Japan: ಇಂದಿನಿಂದ ಕುಮಮೋಟೊ ಓಪನ್‌: ಸಿಂಧು, ಲಕ್ಷ್ಯ ಮೇಲೆ ಹೆಚ್ಚಿನ ನಿರೀಕ್ಷೆ

Team Udayavani, Nov 12, 2024, 6:25 AM IST

ಕುಮಮೋಟೊ (ಜಪಾನ್‌): ಪ್ಯಾರಿಸ್‌ ಒಲಿಂಪಿಕ್ಸ್‌ ಬಳಿಕ ಸರಿಯಾದ ಫಾರ್ಮ್ ಕಂಡುಕೊಳ್ಳಲು ವಿಫ‌ಲರಾಗುತ್ತಿರುವ ಪಿ.ವಿ. ಸಿಂಧು ಮತ್ತು ಲಕ್ಷ್ಯ ಸೇನ್‌ ಅವರಿಗೆ ಮತ್ತೊಂದು ಸವಾಲು ಎದುರಾಗಿದೆ. ಮಂಗಳವಾರ ಕುಮಮೋಟೊ ಮಾಸ್ಟರ್ ಜಪಾನ್‌ ಓಪನ್‌ ಬ್ಯಾಡ್ಮಿಂಟನ್‌ ಪಂದ್ಯಾವಳಿ ಆರಂಭವಾಗಲಿದ್ದು, ಇಲ್ಲಿ ಉತ್ತಮ ಪ್ರದರ್ಶನ ನೀಡಲು ಇಬ್ಬರೂ ಎದುರು ನೋಡುತ್ತಿದ್ದಾರೆ.

ಪಿ.ವಿ. ಸಿಂಧು ಡೆನ್ಮಾರ್ಕ್‌ ಓಪನ್‌ ಕೂಟದ ಕ್ವಾರ್ಟರ್‌ ಫೈನಲ್‌ನಲ್ಲಿ ಎಡವಿದ್ದರು. ಫಿನ್ಲಂಡ್‌ ಟೂರ್ನಿಯಲ್ಲಿ ಮೊದಲ ಸುತ್ತಿನಲ್ಲೇ ಸೋಲನುಭವಿಸಿದ್ದರು. ಲಕ್ಷ್ಯ ಸೇನ್‌ ಆರ್ಕ್‌ಟಿಕ್‌ ಓಪನ್‌ ಮತ್ತು ಡೆನ್ಮಾರ್ಕ್‌ ಓಪನ್‌ ಪಂದ್ಯಾವಳಿಗಳೆರಡರಲ್ಲೂ ಬೇಗನೇ ಸೋತು ನಿರ್ಗಮಿಸಿದ್ದರು.

ಈ ಹಿನ್ನಡೆಯ ಹೊರತಾಗಿಯೂ ಜಪಾನ್‌ ಓಪನ್‌ ಸಿದ್ಧತೆ ತೃಪ್ತಿಕರ ಎಂಬುದಾಗಿ ಸಿಂಧು ಹೇಳಿದ್ದಾರೆ. ನೂತನ ಕೋಚ್‌ಗಳಾದ ಅನೂಪ್‌ ಶ್ರೀಧರ್‌ ಮತ್ತು ಕೊರಿಯಾದ ಲೀ ಸ್ಯುನ್‌ ಮಾರ್ಗದರ್ಶನ ಸಿಂಧು ಪಾಲಿಗೆ ಲಾಭ ತರುವ ನಿರೀಕ್ಷೆ ಇದೆ. ಸಿಂಧು ಅವರ ಮೊದಲ ಸುತ್ತಿನ ಎದುರಾಳಿ ಥಾಯ್ಲೆಂಡ್‌ನ‌ ಬುಸಾನನ್‌ ಒನಾಮ್ರುಂಗಫಾನ್‌.

ಲಕ್ಷ್ಯ ಸೇನ್‌ ಮಲೇಷ್ಯಾದ ಲಿಯಾಂಗ್‌ ಜುನ್‌ ಹಾವೊ ವಿರುದ್ಧ ಮೊದಲ ಸುತ್ತಿನ ಪಂದ್ಯ ಆಡಲಿದ್ದಾರೆ. ಮುನ್ನಡೆದರೆ ಇಂಡೋನೇಷ್ಯಾದ ಆ್ಯಂಟನಿ ಗಿಂಟಿಂಗ್‌ ಎದುರಾಗುವ ಸಾಧ್ಯತೆ ಇದೆ.ಈ ಪಂದ್ಯಾವಳಿಯಲ್ಲಿ ಪಾಲ್ಗೊಳ್ಳುತ್ತಿರುವ ಭಾರತದ ಮತ್ತಿಬ್ಬರೆಂದರೆ ಟ್ರೀಸಾ ಜಾಲಿ-ಗಾಯತ್ರಿ ಗೋಪಿಚಂದ್‌. ಇವರು ವನಿತಾ ಡಬಲ್ಸ್‌ನಲ್ಲಿ ಚೈನೀಸ್‌ ತೈಪೆಯ ಸು ಯಿನ್‌ ಹುಯಿ-ಲಿನ್‌ ಜಿನ್‌ ಯುನ್‌ ವಿರುದ್ಧ ಮೊದಲ ಸುತ್ತಿನ ಪಂದ್ಯ ಆಡಲಿದ್ದಾರೆ.