡಿಯನ್ನು ಕೆಡಹಿದ್ದರು.

ಸ್ಟ್ರೈಕೋವಾ ವಿರುದ್ಧ  ಜಯ
ಕೊಂಟಾ ಅವರ ಕ್ವಾರ್ಟರ್‌ಫೈನಲ್‌ ಎದುರಾಳಿ ಸೆರೆನಾ ವಿಲಿಯಮ್ಸ್‌ ಅವರು ತನ್ನ ನಾಲ್ಕನೇ ಸುತ್ತಿನ ಪಂದ್ಯದಲ್ಲಿ ಬಾಬೋìರಾ ಸ್ಟ್ರೈಕೋವಾ ಅವರನ್ನು ಕಠಿನ ಹೋರಾಟದಲ್ಲಿ 7-5, 6-4 ಸೆಟ್‌ಗಳಿಂದ ಸೋಲಿಸಿದ್ದಾರೆ. ಇದೊಂದು ಕಠಿನ ಪಂದ್ಯವಾಗಿತ್ತು. ಆಕೆ ಉತ್ತಮ ಆಟಗಾರ್ತಿ ಮತ್ತು ಏನು ಬೇಕಾದರೂ ಮಾಡಬಹುದು ಎಂದು ಸೆರೆನಾ ತಿಳಿಸಿದರು. ಆ್ಯಂಜೆಲಿಕ್‌ ಕೆರ್ಬರ್‌ ಪತನ ಗೊಂಡ ಕಾರಣ ಸೆರೆನಾ ಕಣದಲ್ಲಿ ಉಳಿದ ಗರಿಷ್ಠ ರ್‍ಯಾಂಕಿನ ಆಟಗಾರ್ತಿ ಆಗಿದ್ದಾರೆ.