ದಲೈಲಾಮಾ ಮೂಗಿಗೆ ಮೂಗು ಉಜ್ಜಿದ ಸ್ಮಿತ್‌

Team Udayavani, Mar 25, 2017, 10:48 AM IST

ಧರ್ಮಶಾಲಾ: ಭಾರತದ ವಿರುದ್ಧ ಅಂತಿಮ ಟೆಸ್ಟ್‌ ಕ್ರಿಕೆಟ್‌ ಪಂದ್ಯ ಆರಂಭವಾಗುವ ಒಂದು ದಿನ ಮೊದಲು ಅಂದರೆ ಶುಕ್ರವಾರ ಆಸ್ಟ್ರೇಲಿಯಾ ಕ್ರಿಕೆಟ್‌ ತಂಡ ಟಿಬೆಟಿಯನ್‌ ಧರ್ಮಗುರು ದಲೈಲಾಮಾರನ್ನು ಭೇಟಿಯಾಗಿ ಆಶೀರ್ವಾದ ಪಡೆದಿದ್ದಾರೆ. 

ಈ ವೇಳೆ ಆಸೀಸ್‌ ನಾಯಕ ಸ್ಟೀವನ್‌ ಸ್ಮಿತ್‌ ಪದ್ಧತಿಯಂತೆ ದಲೈಲಾಮಾ ಮೂಗಿಗೆ ಮೂಗು ಉಜ್ಜಿದ್ದಾರೆ! ಲಾಮಾ ಭೇಟಿ ಮಾಡಿದ ನಂತರ ಸ್ಟೀವ್‌ ಬಹಳ ಸಂತಸ ವ್ಯಕ್ತಪಡಿಸಿದ್ದಾರೆ. ಈ ಟೆಸ್ಟ್‌ ಪಂದ್ಯದ ಐದು ದಿನಗಳಲ್ಲಿ ನಾನು ಆರಾಮಾಗಿ ನಿದ್ರಿಸಲು ಈ ಭೇಟಿ ನೆರವಾಗಲಿದೆ.

ಅವರು ನಮಗೆ ಶಾಂತವಾಗಿರುವುದು, ಒತ್ತಡ ನಿಭಾಯಿಸುವುದು ಹೇಗೆಂದು ಹೇಳಿಕೊಟ್ಟಿದ್ದಾರೆ. ಎಲ್ಲರನ್ನೂ ಒಂದೇ ಎಂಬ ಭಾವದಿಂದ ಕಾಣುವುದು, ಪ್ರೀತಿ, ಕರುಣೆಯನ್ನೂ ಅವರು ಕಲಿಸಿದರೆಂದು ಸ್ಟೀವ್‌ ಹೇಳಿಕೊಂಡಿದ್ದಾರೆ