ಸಿಂಧು, ಸೈನಾಗೆ ನಗದು ಬಹುಮಾನ

Team Udayavani, Aug 29, 2017, 1:17 PM IST

ಹೊಸದಿಲ್ಲಿ: ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಶಿಪ್‌ನಲ್ಲಿ ಎರಡು ಪದಕ ಗೆದ್ದ ಭಾರತೀಯ ವನಿತಾ ಶಟ್ಲರ್‌ಗಳಾದ ಪಿವಿ ಸಿಂಧು ಮತ್ತು ಸೈನಾ ನೆಹ್ವಾಲ್‌ ಅವರಿಗೆ ಭಾರತೀಯ ಬ್ಯಾಡ್ಮಿಂಟನ್‌ ಫೆಡರೇಶನ್‌ (ಬಿಎಐ) ನಗದು ಬಹುಮಾನ ಘೋಷಿಸಿದೆ. ಸಿಂಧು ಅವರಿಗೆ 10 ಲಕ್ಷ ರೂ. ಮತ್ತು ಸೈನಾ ಅವರಿಗೆ 5 ಲಕ್ಷ ರೂ. ನೀಡಲಾಗುವುದು ಎಂದು ಬಿಎಐ ತಿಳಿಸಿದೆ.

ಸಿಂಧು ಅವರು ರವಿವಾರ ನಡೆದ ಫೈನಲ್‌ನಲ್ಲಿ ಪ್ರಬಲ ಹೋರಾಟ ನಡೆಸಿದರೂ ಜಪಾನಿನ ನಜೋಮಿ ಒಕುಹಾರಾ ಅವರಿಗೆ ಶರಣಾಗಿ ಬೆಳ್ಳಿಯ ಪದಕಕ್ಕೆ ತೃಪ್ತಿಪಟ್ಟುಕೊಂಡರು. ಸಿಂಧು ಈ ಹಿಂದೆ ವಿಶ್ವ ಬ್ಯಾಡ್ಮಿಂಟನ್‌ನಲ್ಲಿ ಎರಡು ಬಾರಿ ಕಂಚು ಜಯಿಸಿದ್ದರು ಈ ಮೊದಲು ನಡೆದ ಸೆಮಿಫೈನಲ್‌ನಲ್ಲಿ ಮೂರು ಗೇಮ್‌ಗಳ ಕಠಿನ ಹೋರಾಟ ನಡೆಸಿ ಒಕುಹಾರಾ ಅವರಿಗೆ ಶರಣಾಗಿದ್ದ ಸೈನಾ ಕಂಚಿನ ಪದಕ ಪಡೆದರು. ಸೈನಾ ಈ ಹಿಂದಿನ ವಿಶ್ವ ಬ್ಯಾಡ್ಮಿಂಟನ್‌ನಲ್ಲಿ ಬೆಳ್ಳಿಯ ಪದಕ ಜಯಿಸಿದ್ದರು.

ವಿಶ್ವ ಬ್ಯಾಡ್ಮಿಂಟನ್‌ನಲ್ಲಿ ಸಿಂಧು ಮತ್ತು ಸೈನಾ ನೀಡಿದ ಅದ್ಭುತ ನಿರ್ವಹಣೆಗೆ ಅಭಿನಂದನೆ ಸಲ್ಲಿಸುವೆ. ಅವರು ಮುಂದೆಯೂ ಶ್ರೇಷ್ಠ ನಿರ್ವಹಣೆ ನೀಡುವಂತಾಗಲಿ ಎಂದು ಬಿಎಐ ಅಧ್ಯಕ್ಷ ಹಿಮಾಂತ ಬಿಸ್ವ ಶರ್ಮ ಹೇಳಿದ್ದಾರೆ.