2 ದ್ವಿಶತಕದ ಜತೆಯಾಟ: ಡಿಕ್ವೆಲ್ಲ-ಗುಣತಿಲಕ ವಿಶ್ವದಾಖಲೆ

Team Udayavani, Jul 9, 2017, 3:45 AM IST

ಹಂಬಂತೋಟ: ಸತತ ಎರಡು ಏಕದಿನ ಪಂದ್ಯದಲ್ಲಿ ಮೊದಲನೇ ವಿಕೆಟ್‌ಗೆ ಶ್ರೀಲಂಕಾದ ನಿರೋಶನ್‌ ಡಿಕ್ವೆಲ್ಲ ಮತ್ತು ಧನುಷ್ಕ ಗುಣತಿಲಕ ದ್ವಿಶತಕದ ಜತೆಯಾಟ ನಡೆಸಿದ್ದಾರೆ. ಇದು ವಿಶ್ವದಾಖಲೆಯಾಗಿದೆ. ಜಿಂಬಾಬ್ವೆ ವಿರುದ್ಧ ನಡೆದ ನಾಲ್ಕನೇ ಏಕದಿನ ಪಂದ್ಯದಲ್ಲಿ ಈ ಜೋಡಿ 209 ರನ್‌ ಬಾರಿಸುವ ಮೂಲಕ ಈ ಸಾಧನೆ ಮಾಡಿದೆ. ಇದಕ್ಕೂ ಮುನ್ನ ಮೂರನೇ ಏಕದಿನ ಪಂದ್ಯದಲ್ಲಿ ಈ ಜೋಡಿ ಮೊದಲ ವಿಕೆಟ್‌ಗೆ 229 ರನ್‌ ಬಾರಿಸಿತ್ತು.

ಸರಣಿ ಸಮಗೊಳಿಸಿದ ಜಿಂಬಾಬ್ವೆ!: ನಾಲ್ಕನೇ ಏಕದಿನ ಪಂದ್ಯದಲ್ಲಿ ಆತಿಥೇಯ ಶ್ರೀಲಂಕಾ ವಿರುದ್ಧ ಜಿಂಬಾಬ್ವೆ 4 ವಿಕೆಟ್‌ ಜಯ ಸಾಧಿಸಿದೆ. ಈ ಮೂಲಕ 5 ಪಂದ್ಯಗಳ ಏಕದಿನ ಸರಣಿ 2-2ರಿಂದ ಸಮಬಲವಾಗಿದೆ. ಇನ್ನೊಂದು ಏಕದಿನ ಪಂದ್ಯ ಮಾತ್ರ ಬಾಕಿ ಇದೆ. ಮೊದಲು ಬ್ಯಾಟಿಂಗ್‌ ಮಾಡಿದ ಶ್ರೀಲಂಕಾ 50 ಓವರ್‌ನಲ್ಲಿ 6 ವಿಕೆಟ್‌ ಕಳೆದುಕೊಂಡು 300 ರನ್‌ ಬಾರಿಸಿತ್ತು. ಲಂಕಾ ಪರ ನಿರೋಶನ್‌ ಡಿಕ್ವೆಲ್ಲ (116), ಧನುಷ್ಕ ಗುಣತಿಲಕ (87) ಭರ್ಜರಿ ಬ್ಯಾಟಿಂಗ್‌ ಪ್ರದರ್ಶಿಸಿದರು. ನಂತರ ಮಳೆ ಸುರಿದ ಹಿನ್ನೆಲೆಯಲ್ಲಿ ಜಿಂಬಾಬ್ವೆಗೆ 31 ಓವರ್‌ನಲ್ಲಿ 219 ರನ್‌ ಟಾರ್ಗೆಟ್‌ ನೀಡಲಾಗಿತ್ತು. ಜಿಂಬಾಬ್ವೆ 29.2 ಓವರ್‌ನಲ್ಲಿ 6 ವಿಕೆಟ್‌ ಕಳೆದುಕೊಂಡು ಗುರಿ ಮುಟ್ಟಿತು. ಜಿಂಬಾಬ್ವೆ ಪರ ಕ್ರೆಜ್‌ ಏರ್ವಿನ್‌ (ಅಜೇಯ 69) ಅತಿ ಹೆಚ್ಚು ರನ್‌ ಬಾರಿಸಿದರು.

ಸ್ಕೋರ್‌: ಲಂಕಾ 50 ಓವರ್‌ಗೆ 300/6 (ನಿರೋಶನ್‌ ಡಿಕ್ವೆಲ್ಲ 116, ಧನುಷ್ಕ ಗುಣತಿಲಕ 87, ಮಾಲ್ಕಮ್‌ ವ್ಯಾಲರ್‌ 44ಕ್ಕೆ 2), ಜಿಂಬಾಬ್ವೆ 29.1 ಓವರ್‌ಗೆ 219 (ಕ್ರೆಜ್‌ ಎರ್ವಿನ್‌ 69, ಹಸರಂಗ 40ಕ್ಕೆ 3).