ರಾಜ್ಯ ಮಟ್ಟದ ಆ್ಯತ್ಲೆಟಿಕ್ಸ್‌: ಆಳ್ವಾಸ್‌ ಮುನ್ನಡೆ

Team Udayavani, Sep 6, 2017, 9:02 AM IST

ಮೂಡಬಿದಿರೆ: ಇಲ್ಲಿನ ಸ್ವರಾಜ್ಯ ಮೈದಾನದಲ್ಲಿ ನಡೆಯುತ್ತಿರುವ ರಾಜ್ಯ ಜೂನಿಯರ್‌ ಮತ್ತು ಸೀನಿಯರ್‌ ಆ್ಯತ್ಲೆಟಿಕ್‌ಸ್ಪರ್ಧೆಯ 2ನೇ ದಿನ 5 ಹೊಸ ಕೂಟ ದಾಖಲೆಗಳು ನಿರ್ಮಾಣಗೊಂಡಿವೆ. ಮೂಡಬಿದಿರೆಯ ಆಳ್ವಾಸ್‌ ನ್ಪೋರ್ಟ್ಸ್ ಕ್ಲಬ್‌ 2 ದಿನಗಳಲ್ಲಿ ಒಟ್ಟು 6 ಕೂಟ ದಾಖಲೆಗಳನ್ನು ತನ್ನದಾಗಿಸಿಕೊಂಡಿದೆ.

ಆಳ್ವಾಸ್‌ಗೆ 120 ಪದಕ
48 ಚಿನ್ನ, 37 ಬೆಳ್ಳಿ, 35 ಕಂಚಿನ ಸಹಿತ ಒಟ್ಟು 120 ಪದಕಗಳನ್ನು ಗೆದ್ದಿರುವ ಆಳ್ವಾಸ್‌ ಸಮಗ್ರ ಮುನ್ನಡೆಯತ್ತ ದಾಪುಗಾಲಿಕ್ಕಿದೆ. ಅಂಡರ್‌-18 ಹುಡುಗಿಯರ ವಿಭಾಗದ ಹ್ಯಾಮರ್‌ ತ್ರೋನಲ್ಲಿ ಮೈಸೂರು ಡಿವೈಇಎಸ್‌ನ ಹರ್ಷಿತಾ 42.60 ಮೀ. ಎಸೆದು, 2008ರಲ್ಲಿ ವನಿತಾ ರಾಥೋಡ್‌ ನಿರ್ಮಿಸಿದ್ದ 41.45 ಮೀ. ದಾಖಲೆಯನ್ನು ಹಿಂದಿಕ್ಕಿದರು.

ಅಂಡರ್‌-18 ಬಾಲಕರ 400 ಮೀ. ಓಟದಲ್ಲಿ ಬೆಂಗಳೂರಿಗೆ ಅರ್ಜುನ್‌ ಟ್ರ್ಯಾಕ್‌ ಆ್ಯಂಡ್‌ ಫೀಲ್ಡ್‌ ಸಂಸ್ಥೆಯ ನಿಹಾಲ್‌ ಜೊಯಲ್‌ 48.70 ಸೆಕೆಂಡ್ಸ್‌ ಕ್ರಮಿಸುವುದರೊಂದಿಗೆ ಸಾಧನೆ ಮಾಡಿದ್ದು, 2000ದಲ್ಲಿ ಶಶಿಧರ್‌ ನಿರ್ಮಿಸಿದ್ದ 49.2 ದಾಖಲೆಯನ್ನು ಹಿಂದಿಕ್ಕಿದ್ದಾರೆ.

ಅಂಡರ್‌-16 ಬಾಲಕರ ವಿಭಾಗದ ಶಾಟ್‌ಪುಟ್‌ನಲ್ಲಿ ಆಳ್ವಾಸ್‌ನ ನಾಗೇಂದ್ರ ಅಣ್ಣಪ್ಪ ನಾಯ್ಕ 14.55 ಎಸೆದು ಹಾಗೂ ಅಂಡರ್‌-20 ಹುಡುಗರ ಭಾಗದ 1,500 ಮೀ. ಓಟದಲ್ಲಿ ಬೆಂಗಳೂರು ಆ್ಯತ್ಲೆಟಿಕ್ಸ್‌ ಅಸೋಸಿಯೇಶನ್‌ನ ಈರಪ್ಪ ಹಲಗಣ್ಣ ಕೂಟ ದಾಖಲೆಯನ್ನು ಮಾಡಿದ್ದಾರೆ.
ಆಳ್ವಾಸ್‌ನ ರಿನ್ಸ್‌ ಜೋಸೆಫ್ ಅಂಡರ್‌-16 ಬಾಲಕರ 400 ಮೀ. ಓಟದಲ್ಲಿ 50.6 ಸೆಕೆಂಡ್ಸ್‌ ಕ್ರಮಿಸಿ ನೂತನ ಕೂಟ ದಾಖಲೆ ನಿರ್ಮಿಸಿದ್ದರು.