ODI; ಐರ್ಲೆಂಡ್‌ ವಿರುದ್ಧ ದಕ್ಷಿಣ ಆಫ್ರಿಕಾಕ್ಕೆ 139 ರನ್‌ ಜಯಭೇರಿ

Team Udayavani, Oct 4, 2024, 1:05 AM IST

ಅಬುಧಾಬಿ: ತಟಸ್ಥ ನೆಲದಲ್ಲಿ ಸಾಗಿದ ಐರ್ಲೆಂಡ್‌ ವಿರುದ್ಧದ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ತಂಡವು 139 ರನ್ನುಗಳಿಂದ ಜಯಭೇರಿ ಬಾರಿಸಿದೆ.

ಆರಂಭಿಕ ಆಟಗಾರ ರಿಯಾನ್‌ ರಿಕೆಲ್ಟನ್‌ ಅವರ 91 ಮತ್ತು ಟ್ರಿಸ್ಟನ್‌ ಸ್ಟಬ್ಸ್ ಅವರ 79 ರನ್‌ ನೆರವಿನಿಂದ ದಕ್ಷಿಣ ಆಫ್ರಿಕಾ ತಂಡವು 9 ವಿಕೆಟಿಗೆ 271 ರನ್ನುಗಳ ಉತ್ತಮ ಮೊತ್ತ ಪೇರಿಸಿತು. ಇದಕ್ಕುತ್ತರವಾಗಿ ಬ್ಯಾಟಿಂಗ್‌ ಕುಸಿತಕ್ಕೆ ಒಳಗಾದ ಐರ್ಲೆಂಡ್‌ ತಂಡವು 31.5 ಓವರ್‌ಗಳಲ್ಲಿ 132 ರನ್ನಿಗೆ ಆಲೌಟಾಗಿ ಶರಣಾಯಿತು. ಲಿಝಾಡ್‌ ವಿಲಿಯಮ್ಸ್‌ 32 ರನ್ನಿಗೆ 4 ವಿಕೆಟ್‌ ಕಿತ್ತರು. ಇದು ಅವರ ಏಕದಿನ ಪಂದ್ಯದ ಶ್ರೇಷ್ಠ ನಿರ್ವಹಣೆಯಾಗಿದೆ.
ಈ ಗೆಲುವಿನಿಂದ ದಕ್ಷಿಣ ಆಫ್ರಿಕಾ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿತು. ಸರಣಿಯ ದ್ವಿತೀಯ ಪಂದ್ಯ ಅ. 4ರಂದು ಅಬುಧಾಬಿಯಲ್ಲಿ ನಡೆಯಲಿದೆ.

ಇನ್ನಿಂಗ್ಸ್‌ ಆರಂಭಿಸಿದ ರಿಕೆಲ್ಟನ್‌ ಅವರು ಸ್ಟಬ್ಸ್ ಜತೆ ಗೂಡಿ ನಾಲ್ಕನೇ ವಿಕೆಟಿಗೆ 152 ರನ್ನುಗಳ ಜತೆಯಾಟದಲ್ಲಿ ಪಾಲ್ಗೊಂಡು ಕುಸಿತ ತಂಡವನ್ನು ಸುಸ್ಥಿತಿಗೆ ತಲುಪಿಸಿದರು. ಅವರಿಬ್ಬರ ಉತ್ತಮ ಆಟದಿಂದಾಗಿ ತಂಡ ಉತ್ತಮ ಮೊತ್ತ ತಲಪಲು ಸಾಧ್ಯವಾಯಿತು. ರಿಕೆಲ್ಟನ್‌ 102 ಎಸೆತಗಳಿಂದ ಮೂರು ಸಿಕ್ಸರ್‌ ಮತ್ತು ಏಳು ಬೌಂಡರಿ ನೆರವಿನಿಂದ 91 ರನ್‌ ಗಳಿಸಿದ್ದರೆ ಸ್ಟಬ್ಸ್ 79 ರನ್‌ ಹೊಡೆದರು.