ಭಾರತ ಟೆನಿಸ್‌ ಸಂಸ್ಥೆ ವಿರುದ್ಧ ಸೋಮ್‌ದೇವ್‌ ಟೀಕಾಪ್ರಹಾರ

Team Udayavani, Jan 4, 2017, 12:21 PM IST

ಚೆನ್ನೈ: ಟೆನಿಸ್‌ ವೃತ್ತಿ ಜೀವನಕ್ಕೆ ವಿದಾಯ ಹೇಳಿದ ಬೆನ್ನಲ್ಲೇ ಮಾಜಿ ಟೆನಿಸಿಗ ಸೋಮ್‌ ದೇವ್‌ ದೇವ್‌ ವರ್ಮನ್‌ ಅಖೀಲ ಭಾರತೀಯ ಟೆನಿಸ್‌ ಸಂಸ್ಥೆ (ಎಐಟಿಎ) ವಿರುದ್ಧ ಹರಿಹಾಯ್ದಿದ್ದಾರೆ. ಭವಿಷ್ಯದ ಕ್ರೀಡಾಪಟುಗಳಿಗೆ ಅತ್ಯುತ್ತಮ ತರಬೇತಿ ನೀಡುವಲ್ಲಿ ಎಐಟಿಎ ವಿಫ‌ಲವಾಗಿದೆ ಎಂದು ನೇರವಾಗಿಯೇ ಟೀಕಿಸಿದ್ದಾರೆ.

ಭವಿಷ್ಯದ ಆಟಗಾರರಿಗೆ ವಿದೇಶದಲ್ಲಿ ತರಬೇತಿ ನೀಡುವ ಅವಶ್ಯಕತೆ ಇದೆ. ಇದನ್ನು ಎಐಟಿಎ ಗಂಭೀರವಾಗಿ ತೆಗೆದುಕೊಳ್ಳಬೇಕಿತ್ತು. ಆ ನಿಟ್ಟಿನಲ್ಲಿ ಕೆಲಸ ಮಾಡಬೇಕಿತ್ತು. ಆದರೆ ಅದ್ಯಾವುದನ್ನೂ ಎಐಟಿಎ ಮಾಡಿಲ್ಲ. ಅವರಿಗೆ ಆಟಗಾರರ ಬಗ್ಗೆ ಸ್ವಲ್ಪವೂ ಕಾಳಜಿ ಇದ್ದಂತಿಲ್ಲ. ಇದು ನನಗೆ ಆಶ್ಚರ್ಯ ತರಿಸಿದೆ. ಇದುವರೆಗೆ ಯಾವುದೇ ವಿಷಯದ ಬಗ್ಗೆ ನಾನು ಎಲ್ಲಿಯೂ ಪ್ರಸ್ತಾಪಿಸಿರಲಿಲ್ಲ. ಯಾರ ಬಗ್ಗೆಯೂ ಮಾತನಾಡಬೇಡ, ಕೆಲವರಿಂದ ದೂರು ಇರು ಎಂದಷ್ಟೇ ನನ್ನ ಕೋಚ್‌ ಹೇಳಿದ್ದರು. ಇದೆಲ್ಲದರಿಂದಾಗಿ ನಾನು ಎಲ್ಲದರಿಂದಲೂ ದೂರವಿದ್ದೆ ಎಂದು ತಿಳಿಸಿದ್ದಾರೆ.