ಸತತ ಮೂರನೇ ಸನ್‌ರೈಸ್‌

Team Udayavani, Apr 16, 2018, 7:00 AM IST

ಕೋಲ್ಕತಾ: ಸನ್‌ರೈಸರ್ ಹೈದರಾಬಾದ್‌ ತಂಡದ ಗೆಲುವಿನ ನಾಗಾಲೋಟ ಮುಂದುವರಿದಿದೆ. ಕೋಲ್ಕತಾ ವಿರುದ್ಧದ ಪಂದ್ಯವನ್ನು ಸನ್‌ರೈಸರ್ ಹೈದರಾಬಾದ್‌ 5 ವಿಕೆಟ್‌ಗಳಿಂದ ಗೆದ್ದುಕೊಂಡಿತು.

ಮೊದಲು ಬ್ಯಾಟಿಂಗ್‌ ಮಾಡಿದ ಕೆಕೆಆರ್‌ 20 ಓವರ್‌ಗಳಲ್ಲಿ 8 ವಿಕೆಟಿಗೆ 138 ರನ್ನುಗಳ ಸಾಮಾನ್ಯ ಮೊತ್ತ ಪೇರಿಸಿತು. ಈ ಗುರಿ ಬೆನ್ನಟ್ಟಿದ ಸನ್‌ರೈಸರ್ 19 ಓವರ್‌ಗೆ 139 ರನ್‌ಗಳಿಸಿ ಗೆಲುವು ಸಾಧಿಸಿತು. ಹೈದರಾಬಾದ್‌ ಪರ ಆರಂಭಿಕ ಬ್ಯಾಟ್ಸ್‌ ಮನ್‌ ವೃದ್ದಿಮಾನ್‌ ಸಹಾ (24 ರನ್‌)ಗಳಿಸಿದರು. ಧವನ್‌ (7ರನ್‌)ಗಳಿಸಿ ಔಟಾದರು. ಬಳಿಕ ಬಂದ ಕೇನ್‌ ವಿಲಿಯಮ್ಸನ್‌ (50 ರನ್‌), ಶಕೀಬ್‌ ಅಲ್‌ ಹಸನ್‌ (27ರನ್‌)ಗಳಿಸಿದರು. ಕೊನೆಯಲ್ಲಿ ಸನ್‌ರೈಸರ್ ಇದಕ್ಕಿದ್ದಂತೆ ವಿಕೆಟ್‌ ಕಳೆದುಕೊಂಡು ಆತಂಕಕ್ಕೆ ಒಳಗಾಯಿತು. ಆದರ ದೀಪಕ್‌ ಹೂಡಾ (5 ರನ್‌) ಹಾಗೂ ಯೂಸುಫ್ (ಅಜೇಯ 17 ರನ್‌) ತಂಡದ ಗೆಲುವನ್ನು ಸಾರಿದರು.

ಕೆಕೆಆರ್‌ ಸಾಮಾನ್ಯ ಮೊತ್ತ: ಟಾಸ್‌ ಸೋತು ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಕೆಕೆಆರ್‌ 7 ಓವರ್‌ಗಳಲ್ಲಿ ಒಂದು ವಿಕೆಟಿಗೆ 52 ರನ್‌ ಮಾಡಿದ ವೇಳೆ ಮಳೆ ಸುರಿಯಲಾರಂಭಿಸಿತು. ಇದರಿಂದ ಕೆಲ ಹೊತ್ತು ಆಟವನ್ನು ನಿಲ್ಲಿಸಲಾಯಿತು. 9.30ರ ವೇಳೆ ಪಂದ್ಯ ಪುನರಾರಂಭಗೊಂಡಿತು.

ಕೆಕೆಆರ್‌ ಪರ ಆರಂಭಕಾರ ಕ್ರಿಸ್‌ ಲಿನ್‌ ಸರ್ವಾಧಿಕ 49 ರನ್‌ ಹೊಡೆದರೆ (34 ಎಸೆತ, 7 ಬೌಂಡರಿ, 1 ಸಿಕ್ಸರ್‌), ನಾಯಕ ದಿನೇಶ್‌ ಕಾರ್ತಿಕ್‌ 29 ರನ್‌ ಮಾಡಿದರು.

ಸಂಕ್ಷಿಪ್ತ ಸ್ಕೋರ್‌: ಕೆಕೆಆರ್‌ 20 ಓವರ್‌ಗೆ 138/9 (ಕ್ರಿಸ್‌ ಲಿನ್‌ 49, ಕಾರ್ತಿಕ್‌ 29, ಭುವನೇಶ್ವರ್‌26ಕ್ಕೆ3), ಹೈದರಾಬಾದ್‌ 19 ಓವರ್‌ಗೆ 139/5 (ವಿಲಿಯಮ್ಸನ್‌ 50, ಶಕೀಬ್‌27, ನಾರಾಯಣ್‌ 17ಕ್ಕೆ 2).