Shami: ಕೊನೆಗೂ ವೃತ್ತಿಪರ ಕ್ರಿಕೆಟ್‌ ಗೆ ಮರಳಿದ ಮೊಹಮ್ಮದ್‌ ಶಮಿ

Team Udayavani, Nov 12, 2024, 3:48 PM IST

ಕೋಲ್ಕತ್ತಾ: ಟೀಂ ಇಂಡಿಯಾದ ಪ್ರಮುಖ ವೇಗಿ ಮೊಹಮ್ಮದ್‌ ಶಮಿ (Mohammed Shami) ಅವರು ಕೊನೆಗೂ ವೃತ್ತಿಪರ ಕ್ರಿಕೆಟ್‌ ಗೆ ಮರಳಿದ್ದಾರೆ. ಕಳೆದ ವರ್ಷದ ನವೆಂಬರ್‌ ನಲ್ಲಿ ಏಕದಿನ ವಿಶ್ವಕಪ್‌ ಫೈನಲ್‌ ನಲ್ಲಿ ಕೊನೆಯದಾಗಿ ಶಮಿ ಆಡಿದ್ದರು. ವಿಶ್ವಕಪ್‌ ವೇಳೆ ಗಾಯಗೊಂಡಿದ್ದ ಶಮಿ ಬಳಿಕ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ಇದೀಗ ಮತ್ತೆ ರಣಜಿ ಟ್ರೋಫಿ ಮೂಲಕ ಮತ್ತೆ ಕ್ರಿಕೆಟ್‌ ಗೆ ಮರಳಿದ್ದಾರೆ.

ಬುಧವಾರ (ನ.13) ದಂದು ಇಂದೋರ್‌ ನಲ್ಲಿ ನಡೆಯಲಿರುವ ಮಧ್ಯಪ್ರದೇಶ ವಿರುದ್ದದ ರಣಜಿ ಪಂದ್ಯದಲ್ಲಿ ಪಶ್ವಿಮ ಬಂಗಾಳ ತಂಡವನ್ನು ಶಮಿ ಪ್ರತಿನಿಧಿಸಲಿದ್ದಾರೆ. ಪಶ್ವಿಮ ಬಂಗಾಳ ಕ್ರಿಕೆಟ್‌ ಮಂಡಳಿ ಈ ವಿಚಾರವನ್ನು ಖಚಿತಪಡಿಸಿದೆ.

2023ರ ನವೆಂಬರ್‌ 19ರಂದು ಆಸ್ಟ್ರೇಲಿಯಾ ವಿರುದ್ದದ ಏಕದಿನ ಕ್ರಿಕೆಟ್‌ ವಿಶ್ವಕಪ್‌ ಫೈನಲ್‌ ನಲ್ಲಿ ಶಮಿ ಕೊನೆಯದಾಗಿ ಆಡಿದ್ದರು. ಆ ವಿಶ್ವಕಪ್‌ ನಲ್ಲಿ ಶಮಿ ಅತ್ಯುತ್ತಮ ಫಾರ್ಮ್‌ ನಲ್ಲಿದ್ದರು. ಅಕಿಲ್ಸ್ ಹೀಲ್ ಗಾಯಕ್ಕೆ ಒಳಗಾಗಿದ್ದ ಶಮಿ ಆರಂಭದಲ್ಲಿ ಶಸ್ತ್ರಚಿಕಿತ್ಸೆಗೆ ಒಳಗಾಗಬೇಕಾಯಿತು. ಆದರೆ ನಂತರ ಅವರ ಮೊಣಕಾಲು ಊತಗೊಂಡ ಕಾರಣ ಚೇತರಿಕೆಯಲ್ಲಿ ಹಿನ್ನಡೆ ಅನುಭವಿಸಿದರು. ನ್ಯೂಜಿಲ್ಯಾಂಡ್ ವಿರುದ್ಧದ ಭಾರತದ ಟೆಸ್ಟ್ ಪಂದ್ಯದ ಸಮಯದಲ್ಲಿ ಬೆಂಗಳೂರಿನ ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯಲ್ಲಿ ಅವರು ಕೆಲವು ಸೆಷನ್‌ ಗಳನ್ನು ಹೊಂದಿದರೂ ಅವರ ಕಮ್‌ ಬ್ಯಾಕ್‌ ವಿಳಂಬವಾಯಿತು.

ಇದೀಗ ಅವರು ವೃತ್ತಿಪರ ಕ್ರಿಕೆಟ್‌ ಗೆ ಮರಳಿದ್ದು, ಟೀಂ ಇಂಡಿಯಾಗೆ ದೊಡ್ಡ ಬೂಸ್ಟ್‌ ನೀಡಿದೆ. ಭಾರತ ಇನ್ನು ಕೆಲವೇ ದಿನಗಳಲ್ಲಿ ಆಸ್ಟ್ರೇಲಿಯಾ ವಿರುದ್ದ ಬಾರ್ಡರ್-ಗಾವಸ್ಕರ್‌ ಟ್ರೋಫಿ ಸರಣಿ ಆಡಲಿದೆ. ಒಂದು ವೇಳೆ ರಣಜಿಯಲ್ಲಿ ಶಮಿ ಉತ್ತಮ ಪ್ರದರ್ಶನ ನೀಡಿದರೆ, ಅವರು ಆಸೀಸ್‌ ಸರಣಿಯ ಭಾಗವಾಗುವ ಸಾಧ್ಯತೆಯಿದೆ.