Head Coach; ಟಿ20 ವಿಶ್ವಕಪ್‌ ಬಳಿಕ ಕೋಚ್‌ ಸ್ಥಾನದಿಂದ ಕೆಳಕ್ಕೆ: ದ್ರಾವಿಡ್‌ ಸ್ಪಷ್ಟನೆ

Team Udayavani, Jun 4, 2024, 8:30 PM IST

ಬೆಂಗಳೂರು: ಭಾರತ ಕ್ರಿಕೆಟ್‌ ತಂಡಕ್ಕೆ ಮುಖ್ಯ ಕೋಚ್‌ ಆಗಿ ಮುಂದುವರಿಯುವ ಸಾಧ್ಯತೆಯ ಬಗ್ಗೆ ರಾಹುಲ್‌ ದ್ರಾವಿಡ್‌ ಮೌನ ಮುರಿದ್ದಾರೆ. ಕೋಚ್‌ ಹುದ್ದೆಗೆ ಮರು ಅರ್ಜಿ ಸಲ್ಲಿಸುತ್ತಿಲ್ಲ. ಸದ್ಯ ಅಮೆರಿಕ ಮತ್ತು ವೆಸ್ಟ್‌ ಇಂಡೀಸ್‌ನಲ್ಲಿ ನಡೆಯುತ್ತಿರುವ ಟಿ20 ವಿಶ್ವಕಪ್‌ ಬಳಿಕ ತಾನು ಕೋಚ್‌ ಹುದ್ದೆಯಿಂದ ಕೆಳಗಿಳಿಯಲು ನಿರ್ಧರಿಸಿರುವುದಾಗಿ ಅವರು ಸ್ಪಷ್ಟಪಡಿಸಿದ್ದಾರೆ.

ಸಂದರ್ಶನದಲ್ಲಿ ಮಾತನಾಡಿರುವ ದ್ರಾವಿಡ್‌, ಕೆಲಸ ನನಗೆ ಖುಷಿಕೊಟ್ಟಿದೆ. ಭಾರತಕ್ಕೆ ಕೋಚಿಂಗ್‌ ಮಾಡುವುದನ್ನು ನಾನು ನಿಜಕ್ಕೂ ಆನಂದಿಸಿದ್ದೇನೆ. ಯಾಕೆಂದರೆ ಇದೊಂದು ವಿಶೇಷ ಹುದ್ದೆ. ಆದರೆ ದುರದೃಷ್ಟವಶಾತ್‌, ಬೇರೆ ಬೇರೆ ವೇಳಾಪಟ್ಟಿಗಳಿವೆ. ಹೀಗಾಗಿ ಕೋಚ್‌ ಹುದ್ದೆಗೆ ನಾನು ಮರು ಅರ್ಜಿ ಸಲ್ಲಿಸುತ್ತೇನೆ ಎಂದು ನನಗನ್ನಿಸುತ್ತಿಲ್ಲ ಎಂದಿದ್ದಾರೆ.

51 ವರ್ಷದ ದ್ರಾವಿಡ್‌ 2021ರಿಂದ ಭಾರತೀಯ ಕ್ರಿಕೆಟ್‌ ತಂಡಕ್ಕೆ ಮುಖ್ಯ ಕೋಚ್‌ ಆಗಿದ್ದಾರೆ. ಆದರೆ, ಜೂ.29ರಂದು ಟಿ20 ವಿಶ್ವಕಪ್‌ ಕೊನೆಗೊಳ್ಳುವ ವೇಳೆ ದ್ರಾವಿಡ್‌ ಜವಾಬ್ದಾರಿಯೂ ಕೊನೆಗೊಳ್ಳಲಿದೆ. ಹೀಗಾಗಿ, ಈ ವಿಶ್ವಕಪ್‌ನಲ್ಲಿ ರೋಹಿತ್‌ ಶರ್ಮ ಪಡೆ ಗೆದ್ದರೆ, “ಮಹಾ ಗೋಡೆ’ ಖ್ಯಾತಿಯ ದ್ರಾವಿಡ್‌ಗೆ ಅರ್ಥಪೂರ್ಣ ವಿದಾಯವೆನಿಸಲಿದೆ. ದ್ರಾವಿಡ್‌ ಜಾಗಕ್ಕೆ ಮಾಜಿ ಕ್ರಿಕೆಟರ್‌ ಗೌತಮ್‌ ಗಂಭೀರ್‌ ಆಯ್ಕೆಯಾಗುವ ಸಾಧ್ಯತೆಗಳಿವೆ ಎಂದು ವರದಿಗಳು ಹೇಳಿವೆ.